កម្ពុជាទម្លាក់ពន្ធសូន្យលើទំនិញនាំចូលពីអាមេរិក ជាសន្លឹកបៀចុងក្រោយ ចរចាពន្ធបដិកា

លោកឧបនាយករដ្ឋមន្ត្រី ស៊ុន ចាន់ថុល អនុប្រធានទី១ ក្រុមប្រឹក្សាអភិវឌ្ឍន៍​កម្ពុជា ​បានប្រាប់​ឱ្យ​ដឹង​ថា កម្ពុជាបានប្រើសន្លឹកបៀចុងក្រោយ ដោយមិនយកពន្ធរាល់មុខទំនិញនាំចូល​របស់អាមេរិក​ទាំង​អស់ ក្នុងការចរចាពន្ធបដិកា។

សហរដ្ឋអាមេរិកនៅថ្ងៃទី ០១ ខែសីហា ឆ្នាំ ២០២៥ ​បានសម្រេចបញ្ចុះពន្ធលើ​ទំនិញនាំចេញពី​កម្ពុជាទៅកាន់​សហរដ្ឋ​អាមេរិកមកត្រឹម ១៩% (គឺថយចុះ ៦១% ប្រៀបធៀបជាមួយអត្រា​ពន្ធ​ពីដំបូង ៤៩%) ដែលនេះជាដំណឹងដ៏ល្អសម្រាប់ប្រជាពលរដ្ឋ និងសេដ្ឋកិច្ចរបស់កម្ពុជា​ដើម្បីបន្ត​អភិវឌ្ឍន៍ប្រទេសជាតិតទៅមុខ។

លោកឧបនាយករដ្ឋមន្ត្រី ស៊ុន ចាន់ថុល បានលើកឡើងនៅថ្ងៃសុក្រនេះថា អត្រាពន្ធនេះ អាចប្រកួតប្រជែង​ជា​មួយ​​ប្រទេសជិតខាងបាន និងអាចមានប្រៀបឈ្នះដោយសារតម្លៃពលកម្មនៅ​កម្ពុជាមាន​តម្លៃ​ទាប និងជាទីតាំងនៅចំ កណ្ដាល មហាអនុតំបន់មេគង្គ ដែលមានកម្ពុជា វៀតណាម ថៃ ឡាវ ភូមា និងផ្នែកខាងត្បូងរបស់ប្រទេសចិន គឺមានប្រជាពលរដ្ឋ ២៥០ លាននាក់។

ម្យ៉ាងទៀត ច្បាប់វិនិយោគកម្ពុជា គឺជាច្បាប់វិនិយោគដ៏​ច្រើនជូន​ដល់អ្នក​វិនិ​យោគ ច្បាប់វិនិយោគ​កម្ពុជា​គ្មានការរើសអើង រវាងអ្នកវិនិយោគបរទេស ឬអ្នកវិនិយោគកម្ពុជា ដូច្នេះ ច្បាប់វិនិយោគ ហេដ្ឋា​រចនាសម្ព័ន្ធរបស់យើង ដែលរាជរដ្ឋាភិបាលបានខិតខំប្រឹងប្រែង កសាងផ្លូវ ស្ពាន កំពង់ផែ ព្រលានយន្តហោះ ដែលធ្វើឱ្យតម្លៃនៃការផលិតនៅ​កម្ពុជាមាន​តម្លៃ​ប្រកួត​ប្រជែងបាន។

លោក ស៊ុន ចាន់ថុល បន្ថែមថា៖ «អត្រា១៩% នេះ បើប្រៀបធៀបទៅនឹងប្រទេសជិតខាង យើង​​​មានប្រទេសឥណ្ឌូនេស៊ី ១៩% ប្រទេសម៉ាឡេស៊ី ១៩% ប្រទេសហ្វីលីពីន ១៩% ប្រទេស​វៀត​​ណាម ២០% ប្រទេសស្រីលង្កា ២០% បង់ក្លាដែស ២០% ដូច្នេះអត្រានេះ យើង​អាច​ប្រ​កួត​ប្រ​ជែងជា​មួយប្រទេស​ជិតខាង​បាន​ទាំ​ងអស់»។

អត្រានេះ នឹងអាចថែរក្សារោងចក្រនៅកម្ពុជា និងពង្រីករោងចក្រដែលមានស្រាប់ និង​ទាក់​ទាញ​អ្នក​វិនិយោគបន្ថែមទៀត ដើម្បីផលប្រយោជន៍ជាតិ និងបង្កើតការងារ​ជូនប្រជា​ពល​រដ្ឋ។

ក្រុមការងារចរចាពន្ធបដិការជាមួយសហរដ្ឋអាមេរិក ដែលដឹកនាំដោយឧបនាយករដ្ឋមន្ត្រី ស៊ុន ចាន់ថុល បានខិតខំប្រឹងប្រែងក្នុងការចរចាពន្ធបដិការជាមួយសហរដ្ឋអាមេរិក ជាច្រើនដំណាក់កាលទើបទទួលបាននូវលទ្ធផលល្អប្រសើរនៅ​ពេល​​នេះ៕

អត្ថបទ៖ ឡេង ដេត