ព័ត៌មានអន្ដរជាតិ

ប្រធាន EU គាំទ្រណាតូបាញ់ទម្លាក់យន្តហោះចម្បាំងរុស្ស៊ីដែលបំពានដែនអាកាស

បានផុស

៩ ខែ មុន

នៅ

ថ្ងៃព្រហស្បតិ៍ ២៥ កញ្ញា ២០២៥

ដោយ

Chheang

ប្រធានសហភាពអឺរ៉ុប(EU) លោកស្រី Ursula von der Leyen បាននិយាយថា សមាជិកណាតូត្រូវតែត្រៀមខ្លួនក្នុងការបាញ់ទម្លាក់យន្តហោះចម្បាំងរុស្ស៊ី ប្រសិនបើពួកគេឈ្លានពានចូលទៅក្នុងដែនអាកាសសម្ព័ន្ធមិត្ត។

លោកស្រី Ursula von der Leyen (រូបថត៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី von der Leyen បានប្រាប់ CNN កាលពីថ្ងៃពុធទី២៤ខែកញ្ញាថា «គំនិតរបស់ខ្ញុំគឺយើងត្រូវការពារគ្រប់សង់ទីម៉ែត្រការ៉េនៃទឹកដី។ នោះមានន័យថា ប្រសិនបើមានការឈ្លានពាននៅក្នុងដែនអាកាស បន្ទាប់ពីការព្រមាន បន្ទាប់ពីមានការជូនដំណឹងច្បាស់លាស់ហើយ ពិតណាស់ជម្រើសនៃការបាញ់ទម្លាក់យន្តហោះចម្បាំងដែលកំពុងឈ្លានពានដែនអាកាសរបស់យើងគឺជារឿងដែលត្រូវធ្វើ»។

លោកស្រី Von der Leyen បានព្រមានថា រុស្ស៊ីកំពុងសាកល្បងអឺរ៉ុប តាមរយៈយុទ្ធសាស្ត្រសង្គ្រាមកូនកាត់ ហើយបានសង្កត់ធ្ងន់ថា ណាតូត្រូវតែរឹងមាំ។ លោកស្រីបាននិយាយថា «វាជាការសម្រេចចិត្តរបស់អង្គការណាតូ ប៉ុន្តែខ្ញុំសូមនិយាយឲ្យច្បាស់ថា អ្នកមិនអាចប៉ះលើទឹកដីរបស់យើងទេ»។

សុន្ទរកថារបស់លោកស្រី បានបន្លឺឡើងបន្តពីប្រធានាធិបតីអាមេរិក ដូណាល់ ត្រាំ ដែលកាលពីថ្ងៃអង្គារបាននិយាយថា ប្រជាជាតិណាតូគួរតែ «បាញ់ទម្លាក់យន្តហោះរុស្ស៊ីដែលចូលក្នុងដែនអាកាសរបស់ពួកគេ» ក្នុងអំឡុងពេលកិច្ចប្រជុំជាមួយប្រធានាធិបតីអ៊ុយក្រែន វ៉ូឡូឌីមៀរ ហ្សេលេនស្គី នៅមហាសន្និបាតអង្គការសហប្រជាជាតិ។

រដ្ឋមន្ត្រីការបរទេសប៉ូឡូញ លោក Radosław Sikorski បានគាំទ្រជាសាធារណៈនូវគោលជំហររបស់លោក ត្រាំ។

ការលើកឡើងនេះ ធ្វើឡើងចំពេលមានការកើនឡើងនៃការរំលោភដែនអាកាសដោយក្រុងមូស្គូ។ ក្នុងរយៈពេលប៉ុន្មានសប្តាហ៍ថ្មីៗនេះ ប្រទេសប៉ូឡូញ ដោយមានការគាំទ្រពីអង្គការណាតូ បានបាញ់ទម្លាក់យន្តហោះគ្មានមនុស្សបើករបស់រុស្ស៊ីជាច្រើនគ្រឿង ខណៈដែលមន្ត្រីអេស្តូនីបាននិយាយថា យន្តហោះចម្បាំងរុស្ស៊ីបានចូលទៅក្នុងដែនអាកាសរបស់ពួកគេ ដែលជំរុញឲ្យខ្លួនអនុវត្តមាត្រា៤ នៃសន្ធិសញ្ញាណាតូ។

ឯកអគ្គរដ្ឋទូតសហរដ្ឋអាមេរិកប្រចាំអង្គការសហប្រជាជាតិ លោក Mike Waltz បានពង្រឹងជំហររបស់ទីក្រុងវ៉ាស៊ីនតោនកាលពីថ្ងៃអង្គារថា «សហរដ្ឋអាមេរិក និងសម្ព័ន្ធមិត្តរបស់យើងនឹងការពារគ្រប់អ៊ីញនៃទឹកដីរបស់អង្គការណាតូ»៕

ដោយ៖ ឈាង