មន្រ្តី​ជំនាញ​ ណែនាំ​ពលរដ្ឋ​​រស់​នៅ​ជិត​ភ្នំ​ត្បែង​ឱ្យ​ប្រុងប្រយ័ត្ន​ ក្រោយ​​បាក់​រអិល​ដី​នៅ​ចង្កេះ​ភ្នំជាងមួយហិចតា

ព្រះវិហារ ៖ ភ្នំត្បែង​ដែល​ជា​សម្បត្តិ​វប្បធម៌​ធម្មជាតិ បាន​បាក់​រអិល​ដី​ចង្កេះភ្នំអស់ប្រមាណ​ជាង​មួយហិចតា កាលពីថ្ងៃទី២៤ខែកញ្ញាឆ្នាំ២០២៥ ដែលមានទីតាំង​ស្ថិតនៅភូមិបុស្ស ឃុំភ្នំពេញ ស្រុកគូលែនខេត្តព្រះវិហារ ប៉ុន្តែ​ករណីនេះមិនមានបណ្ដាល​ឱ្យ​ប៉ះពាល់ដល់ពលរដ្ឋនិងផ្ទះសម្បែង នោះ​ទេ។ ប្រជាពលរដ្ឋ ក៏ដូចជាអ្នកនិយមលេងបណ្ដាញសង្គមហ្វេសប៊ុក បាន​នាំ​គ្នា​បង្ហោះតៗគ្នា​ថា ភ្នំត្បែងបាក់ដី ជាប្រផ្នូលមិនសូវល្អ ហើយ​ក្នុង​សៀវភៅ​ប្រវត្តិលោកតាសួង ត្រង់​ចំណុច​មួយ​គេ​មាន​និយាយ​ថា ឱ្យតែភ្នំត្បែងបាក់ដី គឺជាប្រថ្នូលមិនល្អ។

លោកមឿន សុភេទ ប្រធានមន្ទីរបរិស្ថាននៃខេត្តព្រះវិហារ បាន​ឱ្យដឹងនៅល្ងាចថ្ងៃទី២៥នេះថា ភ្នំត្បែង គឺជាសម្បត្តិវប្បធម៌ធម្មជាតិ ដែលគ្រប់គ្រងដោយក្រសួងបរិស្ថាន ។ លោកបន្តថា ការរអិលដីធ្លាក់ពីលើភ្នំ(land fly) គឺបណ្ដាលមកពីភ្លៀងខ្លាំងពេក ធ្វើ​ឱ្យ​សំណើម​ផ្ទៃ​ខាងក្នុងជ្រាយ ទើប​ទឹក​ហូរ​បាក់​ដី​ត្រង់​ចង្កេះភ្នំ អស់ប្រមាណជាមួយហិចតា តែ​មិន​មាន​ប៉ះពាល់​ដល់​ផ្ទះសម្បែងក៏ដូចជាពលរដ្ឋនោះទេ។

លោក​បញ្ជាក់​ថា បច្ចុប្បន្នកម្លាំងមន្ទីរបរិស្ថានខេត្តព្រះវិហារ កំពុង​ចុះធ្វើការស្រាវជ្រាវលើករណីនេះ ដើម្បីធ្វើរបាយការណ៍ជូនថ្នាក់លើ។ ករណី​នេះ​ដែរ មន្ត្រីជំនាញតែងតែបានណែនាំដល់ពលរដ្ឋដែលកំពុងរស់នៅជុំវិញ ភ្នំត្បែង ត្រូវ​ប្រុងប្រយ័ត្នករណីបាក់ដីបែបនេះ។

ការ​ជំនឿ​របស់​ពលរដ្ឋ គឺជារឿងមួយ។ ប៉ុន្តែក្រុមអ្នកជំនាញអះអាងថា វា​គឺ​បណ្តាលមកពីកត្តា​ធម្មជាតិ ភ្លៀងខ្លាំងពេក​ធ្វើ​ឱ្យ​ទឹកហូរ​ច្រោះដី​បាក់​ដី​តែ​ប៉ុណ្ណោះ បើ​នៅ​បរទេស​តែងកើតឡើងញឹកញាប់ ដោយ​បណ្តាល​ឱ្យ​បាក់​ដី​និង​ថ្ម ភ្នំ អាច​បង្ក​ការ​គ្រោះថ្នាក់៕

ដោយ ៖ ជុន កុសល