ព័ត៌មានអន្ដរជាតិ

ថៃរឹបអូសទុរេនខ្ចី ១,៥ តោនពីកន្លែងវេចខ្ចប់នាំចេញ ដោយខ្លាចខូចកេរ្តិ៍ឈ្មោះទុរេនរបស់ប្រទេស

បានផុស

១ ខែ មុន

នៅ

ថ្ងៃពុធ ៦ ឧសភា ២០២៦

ដោយ

អាជ្ញាធរថៃ បានរឹបអូសទុរេនខ្ចីជាង ១,៥ តោន ពីកន្លែងវេចខ្ចប់មួយនៅខេត្តចន្ទបុរី ក្នុងកិច្ចប្រឹងប្រែងទប់ស្កាត់ការនាំចេញផ្លែឈើដែលមានគុណភាពអន់ ហើយបំផ្លាញកេរ្តិ៍ឈ្មោះរបស់ប្រទេសថៃ។ នេះបើតាមការចុះផ្សាយរបស់កាសែត The Nation កាលពីថ្ងៃចន្ទ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្ត្រីថៃនិយាយថា ប្រតិបត្តិការបង្រ្កាប ដែលចូលរួមដោយភ្នាក់ងារសន្តិសុខ និងអាជ្ញាធរកសិកម្ម បានកំណត់គោលដៅលើកន្លែងរៀបចំ និងនាំចេញផ្លែទុរេន នៅទីតាំងជាច្រើន រួមទាំងស្រុក Tha Mai និងទីរួមខេត្តចន្ទបុរី។

នៅទីតាំងមួយកន្លែង ក្រុមអាជ្ញាធរបានរកឃើញផ្លែទុរេនដែលគេវេចខ្ចប់ដាក់ក្នុងប្រអប់រួច ហើយរង់ចាំការដឹកចេញ។ ការធ្វើតេស្តចៃដន្យបានបង្ហាញថា ផ្លែទុរេនក្នុងប្រអប់នោះ មិនបានបំពេញតាមស្តង់ដារអត្រាស្ងួត ដែលវាមានន័យថា វាមិនទាន់ទុំស្រួលបួល។

អាជ្ញាធរបានបញ្ជាឱ្យបើកប្រអប់ចំនួន ៣៥០ ក្នុងទម្ងន់សរុប ៧ តោន ដើម្បីត្រួតពិនិត្យ ហើយបានរកឃើញទុរេនមិនទាន់ទុំចំនួន ៥២៩ ផ្លែ ក្នុងទម្ងន់សរុបចូលគ្នា ១,៥ តោន។ ក្រោយការរកឃើញនេះ អាជ្ញាធរបានចេញការព្រមានជាផ្លូវការមួយដល់ប្រតិបត្តិករកន្លែងចាប់បាននោះ ដោយបញ្ជាក់ថា ការរំលោភបំពានម្តងហើយម្តងទៀត អាចនាំឱ្យមានការព្យួរអាជ្ញាប័ណ្ណនាំចេញរយៈពេលពី ៣០ ទៅ ៩០ ថ្ងៃ ឬអាចនឹងដកហូតតែម្ដង។

មន្ត្រីថៃបានសង្កត់ធ្ងន់លើសារៈសំខាន់នៃការគ្រប់គ្រងគុណភាពយ៉ាងតឹងរ៉ឹង ដោយព្រមានអ្នកនាំចេញមិនឱ្យដាក់ផ្លែទុរេនមិនទាន់ទុំ ឬខូច រួមទាំងផ្លែឈើដែលរងផលប៉ះពាល់ដោយព្យុះ ចូលទៅក្នុងខ្សែច្រវ៉ាក់នាំចេញឡើយ។

មែនទែនទៅ ការបង្រ្កាបរបស់អាជ្ញាធរថៃ គឺជាផ្នែកមួយនៃកិច្ចខិតខំប្រឹងប្រែងដើម្បីការពារស្តង់ដារកសិកម្មរបស់ថៃ និងរក្សាទំនុកចិត្តលើការនាំចេញផ្លែឈើរបស់ខ្លួន ជាពិសេសនៅក្នុងទីផ្សារសំខាន់ៗនៅក្រៅប្រទេស ដូចជាចិន ចំពេលដែលរដូវប្រមូលផលធំចូលមកដល់នៅខែឧសភានេះ។

កាលពីឆ្នាំមុន ការនាំចេញទុរេនរបស់ថៃបានជួបនៅបញ្ហាក្រោយអាជ្ញាធរចិនរកឃើញសារធាតុហាមឃាត់បង្កជំងឺមហារីក ដែលធ្វើឱ្យថៃរឹងបន្តឹងលើគុណភាពទុរេនដើម្បីរក្សាកេរ្តិ៍ឈ្មោះ៕