ព័ត៌មានអន្ដរជាតិ

២ប្រទេសនៅអាស៊ីអាគ្នេយ៍ ជម្លៀសមនុស្សរាប់ម៉ឺននាក់ ដោយសាររលកយក្សស៊ូណាមិ

បានផុស

៩ ខែ មុន

នៅ

ថ្ងៃពុធ ៣០ កក្កដា ២០២៥

ដោយ

នៅថ្ងៃពុធទី៣០ខែកក្កដាឆ្នាំ២០២៥ គ្រោះរញ្ជួយដីកម្រិតធ្ងន់៨.៨រ៉ិចទ័រ បានវាយប្រហារតំបន់ចុងបូព៌ានៃប្រទេសរុស្ស៊ី ឈានដល់បង្កឲ្យមានរលកយក្សស៊ូណាមិ ខណៈប្រទេសជាច្រើននៅជាប់មហាសមុទ្រប៉ាស៊ីហ្វិក សុទ្ធតែប្រកាសអាសន្ននិងជម្លៀសមនុស្សទៅកាន់ទីសុវត្ថិភាព។

ក្នុងចំណោមនោះ ក៏មាន២ប្រទេសនៅតំបន់អាស៊ីអាគ្នេយ៍ផងដែរ គឺឥណ្ឌូណេស៊ីនិងហ្វីលីពីនដែលបានជម្លៀសមនុស្សរាប់ម៉ឺននាក់។

បើតាមការចុះផ្សាយរបស់ BBC, នៅឥណ្ឌូណេស៊ី, ក្រៅពីមនុស្សរាប់ម៉ឺននាក់ត្រូវបានជម្លៀសហើយនោះ ទីភ្នាក់ងារគ្រប់គ្រងគ្រោះមហន្តរាយក្រុង Jayapura បានអំពាវនាវឲ្យមនុស្សបន្ថែមទៀត ត្រូវជម្លៀសចេញជាបន្ទាន់ ខណៈអ្នកនេសាទក៏មិនអនុញ្ញាតឲ្យចេញទូកដែរ។

មិនត្រឹមប៉ុណ្ណឹង ទីភ្នាក់ងារជាតិគ្រប់គ្រងគ្រោះមហន្តរាយ (BNPB) បានជំរុញឲ្យប្រជាជននៅក្នុងខេត្តចំនួន ៥ រួមមាន North Sulawesi, Gorontalo, North Maluku, Papua, និង West Papua ត្រូវជម្លៀសចេញពីតំបន់ឆ្នេរភ្លាមៗ និងកុំវិលត្រឡប់ទៅវិញឲ្យសោះរហូតដល់ការព្រមានត្រូវបានដកចេញ។

ហ្វីលីពីន បានជម្លៀសមនុស្សរាប់ម៉ឺននាក់ដូចគ្នា ខណៈមានការព្យាករថា ទឹករលកនឹងមានកម្ពស់ដល់ទៅមួយម៉ែត្រ ហើយតំបន់រងផលប៉ះពាល់មានដូចជា Albay, Aurora, Batanes, Cagayan, Camarines Norte, Camarines Sur, Catanduanes, Davao del Norte, Davao del Sur, Davao de Oro, Davao Occidental, Davao Oriental, និង Dinagat។

សូមជម្រាបជាថ្មី ការរញ្ជួយដីនេះកើតឡើងនៅឧបទ្វីប Kamchatka នាវេលាម៉ោង១១:៣០នាទីព្រឹក (ម៉ោងនៅរុស្ស៊ី) មានជម្រៅ១៩គី ឡូម៉ែត្រ ជាមួយចំណុចកណ្តាលនៅចម្ងាយ១៣៦គីឡូម៉ែត្រពីតំបន់ Petropavlovsk-Kamchatsky។

វាបង្កជាការព្រមានអំពីរលកយក្សស៊ូណាមិ រហូតដល់កោះហុកកៃដូនិងឃ្យូស៊ូនៃប្រទេសជប៉ុន និងកោះហាវ៉ៃនិងរដ្ឋអាឡាស្កានៃសហរដ្ឋអាមេរិក ឯណោះ ហើយនេះជារញ្ជួយដីដ៏មានឥទ្ធិពលបំផុត ចាប់តាំងពីរញ្ជួយដី Tōhoku ឆ្នាំ២០១១ នៅប្រទេសជប៉ុន ដែលមានកម្រិត ៩.១ រ៉ិចទ័រ៕

អត្ថបទ៖ សុខ សុវណ្ណ

ចុចអាន៖ រញ្ជួយដីកម្រិតធ្ងន់៨.៧រ៉ិចទ័រ វាយប្រហាររុស្ស៊ី ទាញសញ្ញាព្រមានរលកយក្សស៊ូណាមិ ដល់ជប៉ុននិងអាមេរិក