កម្ពុជា-អាម៉េរិក រំពឹងថាទំនាក់ទំនងទ្វេភាគីកាន់តែល្អូកល្អឺន រុញពាណិជ្ជកម្មទ្វេភាគី និងការវិនិយោគរបស់អាម៉េរិកនៅកម្ពុជាឱ្យកាន់តែកើនឡើង

សម្ដេច ហ៊ុន ម៉ាណែត និងតំណាងពាណិជ្ជកម្មសហរដ្ឋអាម៉េរិក រំពឹងថា ទំនាក់ទំនងទ្វេភាគីរវាងកម្ពុជា និងសហរដ្ឋអាម៉េរិក កាន់តែល្អូកល្អឺនជាមួយគ្នាបន្ថែមទៀត បើកផ្លូវឱ្យការដោះដូរទំនិញ និងការវិនិយោគរបស់អាម៉េរិកនៅកម្ពុជា កាន់តែកើនឡើងបន្ថែមទៀត។ ក្ដីរំពឹងនេះ កើតមានឡើង ក្នុងជំនួបរវាងសម្ដេចនាយករដ្ឋមន្ត្រីកម្ពុជា ជាមួយឯកអគ្គរដ្ឋទូត Jamieson Greer តំណាងពាណិជ្ជកម្មសហរដ្ឋអាម៉េរិក នាថ្ងៃទី១៨ ខែកុម្ភៈ (ម៉ោងនៅអាម៉េរិក) ក្នុងឱកាសសម្ដេច ហ៊ុន ម៉ាណែត ចូលរួមកិច្ចប្រជុំលើកដំបូងនៃក្រុមប្រឹក្សាសន្តិភាព (Board of Peace) នៅរដ្ឋធានីវ៉ាស៊ីនតោន។

សេចក្ដីប្រកាសព័ត៌មានស្ដីព​ីលទ្ធផលជំនួប ផ្សព្វផ្សាយលើប​ណ្ដាញសង្គមសម្ដេចនាយករដ្ឋមន្ត្រី បានស្រង់ប្រសាសន៍សម្ដេចធិបតី និងតំណាងពាណិជ្ជកម្មអាម៉េរិក យកមកសរសេរដូច្នេះ៖«សម្ដេចធិបតី និងឯកឧត្ដមឯកអគ្គរដ្ឋទូត Jamieson Greer ក៏បានសម្ដែងនូវសុទិដ្ឋិនិយមថា ក្រោមការខិតខំប្រឹងប្រែងរវាងប្រទេសទាំងពីរ, ទំនាក់ទំនង កម្ពុជា-អាម៉េរិក នឹងកាន់តែប្រសើរឡើង ជាពិសេសជំរុញឱ្យមានកំណើនពាណិជ្ជកម្មទ្វេភាគី និងកំណើនការវិនិយោគរបស់សហរដ្ឋអាម៉េរិកនៅកម្ពុជា។»។

តាមរយៈក្ដីរំពឹងនេះ  សម្ដេច ហ៊ុន ម៉ាណែត  បានបញ្ជាក់ប្រាប់តំណាងពាណិជ្ជកម្មអាម៉េរិក Jamieson Greer ថា កម្ពុជានឹងបន្តខិតខំប្រឹងប្រែងដើម្បីបញ្ចប់នូវការបំពេញនិតីវិធីនានា សំដៅជំរុញការអនុវត្តពេញលេញនូវកិច្ចព្រមព្រៀងពាណិជ្ជកម្មបដិការរវាងប្រទេសទាំងពីរ សម្រាប់ជាឧត្តមប្រយោជន៍ដល់ប្រជាជាតិទាំងពីរ។

សម្ដេចធិបតី និងតំណាងពាណិជ្ជកម្មអាម៉េរិក  ក៏បានពិភាក្សាគ្នាផងដែរអំពីវិស័យសក្កានុពលនានាដែលកម្ពុជា-អាម៉េរិក អាចនឹងជំរុញទំនាក់ទំនង និងកិច្ចសហប្រតិបត្តិការ ដើម្បីធានាបាននូវឧត្តមប្រយោជន៍សម្រាប់ប្រទេសទាំងពីរ និងដំណោះស្រាយលើបញ្ហាសេសសល់ ដែលត្រូវរួមគ្នាដោះស្រាយ ដើម្បីធ្វើយ៉ាងណាឱ្យរំហូរពាណិជ្ជកម្មទ្វេភាគី និងការធ្វើនិយោគរបស់សហរដ្ឋអាម៉េរិកមកកម្ពុជាកាន់តែរីកចម្រេីនបន្ថែមទៀត។

តំណាងពាណិជ្ជកម្មអាម៉េរិក  បានវាយតម្លៃខ្ពស់ចំពោះការខិតខំប្រឹងប្រែងរបស់កម្ពុជា ដែលបានជំរុញឱ្យទំនាក់ទំនងទ្វេភាគី អាម៉េរិក-កម្ពុជា កាន់តែរីកចម្រើនជាលំដាប់ ជាពិសេសនៅក្នុងវិស័យពាណិជ្ជកម្ម។ ជាក់ស្ដែង, ពាណិជ្ជកម្មទ្វេភាគី អាម៉េរិក-កម្ពុជា បន្តកើនឡើងប្រមាណជិត ២៩% ក្នុងឆ្នាំ២០២៥ បើធៀបនឹងទំហំពាណិជ្ជទ្វេភាគីក្នុងឆ្នាំ២០២៤ ស្របពេលដែលការវិនិយោគរបស់សហរដ្ឋអាម៉េរិកនៅកម្ពុជាក៏កើនឡើងគួរឱ្យកត់សម្គាល់ ដែលនេះជាផ្លែផ្កានៃការជឿទុកចិត្តនៅក្នុងកិច្ចសហប្រតិបត្តិការរវាងប្រទេសទាំងពីរ។

គួរគូសបញ្ជាក់ថា ​នៅក្នុងឆ្នាំ ២០២៥ ​ទំហំ​ពាណិជ្ជ​កម្មទ្វេភាគីកម្ពុជា-អាមេរិក ​សម្រេចបាន ​១៣,១៤ ​ពាន់លានដុល្លារ ​កើនឡើង ២៩,២៤% ​ក្នុងនោះ ​កម្ពុជានាំចេញទៅអាមេរិក មានតម្លៃ ១២,៧៣ ​ពាន់លានដុល្លារ កើនឡើង​២៨,៤៨% ​ចំណែក​អាមេរិកនាំចូលមកវិញ មានតម្លៃ ៤១៧ លានដុល្លារ កើនឡើង ៥៧,៨៣%។  នេះបើតាមទិន្នន័យ​របស់​អគ្គ​នា​យក​ដ្ឋាន​​គយ និង​រដ្ឋាករ​កម្ពុជា ​(GDCE)។

ក្នុងជំនួបនោះ សម្ដេច ហ៊ុន ម៉ាណែត  បានវាយតម្លៃខ្ពស់ចំពោះកិច្ចខិតខំប្រឹងប្រែងរបស់ក្រុមការងារទទួលបន្ទុកផ្នែកពាណិជ្ជកម្មរបស់សហរដ្ឋអាម៉េរិកក្នុងការចរចា និងឈានដល់សម្រេចបាននូវកិច្ចព្រមព្រៀងពាណិជ្ជកម្មបដិការរវាងព្រះរាជាណាចក្រកម្ពុជា និងសហរដ្ឋអាម៉េរិក ដែលសម្រេចបានអត្រាពន្ធក្នុងរង្វង់ ១៩% លើការនាំចូលទំនិញរបស់កម្ពុជាចូលសហរដ្ឋអាម៉េរិក។

តាមរយៈជំនួប សម្តេច ហ៊ុន ម៉ាណែត  ក៏បានឈ្លៀតថ្លែងអំណរគុណ និងវាយតម្លៃខ្ពស់ចំពោះការចូលរួមរបស់ប្រធានាធីបតី Donald J. Trump ក្នុងកិច្ចខិតខំប្រឹងប្រែងជាបន្តបន្ទាប់ក្នុងការជំរុញឱ្យមានបទឈប់បាញ់ កាលពីថ្ងៃទី២៨ ខែកក្កដា ឆ្នាំ២០២៥ និងសេចក្ដីថ្លែងការរួមទីក្រុងគួឡាឡាំពួ ថ្ងៃទី២៦ ខែតុលា ឆ្នាំ២០២៥ ក៏ដូចជាសេចក្ដីប្រកាសរួម ថ្ងៃទី២៧ ខែធ្នូ ឆ្នាំ២០២៥ ដើម្បីធានាដល់ការកសាងសន្តិភាពយូរអង្វែងរវាងកម្ពុជា និងថៃ។

គួរឱ្យដឹងថា សហរដ្ឋ​អាម៉េរិក​បាន​បង្កើត​ទំនាក់ទំនង​ការទូតជាមួយ​ប្រទេស​កម្ពុជា នៅ​ថ្ងៃ​ទី​២៩ ខែ​មិថុនា ឆ្នាំ​១៩៥០ ដែលគិតមកដល់ឆ្នាំ២០២៦ នេះ ទំនាក់ទំនងនៃប្រទេសទាំងពីរឈានដល់វ័យ៧៦ឆ្នាំហើយ៕

ដោយ៖ ង៉ិល​ ណារ៉ាត់