កងទ័ព​ជើង​ទឹក​អាមេរិក ចាប់ផ្ដើម​ជួយ​ជម្លៀសពលរដ្ឋ​នៅ​ហាវ៉ៃ ព្រោះ​រលក​យក្ស​ស៊ូណាមិ

កងទ័ពជើងទឹកអាមេរិក បាន​ចូលរួម​ជាមួយ​ភ្នាក់ងារសង្គ្រោះបន្ទាន់​ ក្នុង​​​ប្រតិបត្តិការ​ជម្លៀស​ប្រជាជន​​នៅទូទាំង​រដ្ឋ​ហាវ៉ៃ បន្ទាប់​ពី​គ្រោះរញ្ជួយដីកម្រិត ៨,៨​រិចទ័រ បានវាយប្រហារលើឧបទ្វីប Kamchatka របស់​ប្រទេស​រុស្ស៊ីកាលពីព្រឹកថ្ងៃពុធ​ទី​៣០​ខែ​កក្កដា ដោយបង្កជារលកយក្សស៊ូណាមិ ដែលវាយ​ប្រហារ​​ដល់ឆ្នេរសមុទ្រហាវ៉ៃ។

អ្នកនាំពាក្យ​កង​ទ័ព​ជើង​ទឹក​អាមេរិក​ប្រចាំ​ហាវ៉ៃ លោកស្រី Lydia Robertson បាននិយាយថា «ការការពារជីវិតគឺជាអាទិភាពបន្ទាន់របស់យើង។ យើងកំពុងធ្វើការយ៉ាងជិតស្និទ្ធជាមួយភ្នាក់ងារក្នុងស្រុក និងជាតិ ដើម្បីធានាថា សហគមន៍ដែលមានហានិភ័យទទួលបានជំនួយយ៉ាងឆាប់រហ័ស និងដោយសុវត្ថិភាព»។ លោកស្រី Lydia ក៏​បាន​បន្ថែម​ថា យោធាក៏បានបើកផ្លូវឆ្លងកាត់ឆ្នេរ Waianae ភាគខាងលិចរបស់​កោះ Oahu ដើម្បីជួយសម្រួលដល់កិច្ចខិតខំប្រឹងប្រែងជម្លៀស​ផង​ដែរ។

កងទ័ពជើងទឹក បានដាក់ពង្រាយបុគ្គលិក និងធនធាន ដើម្បីជួយដល់អាជ្ញាធរស៊ីវិល។ កងទ័ពជើងទឹក ក៏បានធានាសុវត្ថិភាពកប៉ាល់នៅតាមកំពង់ផែ ច្រករបៀងជម្លៀស​ប្រជាជន និងកំពុងជួយតាមដានរលកយក្សស៊ូណាមិ ដោយសហការ​ជាមួយ​មជ្ឈមណ្ឌលព្រមានរលកយក្សស៊ូណាមិប៉ាស៊ីហ្វិក។

សូម​ជម្រាប​ថា ស៊ីរ៉ែនសង្គ្រោះបន្ទាន់ត្រូវបានបន្លឺឡើងនៅទូទាំងកោះហាវ៉ៃភ្លាមៗបន្ទាប់ពីម៉ោង ៥ និង ៣០​នាទីព្រឹកម៉ោងក្នុងស្រុក។ រលកទីមួយដែលឈានដល់កម្ពស់ ២,៤​ម៉ែត្រ ត្រូវបានរាយការណ៍នៅឯកំពង់ផែ Hilo និង Haleiwa ដោយជន់លិចផ្លូវឆ្នេរសមុទ្រទាប។ ក្រុមមន្ត្រីបានព្រមានថា រលកបន្ទាប់ នឹង​អាចធំជាងនេះ។

អ្នកស្រុករាប់ពាន់នាក់ ត្រូវបានជម្លៀសចេញពីដីគោក ដោយមានរបាយការណ៍អំពីផ្លូវបិទផ្លូវក្នុងទីក្រុង Honolulu ការពន្យារពេលជើងហោះហើរ និងការបិទឆ្នេរ និងកំពង់ផែទូទាំងរដ្ឋ៕

ដោយ៖ ឈាង

ចុចអាន៖ ២ប្រទេសនៅអាស៊ីអាគ្នេយ៍ ជម្លៀសមនុស្សរាប់ម៉ឺននាក់ ដោយសាររលកយក្សស៊ូណាមិ