ព័ត៌មានអន្ដរជាតិ

លោក ត្រាំ ហៅខ្លួនគាត់ និង ណេតាន់យ៉ាហ៊ូ ថាជា«វីរបុរសសង្គ្រាម»

បានផុស

៩ ខែ មុន

នៅ

ថ្ងៃព្រហស្បតិ៍ ២១ សីហា ២០២៥

ដោយ

Chheang

យោងតាមការចុះផ្សាយរបស់សារព័ត៌មាន Jerusalem Post កាលពីថ្ងៃទី២០ខែសីហាឆ្នាំ២០២៥ ប្រធានាធិបតីអាមេរិក លោក ដូណាល់ ត្រាំ បានហៅខ្លួនគាត់ និងនាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ ថាជា«វីរបុរសសង្រ្គាម»។

លោក ដូណាល់ ត្រាំ និងលោក បេនចាមីន ណេតាន់យ៉ាហ៊ូ (រូបថត៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ត្រាំ បាននិយាយថា «គាត់ (ណេតាន់យ៉ាហ៊ូ) ជាវីរបុរសសង្រ្គាម ពីព្រោះយើងធ្វើការជាមួយគ្នា។ គាត់គឺជាវីរបុរសសង្រ្គាម។ ខ្ញុំគិតថាខ្ញុំក៏ដូចគ្នាដែរ។ ខ្ញុំបានបញ្ជូនយន្តហោះទាំងនោះទៅ» ដោយសំដៅលើការវាយប្រហារតាមដែនអាកាសដើម្បីកម្ទេចកម្មវិធីនុយក្លេអ៊ែររបស់អ៊ីរ៉ង់កាលពីខែមិថុនា។

Jerusalem Post បានផ្សាយថា ការអត្ថាធិប្បាយនេះ គឺជារឿងគួរឲ្យកត់សម្គាល់មួយដោយសារតែលោក ត្រាំ មិនធ្លាប់បម្រើការនៅក្នុងវិស័យយោធាសហរដ្ឋអាមេរិកនោះទេ តែបែរជាដាក់ខ្លួនឯងនៅក្នុងប្រភេទដូចគ្នាជាមួយលោក ណេតាន់យ៉ាហ៊ូ ដែលជាអតីតយុទ្ធជននៃអង្គភាពយោធាអ៊ីស្រាអែល Sayeret Matkal ហើយបានចូលរួមក្នុងបេសកកម្មជួយសង្គ្រោះចំណាប់ខ្មាំងដ៏ល្បីល្បាញមួយក្នុងហេតុការណ៍ប្លន់យន្តហោះដោយក្រុមសកម្មប្រយុទ្ធប៉ាឡេស្ទីនកាលពីឆ្នាំ១៩៧២។

លោក ត្រាំ បានធ្វើការកត់សម្គាល់ទាំងនេះ នៅពេលដែលអ៊ីស្រាអែលកំពុងរៀបចំផែនការសម្រាប់ប្រតិបត្តិការយោធាដ៏ធំមួយ ដើម្បីកាន់កាប់តំបន់ហ្គាហ្សាទាំងស្រុង។ មន្ត្រីអ៊ីស្រាអែល បាននិយាយថា ប្រតិបត្តិការនេះនឹងដំណើរការ លុះត្រាតែកិច្ចព្រមព្រៀងមួយត្រូវបានសម្រេច ដែលរួមបញ្ចូលទាំងការដោះលែងចំណាប់ខ្មាំងទាំងអស់ដែលស្ថិតនៅក្រោមកណ្ដាប់ដៃក្រុមហាម៉ាស និងការបញ្ចប់សង្គ្រាមក្នុងលក្ខខណ្ឌកំណត់ដោយលោកនាយករដ្ឋមន្ត្រី ណេតាន់យ៉ាហ៊ូ។

កាលពីដើមសប្ដាហ៍ ក្រុមសកម្មប្រយុទ្ធហាម៉ាស បានប្រាប់អ្នកសម្របសម្រួលអេហ្ស៊ីប និងកាតាថា ខ្លួនយល់ព្រមចំពោះសំណើថ្មីស្ដីពីបទឈប់បាញ់ និងដោះលែងចំណាប់ខ្មាំងនៅហ្គាហ្សាហើយ។ យ៉ាងណាមិញ ភាគីអ៊ីស្រាអែលមិនទាន់ផ្ដល់សញ្ញាអ្វីឡើយចំពោះសំណើបទឈប់បាញ់ចុងក្រោយនេះនៅឡើយទេ៕

ដោយ៖ ឈាង