សេដ្ឋកិច្ច

អ្នកឧកញ៉ា ហ៊ុន តូ ច្រានចោលព័ត៌មានមិនពិតថា លោកជាម្ចាស់ក្រុមហ៊ុន ហួយវ័ន

បានផុស

២ ខែ មុន

នៅ

ថ្ងៃពុធ ៦ ឧសភា ២០២៦

ដោយ

អ្នកឧកញ៉ា ហ៊ុន តូ នៅថ្ងៃទី ០៦ ឧសភា ២០២៦ បានច្រានចោលព័ត៌មានមិនពិតថា រូបលោកជាម្ចាស់ក្រុមហ៊ុន ហួយវ័ន ផេ (HUIONE PAY PLC.) ខណៈដែលអតិថិជនបានផ្ទុះការតវ៉ានៅទីស្នាក់ការរបស់ធនាគារជាតិនៃកម្ពុជានាពេលថ្មីៗកន្លងទៅនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការច្រានចោលរបស់អ្នកឧកញ៉ា ហ៊ុន តូ កើតមានឡើងបន្ទាប់ពីមានសារព័ត៌មានមួយចំនួនបានផ្សព្វផ្សាយព័ត៌មានក្នុងបណ្តាញសង្គមថា រូបលោកមានការពាក់ព័ន្ធជាមួយនឹងក្រុមហ៊ុន ហួយវ័ន ផេ ម.ក (HUIONE PAY PLC.) ដែលជាគ្រឹះស្ថានដក និងដាក់ប្រាក់ និងថាលោកជាថៅកែធំរបស់ក្រុមហ៊ុននេះ ដោយបានប្រមូលផ្តុំធ្វើបាតុកម្មតវ៉ាឱ្យរូបលោកចេញមុខដោះស្រាយ។

អ្នកឧកញ៉ា ហ៊ុន តូ បានបញ្ជាក់ថា កន្លងមករូបលោកពិតជាមានភាគហ៊ុននៅក្នុងក្រុមហ៊ុន ហួយវ័ន ផេ ចំនួន ៣០% នៅក្នុងលក្ខន្តិកៈ និងបទបញ្ជាផ្ទៃក្នុងរបស់ក្រុមហ៊ុន ដែលទទួលស្គាល់ដោយក្រសួងពាណិជ្ជកម្មក្នុងឆ្នាំ ២០២០។ ប៉ុន្តែផ្អែកលើជំពូក២ ចែងអំពីដើមទុន-ភាគហ៊ុន និងប្រការ៩ ស្តីពីការបង់ប្រាក់ភាគហ៊ុន អ្នកឧកញ៉ាបានបាត់បង់សិទ្ធិចាត់ចែងការងារទូទៅក្នុងនាមជាម្ចាស់ភាគហ៊ុន ៣០% នេះ តាំងពីចាប់ផ្តើមដំណើរការក្រុមហ៊ុនដំបូងពីឆ្នាំ២០២០ មកម៉្លេះ ដោយសារតែអ្នកឧកញ៉ា មិនបានបង់ប្រាក់សុទ្ធចំនួន ៣០% ដែលជាចំណែកភាគហ៊ុនរបស់អ្នកឧកញ៉ា ចូលទៅក្នុងក្រុមហ៊ុនសម្រាប់បើកដំណើរការប្រតិបត្តិការរបស់ក្រុមហ៊ុន ដោយមូលហេតុ ក្រុមហ៊ុនមិនបានបែងចែកសិទ្ធិអំណាច ឬសិទ្ធិសម្រេចកិច្ច ការងារក្នុងក្រុមហ៊ុន ដើម្បីឱ្យខ្ញុំទទួលខុសត្រូវ ជាពិសេស សិទ្ធិលើការគ្រប់គ្រងចំណូល ចំណាយ និងប្រតិបត្តិការប្រចាំថ្ងៃរបស់ក្រុមហ៊ុន។

អ្នកឧកញ៉ា ហ៊ុន តូ បានបន្ថែមថា៖ «ខ្ញុំមិនដែលទទួលបានការអញ្ជើញឱ្យចូលរួមគ្រប់កិច្ចប្រជុំ ឬមហាសន្និបាត នៃម្ចាស់ ភាគហ៊ុននោះទេ ហើយខ្ញុំមិនធ្លាប់បានចាត់តំណាង ឬតែងតាំងអាណត្តិគាហករួមណាម្នាក់ធ្វើជាតំណាង ភាគហ៊ុន នៅក្នុងក្រុមហ៊ុនដូចដែលបានកំណត់ក្នុងប្រការ១២ ជំពូក២ នៃលក្ខន្តិកៈ និងបទបញ្ជាផ្ទៃក្នុងក្រុមហ៊ុននោះឡើយ»។

អ្នកឧកញ៉ា ហ៊ុន តូ មិនធ្លាប់ទទួលបានប្រាក់ចំណេញ ប្រាក់ភាគលាភ និងទ្រព្យសកម្មបន្តិចណាសោះពីក្រុមហ៊ុននោះឡើយ ហើយក៏មិនធ្លាប់បានចូលរួមបោះឆ្នោតក្នុងកិច្ចប្រជុំ និងចូលរួមអនុម័តកិច្ចការផ្សេងៗរបស់ក្រុមហ៊ុននោះឡើយ ចំណែកឯព័ត៌មានពីប្រតិបត្តិការអ្វីទាំងអស់ពីក្រុមហ៊ុន អ្នកឧកញ៉ា មិនធ្លាប់បានទទួលបានព័ត៌មាន។

នៅថ្ងៃទី១ ខែតុលា ឆ្នាំ២០២៥ ក្រុមហ៊ុនជម្រះបញ្ជី រីចន៍ & ផាតនើរ (REACHS & Partners Co.,Ltd.) បានបញ្ចប់ការជម្រះបញ្ជី និងបានចេញរបាយការណ៍ចុងក្រោយ ស្តីពីការជម្រះបញ្ជីគ្រឹះស្ថានផ្តល់សេវាទូទាត់សងប្រាក់ ហួយវ័ន ផេ ដោយបានបញ្ជាក់ពីការបញ្ចប់ទាំងស្រុងអំពីការជម្រះបញ្ជីរវាងម្ចាស់បំណុលជាមួយគ្រឹះស្ថាន ផ្តល់សេវាទូទាត់សងប្រាក់ ហួយវ័ន ផេ។

ក្រោយពីធ្វើការ នៅក្នុងរបាយការណ៍ចុងក្រោយរបស់ក្រុមហ៊ុនជម្រះបញ្ជីបានបញ្ជាក់ថា ទូទាត់សងម្ចាស់បំណុលរួចរាល់អស់ហើយ គ្រឹះស្ថាន ហួយវ័ន ផេ នៅសល់សាច់ប្រាក់សុទ្ធចំនួនជាង ១,១ លានដុល្លារ (១.១៨៩.២៣៥,៥១) និងបានធ្វើការបែងចែកប្រាក់ ដែលនៅសេសសល់នេះជូនម្ចាស់ភាគហ៊ុនពិតប្រាកដដែលទទួលខុសត្រូវក្នុងប្រតិបត្តិការរបស់ក្រុមហ៊ុនកន្លងមក។

អ្នកឧកញ៉ា មិនមានចំណែកក្នុងការទទួលប្រាក់ដែលសល់ក្រោយពីជម្រះបញ្ជីនោះទេ ដោយសារតែលោកមិនមែនជាម្ចាស់ភាគហ៊ុនដែលបានពាក់ព័ន្ធជាមួយប្រតិបត្តិការក្រុមហ៊ុនកន្លងមក (ដូចមានក្នុងរបាយការណ៍ជម្រះបញ្ជីចុងក្រោយភ្ជាប់មកជាមួយ)។

អ្នកឧកញ៉ា បញ្ជាក់ថា ចំពោះគ្រឹះស្ថានផ្តល់សេវាទូទាត់សងប្រាក់ H-PAY SERVICE PLC. លោក មិនមានភាគហ៊ុន ឬពាក់ព័ន្ធក្នុងក្រុមហ៊ុននោះឡើយ។

សេចក្តីបំភ្លឺនេះ ជាភស្តុតាង ដែលបញ្ជាក់ការពិត អំពីការមិនពាក់ព័ន្ធកិច្ចការផ្ទៃក្នុងរបស់ក្រុមហ៊ុន ហួយវ័ន ផេ ដើម្បីកុំអោយមានការយល់ច្រឡំមកលើរូបលោកថា ជាម្ចាស់របស់ក្រុមហ៊ុន ហួយវ័ន ផេ បន្តទៅទៀត។ អ្នកឧកញ៉ាថា នឹងសហការយ៉ាងពេញលេញ ជាមួយអាជ្ញាធរគ្រប់លំដាប់ថ្នាក់ដែលពាក់ព័ន្ធ និងត្រៀមផ្តល់ឯកសារ ឬភស្តុតាងនានា តាមដែលច្បាប់តម្រូវ។

ពាក់ព័ន្ធនឹងបញ្ហានេះ ធនាគារជាតិនៃកម្ពុជា បញ្ជាក់ថា ដំណោះស្រាយឱ្យប្រជាពលរដ្ឋដែលបានធ្វើបាតុកម្មតវ៉ារបស់ក្រុមហ៊ុន ហួយវ័ន ហួសដែនសមត្ថកិច្ចរបស់ធនាគារជាតិកម្ពុជា។

លោកស្រី ជា សិរី ទេសាភិបាលធនាគារជាតិនៃកម្ពុជា បានបញ្ជាក់កាលពីពេលថ្មីៗនេះថា ធនាគារជាតិ ប្រកាន់ភ្ជាប់ទៅនឹងផលប្រយោជន៍របស់អតិថិជន ក្នុងការដោះស្រាយបញ្ហាដោយសន្តិវិធី នៅពេលដែលយើងបានឃើញមានការតវ៉ានេះ ធនាគារជាតិជាតិជំរុញឱ្យអតិថិជនទាំងនោះប្រើសិទ្ធិតាមយន្តការតុលាការ៕

Related Topics:ក្រុមហ៊ុន ហួយវ័ន