ធនាគារ ប្រៃសណីយ៍កម្ពុជា ស្ថិតក្នុងចំណោមសហគ្រាសបង់ពន្ធច្រើនជាងគេប្រចាំឆ្នាំ ២០២៥ ក្នុងលិខិតសរសើររបស់នាយករដ្ឋមន្រ្តី

ធនាគារ ប្រៃសណីយ៍កម្ពុជា ដែលជាធនាគារពាណិជ្ជក្នុង​ស្រុក​ឈានមុខគេមួយរបស់​កម្ពុជា និង​ជាធនាគាររបស់ខ្មែរ១០០% បានទទួលលិខិតសរសើរពីសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដោយកោតសរសើរសម្រាប់ការរួមចំណែកដ៏សំខាន់របស់ធនាគារ ក្នុងនាមជាសហគ្រាសដែលបានបង់ពន្ធច្រើនជាងគេ ជាប់ចំណាត់ថ្នាក់ទី ២៩ ប្រចាំឆ្នាំ ២០២៥ ព្រមជាមួយវិញ្ញាបនបត្រអនុលោមភាពសារពើពន្ធ ប្រភេទ “មាស” ពីអគ្គនាយកដ្ឋានពន្ធដារ។

ការទទួលស្គាល់ដ៏ខ្ពង់ខ្ពស់នេះ សបញ្ជាក់ឱ្យឃើញពីការប្តេជ្ញាចិត្តយ៉ាងមុតមាំរបស់ធនាគារ ប្រៃសណីយ៍កម្ពុជា ក្នុងអភិបាលកិច្ចពន្ធសាជីវកម្ម ប្រកបដោយតម្លាភាព និងការអនុលោមយ៉ាងខ្ជាប់ខ្ជួនតាមកាតព្វកិច្ច និងបទប្បញ្ញត្តិពន្ធដាររបស់កម្ពុជា។  តាមរយៈការបំពេញ និងការអនុវត្តលើស្តង់ដារជាតិជាបន្តបន្ទាប់ ធនាគារ​ប្រៃសណីយ៍កម្ពុជា បានបង្ហាញពីតួនាទីដ៏សំខាន់របស់ខ្លួនក្នុងនាមជាសហគ្រាសដែលមានការទទួលខុសត្រូវខ្ពស់ និងជាដៃគូជាទីទុកចិត្តបំផុតមួយក្នុងការអភិវឌ្ឍសេដ្ឋកិច្ចកម្ពុជាប្រកបដោយនិរន្តរភាព។

ប្រសាសន៍ក្នុងលិខិតសរសើរដែលមានប្រថាប់ត្រា និងហត្ថលេខារបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានថ្លែងថា “ខ្ញុំសូមថ្លែងអំណរគុណ និងកោតសរសើរដោយស្មោះអស់ពីដួងចិត្តជូនចំពោះ លោក-លោកស្រី នាយកធនាគារ ដែលបានចូលរួមចំណែកក្នុងការបំពេញកាតព្វកិច្ចបង់ពន្ធដារផ្ទៃក្នុងជូនរដ្ឋ និងជាសហគ្រាសជាប់ចំណាត់ថ្នាក់លេខ ២៩ ក្នុងចំណោមសហគ្រាសដែលបានបង់ពន្ធច្រើនជាងគេ និងទទួលបានអនុលោមភាពសារពើពន្ធប្រភេទមាស ក្នុងឆ្នាំ២០២៥។ ការបំពេញកាតព្វកិច្ចបង់ពន្ធរបស់សហគ្រាសលោក-លោកស្រី គឺជាការរួមចំណែកដែលមិនអាចខ្វះបានពីវិស័យឯកជនដែលជាដៃគូដ៏សំខាន់របស់រដ្ឋ និងជាកម្លាំងចលករសម្រាប់ការអភិវឌ្ឍនិងរីកលូតលាស់នៃសេដ្ឋកិច្ច និងសង្គមជាតិកម្ពុជា។”

ការទទួលស្គាល់នេះ ក៏បានផ្អែកលើកំណត់ត្រាដ៏ល្អប្រសើរនៃការអនុលោមភាពរបស់ធនាគារ ប្រៃសណីយ៍កម្ពុជា​ ផងដែរ។ កាលពីពេលថ្មីៗនេះ ធនាគារទទួលបាន  វិញ្ញាបនបត្រ អនុលោមភាពសារពើពន្ធ ប្រភេទ “មាស” ពី អគ្គនាយកដ្ឋានពន្ធដារ សម្រាប់ឆ្នាំជាប់ពន្ធ ២០២៥ – ២០២៦។ នេះជា វិញ្ញាបនបត្រទីប្រាំមួយ ជាប់ៗគ្នា របស់ ធនាគារ ប្រៃសណីយ៍កម្ពុជា​ ដែលគូសបញ្ជាក់ពីឧត្តមភាពរបស់ធនាគារក្នុងការអនុលោមតាមបទប្បញ្ញត្តិពន្ធដារ ៕