Airbus ប្រមូលយន្តហោះជួសជុលជាង ៦ ០០០ គ្រឿង រំខានដល់វិស័យអាកាសចរណ៍ទូទាំងពិភពលោក

ក្រុមហ៊ុនផលិតយន្តហោះ Airbus កាលពីថ្ងៃសុក្រ បាន​ចេញបញ្ជាប្រមូលយន្តហោះប្រភេទ A320 ប្រមាណ ៦ ០០០ គ្រឿង ដើម្បីយកទៅជួញជុល​បញ្ហាសុសវែរ ដោយបង្កការរំខានដល់វិស័យអាកាសចរណ៍ទូទាំងពិភពលោក។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

Airbus បានឱ្យដឹងថា យន្តហោះប្រភេទ A320 ត្រូវការសុសវែរថ្មីមុនដំណើរការហោះហើរធម្មតាឡើងវិញ បើមិនដូច្នោះទេអាចនឹង​ជួបបញ្ហាទិន្នន័យ ដែលនឹង​បង្កឱ្យមាន​ការពន្យារពេលជើងហោះហើរ ឬក៏ការលុបជើងហោះហើរ ចំពេលដែលពិភព​លោក​ចូលដល់រដូវធ្វើដំណើរចុងសប្ដាហ៍ដ៏មមាញឹក ជាពិសេសសហរដ្ឋអាមេរិក។ ក្រៅពីការផ្លាស់ប្ដូរសុសវែរ យន្តហោះរាប់រយគ្រឿង ក៏ត្រូវការផ្លាស់ប្ដូរ ឬជួសជុស ហាដវែរ (គ្រឿងបន្លាស់) ផងដែរ។

ការចេញបញ្ជាប្រមូលយន្តហោះជួសជុលដដែល ធ្វើឡើង​​ក្រោយមានការរកឃើញថា រលកវិទ្យុសកម្មដ៏ខ្លាំងខ្លាពីព្រះអាទិត្យអាចបំផ្លាញទិន្នន័យសំខាន់ៗ​សម្រាប់មុខងារ​គ្រប់គ្រងការហោះហើរ។

ក្រុមហ៊ុន Airbus បាន​និយាយក្នុងសេចក្ដីថ្លែងការណ៍ថា ជាលទ្ធផលនៃរលកវិទ្យុសកម្ម «ក្រុមហ៊ុន Airbus បាន​កំណត់​អត្តសញ្ញាណ​យន្តហោះ​​ប្រភេទ A320 កំពុងដំណើរការ មួយ​ចំនួន​ធំ​ ​ដែល​អាច​នឹង​រង​ផល​ប៉ះពាល់»។​ ក្រុមហ៊ុនទទួលស្គាល់ថា វិធានការរបស់​ខ្លួន «នឹង​នាំ​ឱ្យ​មាន​ការ​រំខាន​ដល់​ប្រតិបត្តិការ​ដល់​អ្នកដំណើរ និង​អតិថិជន»។

តាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ ប្រភព​ពីឧស្សាហកម្មអាកាសចរណ៍បាននិយាយថា ​បទបញ្ជាប្រមូលយន្តហោះជួសជុលភ្លាមៗរបស់ Airbus ធ្វើឡើងក្រោយ​ជើងហោះហើររបស់ក្រុមហ៊ុន​អាកាសចរណ៍ JetBlue ពីទីក្រុង Cancun នៃប្រទេសម៉ិកស៊ិក ទៅកាន់ទីក្រុង Newark របស់សហរដ្ឋអាមេរិក បានធ្លាក់ចុះរយៈកម្ពស់ពេលហោះហើរភ្លាមៗកាលពីថ្ងៃទី ៣០ តុលា ដោយធ្វើ​ឱ្យអ្នកដំណើរជាច្រើននាក់រងរបួស។ ​ជើងហោះហើរដដែលត្រូវបង្ខំចុះចតនៅក្រុង Tampa និងបង្កឱ្យមាន​ការស៊ើបអង្កេតពីរដ្ឋបាលអាកាសចរណ៍សហព័ន្ធអាមេរិក (FAA)។

ជុំវិញបញ្ហានេះផងដែរ ទីភ្នាក់ងារសុវត្ថិភាពអាកាសចរណ៍សហភាពអឺរ៉ុបឯណោះវិញ កាលពីយប់ថ្ងៃសុក្រ ​បានចេញសេចក្តីណែនាំបន្ទាន់មួយ ដោយ​កំណត់ការជួសជុលតាមបទបញ្ជាប្រមូលរបស់ Airbus ​ជា «កាតព្វកិច្ច»។

បើតាមរ៉យទ័រ នៅពេល Airbus ចេញសេចក្ដីប្រកាសកាលពីថ្ងៃសុក្រ យន្តហោះ A320 ប្រមាណ ៣ ០០០ គ្រឿង ពីប្រតិបត្តិករអាកាសចរណ៍ប្រមាណ ៣៥០ ក្រុមហ៊ុន កំពុងហោះហើរនៅលើអាកាស​នៅឡើយ។ បច្ចុប្បន្ន យន្តហោះប្រភេទ A320 ប្រមាណ ១១ ៣០០ គ្រឿង ដែលកំពុងប្រតិបត្តិការទូទាំងពិភពលោក។

ប្រតិបត្តិករយន្តហោះ A320 ធំៗ រួមមានក្រុមហ៊ុនអាកាសចរណ៍នៅសហរដ្ឋអាមេរិក ដូចជា American Airlines, Delta Air Lines, JetBlue និង United Airlines ជាដើម។ ក្រុមហ៊ុនអាកាសចរណ៍នៅចិន អឺរ៉ុប និងឥណ្ឌា ក៏ស្ថិតក្នុងចំណោមអតិថិជនធំបំផុតរបស់យន្តហោះ​ប្រភេទដដែល​ផងដែរ៕ ​