សេដ្ឋកិច្ចថៃធ្លាក់ចុះកាន់តែខ្លាំង ខណៈសង្រ្គាមមជ្ឈិមបូព៌ា និងអតិផរណាបន្ថែមសម្ពាធ​

សេដ្ឋកិច្ចរបស់ប្រទេសថៃកំពុង​ប្រឈមនឹង​សម្ពាធកាន់តែខ្លាំងឡើងៗ​ ខណៈ​ការអូសបន្លាយនៃជម្លោះនៅមជ្ឈិមបូព៌ា​ធ្វើឱ្យតម្លៃថាមពលហក់ឡើង ​​ហើយ​ការចំណាយរបស់អ្នកប្រើប្រាស់ចុះខ្សោយ ​​ដែល​​បង្ខំឱ្យអាជីវកម្មកាត់បន្ថយការងារ ចំពេលមានការភ័យខ្លាចថាសេដ្ឋកិច្ចអាច​ធ្លាក់ចុះកាន់តែធ្ងន់ធ្ងរ។ នេះបើតាមការចុះផ្សាយរបស់កាសែតបាងកកប៉ុស្តិ៍។

ការពឹងផ្អែក​ខ្លាំងពេករបស់ថៃ លើ​​ការនាំចូលប្រេង និងឧស្ម័នធម្មជាតិពីមជ្ឈិមបូព៌ា បានធ្វើឱ្យក្រុមហ៊ុនផលិតនានា ជួបការលំបាក​នៅពេលថ្លៃប្រេងឥន្ធនៈ និងវត្ថុធាតុដើមកើនឡើង​។ ស្ថាប័ន និង​អ្នកជំនាញសេដ្ឋកិច្ចបាន​ព្រមានថា អតិផរណាអាចនឹង​កើនឡើង ​ហើយ​កំណើនសេដ្ឋកិច្ចនឹង​ចុះខ្សោយបន្ថែមទៀត ដែលបង្កើតជាល្បាយដ៏គ្រោះថ្នាក់សម្រាប់គ្រួសារ និងអាជីវកម្មថៃ​។

មជ្ឈមណ្ឌលស្រាវជ្រាវ Kasikorn (K-Research) បាន​​រំពឹង​ថា អតិផរណាអាចកើនឡើងដល់ ៥-៦% នៅឆ្នាំនេះ ប្រសិនបើជម្លោះនៅតែបន្ត ខណៈ​ស្ថាប័នជំនាញដដែល បាន​កាត់បន្ថយការព្យាករកំណើនសេដ្ឋកិច្ចថៃពី ១,៩% មកត្រឹម ១,២% ហើយ​ព្រមានអំពីហានិភ័យនៃកំណើន​វិបត្តិសេដ្ឋកិច្ច​ និង Stagflation (កំណើនសេដ្ឋកិច្ចជាប់គាំង ​ខណៈ​អតិផរណា និងអត្រាគ្មានការងារធ្វើខ្ពស់)។ ​

លោក Burin Adulwattana នាយកគ្រប់គ្រង និងជាប្រធានសេដ្ឋវិទូនៅ K-Research បាន​ថ្លែងថា៖ «ក្រុមហ៊ុនផលិតមានជម្រើសតិចតួចណាស់ ​ដោយត្រូវតែបន្តទិញវត្ថុធាតុដើមក្នុងតម្លៃខ្ពស់ ពីព្រោះពួកគេខ្លាចថា ការផ្គត់ផ្គង់នឹងអស់»។

ភាពតានតឹងផ្នែកសេដ្ឋកិច្ច កំពុងរីករាលដាលពាសពេញឧស្សាហកម្ម។ អាជីវកម្មខ្នាតតូច ភោជនីយដ្ឋាន និងប្រតិបត្តិករទេសចរណ៍បាន​និយាយថា ការចំណាយរបស់អ្នកប្រើប្រាស់បានធ្លាក់ចុះយ៉ាងខ្លាំង ខណៈ​ការចំណាយ​សម្រាប់​ការរស់នៅប្រចាំថ្ងៃបាន​កើនឡើង។ ក្រុមហ៊ុនទេសចរណ៍មួយចំនួនបានបិទប្រតិបត្តិការជាបណ្ដោះអាសន្ន ខណៈ​ក្រុមហ៊ុនផ្សេងៗទៀត បានកាត់បន្ថយបុគ្គលិកដើម្បី​បន្តប្រតិបត្តិការ​។

បាងកកប៉ុស្តិ៍បានផ្សាយថា ការបញ្ឈប់​បុគ្គលិកពីការងារ​កំពុងចាប់ផ្តើមកើនឡើង ខណៈ​ក្រុមហ៊ុន​ត្រូវប្រឈមមុខនឹង​ការធ្លាក់ចុះនៃប្រាក់ចំណេញ​ និងលក្ខខណ្ឌនៃការផ្តល់ប្រាក់កម្ចីកាន់តែតឹងរ៉ឹង ដោយ​ ធនាគារផ្សេងៗ កំពុងមានការប្រុងប្រយ័ត្នកាន់តែខ្លាំង​អំពីការចេញប្រាក់កម្ចី ជាពិសេសដល់សហគ្រាសធុនតូច និងមធ្យម (SMEs)។

ដោយឡែក​ធនាគារកណ្តាលថៃឯណោះវិញ បានបន្ទាប​ការ​ព្យាករកំណើនថៃឆ្នាំ ២០២៦ ​មកត្រឹម ១,៥% ​ហើយព្រមានថា អតិផរណាអាចលើសពីកម្រិតគោលដៅរបស់ខ្លួន ដោយសារតែតម្លៃប្រេងកើនឡើងខ្ពស់​ជាប់ទាក់ទងនឹងសង្គ្រាមនៅមជ្ឈិមបូព៌ា​។

ជាការឆ្លើយតប រដ្ឋាភិបាលរបស់លោកនាយករដ្ឋមន្រ្តី អានុទីន ឆានវីរៈគុណ កាលពីដើមខែឧសភានេះ​ បាន​​ប្រកាសពីកញ្ចប់ប្រាក់កម្ចីសង្គ្រោះបន្ទាន់ចំនួន ៤០០ ​ប៊ីលានបាត ឬប្រហែល ១២,២៦ ប៊ីលាន​ដុល្លារ​ ​ក្នុង​គោលបំណងជំរុញសេដ្ឋកិច្ច និងគាំទ្រផែនការផ្លាស់ប្តូរថាមពលរយៈពេលវែង។ កញ្ចប់នេះត្រូវបានបែងចែកជា ២ ផ្នែក៖ ២០០ ​ប៊ីលានបាតសម្រាប់វិធានការស្តារសេដ្ឋកិច្ចឡើងវិញ រួមទាំងកម្មវិធីជំរុញការប្រើប្រាស់ក្នុងស្រុក «ថៃជួយថៃបូក» (Thai Chuay Thai Plus) និង ២០០ ​ប៊ីលានបាតទៀតសម្រាប់គម្រោងថាមពលស្អាត និងថាមពលកកើតឡើងវិញ។

យ៉ាងណាមិញ កញ្ចប់កម្ចីនេះ ទទួលបានការរិះគន់ពីអ្នកសេដ្ឋកិច្ច និងក្រុមឧស្សាហកម្ម ដែលមានការព្រួយបារម្ភអំពីកំណើន​បំណុលសាធារណៈ​របស់​ថៃ ដែល​រំពឹងថានឹងខិតទៅជិត​ «ពិដានកំណត់របស់រដ្ឋាភិបាល» ប្រមាណ ៧០% នៃ GDP (ផលិតផលក្នុងស្រុកសរុប)។

ជាមួយគ្នានោះផងដែរ សហព័ន្ធឧស្សាហកម្មថៃ (FTI) បាននិយាយថា SMEs ថៃ ត្រូវការការគាំទ្រផ្នែកហិរញ្ញវត្ថុជាបន្ទាន់ ដោយសារបញ្ហាសាច់ប្រាក់កាន់តែអាក្រក់ទៅៗ។ ​មែនទែនទៅ SMEs រួមចំណែកជាង ៩០% នៃសមាជិក FTI និង​ប្រហែល ៣០​% នៃ​សេដ្ឋកិច្ចថៃក្នុងទំហំ ៥,៧ ទ្រីលាន​បាត​។

​ទោះបីបែបនេះក្ដី អ្នកសេដ្ឋកិច្ចនៅវិទ្យាស្ថានស្រាវជ្រាវអភិវឌ្ឍន៍ថៃឯណោះវិញ បានអះអាងថា ជម្លោះនៅមជ្ឈិមបូព៌ា​ជាកត្តាជំរុញអតិផរណាដ៏ធំបំផុត ជាជាង​ការចំណាយរបស់រដ្ឋាភិបាល។ ប្រសិន​បើ​សង្គ្រាម​នៅតែបន្ត ហើយថ្លៃថាមពលបន្តកើនឡើង អ្នកវិភាគព្រមានថា ​ថៃអាចប្រឈមមុខនឹងការបិទអាជីវកម្មកាន់តែច្រើន ការប្រើប្រាស់ក្នុងស្រុកចុះខ្សោយ និងអត្រាគ្មានការងារធ្វើកើនឡើងយ៉ាងឆាប់រហ័ស​នារយៈពេលប៉ុន្មានខែខាងមុខ៕