កម្ពុជា-អូស្រ្តាលី រួមគ្នាពង្រឹងកិច្ចសហការអភិវឌ្ឍផែនការវិនិយោគវិស័យទឹកស្អាតតាមបណ្តាខេត្ត

ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងស្ថានទូតអូស្ត្រាលីប្រចាំនៅកម្ពុជា តាមរយៈកម្មវិធី CAPRED បាន​និងកំពុង​ពង្រឹងកិច្ចសហការអភិវឌ្ឍ ផែនការវិនិយោគខេត្តសម្រាប់វិស័យទឹកស្អាត ដើម្បីពន្លឿន​វឌ្ឍនភាព​ការ​ផ្តល់​សេវា​គ្របដណ្ដប់​ទូទាំង​ប្រទេស​ត្រឹមឆ្នាំ២០៣០។

លោក Derek Yip ឯកអគ្គរដ្ឋទូតអូស្ត្រាលី បានកោតសរសើរចំពោះវឌ្ឍនភាពរបស់កម្ពុជា និងបានសង្កត់ធ្ងន់ថា ការសម្រេចគោលដៅ​នេះនឹងទាមទារឱ្យមានការបង្កើនការវិនិយោគ ការរៀបចំ​ផែនការ​ដែល​សម្របសម្រួល​អន្តរវិស័យ និង​គោល​នយោបាយ​ដែល​បង្កើនភាពធន់នឹងហានិភ័យអាកាសធាតុ។

ជា​មួយ​គ្នា​នេះ លោក​ឯកអគ្គរដ្ឋទូត បានបញ្ជាក់​ពី​ការប្តេជ្ញាចិត្តរបស់រដ្ឋាភិបាលអូស្ត្រាលី តាមរយៈកម្មវិធី CAPRED ក្នុងការលើកកម្ពស់ដំណោះស្រាយផ្នែកហិរញ្ញវត្ថុ និងជំរុញ​កិច្ច​សហប្រតិបត្តិការ​ជាមួយ​ប្រតិបត្តិករ​ផ្តល់​សេវា​ផ្គត់ផ្គង់​ទឹក​ស្អាត​នៅកម្ពុជា។

លោក រដ្ឋ​មន្ត្រី ហែម វណ្ណឌី បានផ្តល់ទស្សនវិស័យដល់ក្រុម​ការងារ​បច្ចេកទេស​របស់ CAPRED ដើម្បី​បញ្ចប់​ការ​រៀបចំ​ប្រព័ន្ធ​នេះ ដោយបន្ថែមថា ក្រសួង​បាន​និង​កំពុង​ចុះ​ពិនិត្យ​វាយ​តម្លៃប្រតិបត្តិករផ្តល់សេវាផ្គត់ផ្គង់ទឹកស្អាតឯកជននៅទូទាំងប្រទេស ហើយក៏បានណែនាំប្រតិបត្តិករទាំងអស់ឱ្យរៀបចំ និងផ្តល់ផែនការវិនិយោគរបស់ខ្លួនមកក្រសួងផងដែរ។

លោកបានសង្កត់ធ្ងន់ថា ប្រតិបត្តិករ​ផ្តល់​សេវា​ផ្គត់ផ្គង់​ទឹកស្អាត​ត្រូវ​ផ្តល់​អាទិភាព​ដល់​ការបង្កើន​ប្រសិទ្ធ​ភាព​សេវា កាត់​បន្ថយទឹកស្អាតមិនមានចំណូល និងពង្រឹងភាពអនុលោមតាមលក្ខខណ្ឌនៃអាជ្ញាប័ណ្ណរបស់ខ្លួន។

តាមរយៈជំនួយបច្ចេកទេសរបស់ CAPRED មន្ត្រីក្រសួងនឹងទទួលបានការផ្ទេរជំនាញក្នុងការគ្រប់គ្រង និងប្រើប្រាស់ប្រព័ន្ធនេះ ដែលមិនត្រឹមតែជាឧបករណ៍ដើម្បីកំណត់រកដំណោះស្រាយផ្នែកហិរញ្ញវត្ថុប៉ុណ្ណោះទេ ប៉ុន្តែដើម្បីគាំទ្រការរៀបចំគោលនយោបាយ និងបង្ហាញភស្តុតាងសម្រាប់ទាក់ទាញការវិនិយោគធំៗនៅក្នុងវិស័យនេះផងដែរ។

ផែនការវិនិយោគខេត្តសម្រាប់វិស័យទឹកស្អាតក៏បង្ហាញពីភាពចាំបាច់នៃការអនុវត្តវិធីសាស្រ្តច្នៃប្រឌិត ដើម្បីធានាបាននូវនិរន្តរភាពនៃវិស័យនេះ រួមទាំងយន្តការចំគោលដៅដើម្បីគាំទ្រការវិនិយោគសម្រាប់តំបន់ជនបទ និងវិធានការស្តារចំណាយដែលផ្តល់សេវាទឹកស្អាតក្នុងតម្លៃសមរម្យសម្រាប់គ្រួសារទាំងអស់។

ក្នុងកិច្ចពិភាក្សានេះដែរ​ តំណាង CAPRED បានបង្ហាញពីប្រព័ន្ធព័ត៌មានផែនការវិនិយោគខេត្ត ដែលរួមបញ្ចូលមូលដ្ឋានទិន្នន័យគម្រោងតាមភូមិសាស្ត្រ និងផ្ទាំងគ្រប់គ្រងទិន្នន័យដែលមានការវិភាគលម្អិតនៃតម្រូវការវិនិយោគ ផលចំណេញផ្នែកសេដ្ឋកិច្ច និងសន្តិសុខប្រភពទឹក។ ការសិក្សាបានរកឃើញកត្តាប្រឈមសំខាន់ៗ ដូចជាការពង្រីកសេវាទៅតំបន់ជនបទដាច់ស្រយាលនឹងត្រូវចំណាយកាន់តែខ្ពស់ខ្លាំង ហើយប្រភពទឹកសម្រាប់ផលិតទឹកស្អាតភាគច្រើនប្រឈមនឹងហានិភ័យសន្តិសុខទឹកត្រឹមឆ្នាំ២០៤០ ប្រសិនបើមិនមានផែនការបង្កើនភាពធន់នឹងអាកាសធាតុ៕