សេដ្ឋកិច្ច

កម្ពុជានាំចេញទៅអាមេរិកបានជាង ៥ ពាន់លានដុល្លារ កើនឡើង ៣១% ក្នុងរយៈពេល ៥ ខែឆ្នាំនេះ

បានផុស

៣ នាទី មុន

នៅ

ថ្ងៃពុធ ១០ មិថុនា ២០២៦

ដោយ

កម្ពុជានាំទំនិញចេញទៅសហរដ្ឋអាមេរិកសម្រេចបាននូវទំហំទឹកប្រាក់ជាង ៥,៧៣ ពាន់លានដុល្លារ នៅក្នុងរយៈពេល ៥ ខែ ២០២៦ កើនឡើង ៣១,៥% ធៀបនឹងរយៈពេលដូចគ្នា កាលពីឆ្នាំមុន ដែលមានទំហំ ៤,៣ ពាន់លានដុល្លារ។ នេះបើយោងតាមទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា (GDCE)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមទិន្នន័យរបស់ GDCE គិតចាប់ពីខែមករា ដល់ខែឧសភា ២០២៦ ទំហំពាណិជ្ជកម្មទ្វេភាគីកម្ពុជា-សហរដ្ឋអាមេរិកសម្រេចបានជិត ៦ ពាន់លានដុល្លារ កើនឡើង ៣៣,២% ក្នុងនោះកម្ពុជា នាំទំនិញចេញទៅសហរដ្ឋអាមេរិកមានតម្លៃជាង ៥,៧៣ ពាន់លានដុល្លារ កើនឡើង ៣១,៥% ចំណែកឯសហរដ្ឋអាមេរិកនាំចូលមកវិញមានតម្លៃ ២៣១ លានដុល្លារ កើន ៩២,៥%។

ទំនិញដែលកម្ពុជានាំចេញទៅសហរដ្ឋអាមេរិកមានដូចជា សម្លៀកបំពាក់ សម្ភារធ្វើដំណើរ កង់ និងសម្ភារប្រើប្រាស់មួយចំនួនទៀត។ ចំណែកឯអាមេរិកនាំចូលមកវិញ មានដូចជារថយន្ត គ្រឿងយន្ត គ្រឿងអលង្ការ គ្រឿងសំអាង សម្ភារអគ្គិសនី អេឡិចត្រូនិក និងសម្ភារប្រើប្រាស់មួយចំនួនទៀត។

អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា ប្រាប់កម្ពុជាថ្មីនៅថ្ងៃពុធ ទី ១០ ខែមិថុនា ២០២៦នេះថា ការនាំចេញទៅសហរដ្ឋអាមេរិកមានសញ្ញាវិជ្ជមានល្អកន្លងមក ប៉ុន្តែក៏យើងមានការព្រួយបារម្ភដែរថា តើការដាក់បន្ទាត់ពន្ធថ្មីរបស់អាមរិក មានវិសាលភាពដូចដែលយើងកំពុងអនុវត្ត ១០% ទាំងអស់គ្នាទូទាំងពិភពលោក ក្នុងការនាំទំនិញទៅអាមេរិកឬយ៉ាងណា។

លោក ប៉ែន សុវិជាតិ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម មានប្រសាសន៍ថា កម្ពុជាបន្តរក្សាបាននូវទីផ្សារសហរដ្ឋអាមេរិក ដែលជាទីផ្សារធំមួយសម្រាប់ការនាំចេញសម្លៀកបំពាក់ វាយនភណ្ឌ ស្បែកជើង សម្ភារធ្វើដំណើររបស់កម្ពុជា។

លោកឧបនាយករដ្ឋមន្ត្រី ស៊ុន ចាន់ថុល អនុប្រធានទី១ក្រុមប្រឹក្សាអភិវឌ្ឍន៍កម្ពុជា មានប្រសាសន៍ថា កម្ពុជាជាប្រទេសទី១ ដែលបានចុះហត្ថលេខាលើកិច្ចព្រមព្រៀងពាណិជ្ជកម្មបដិការជាមួយសហរដ្ឋអាមេរិក កាលពីថ្ងៃទី ២៦ តុលា ២០២៥។

លោក ស៊ុន ចាន់ថុល បន្ថែមថា៖ «យើងនៅតែមានលទ្ធភាពក្នុងការចរចាជាមួយសហរដ្ឋអាមេរិក ធ្វើយ៉ាងណាប្រើប្រាស់លទ្ធផលនៃកិច្ចព្រមព្រៀងពាណិជ្ជកម្មបដិការ ដែលបានសម្រេចកន្លងមក ជាមូលដ្ឋានក្នុងការកំណត់អត្រាពន្ធគយថ្មីៗនៅពេលខាងមុខ មិនឱ្យខ្ពស់ជាងអត្រាពន្ធ១៩% ដែលយើងទទួលបានលើកិច្ចព្រមព្រៀងពាណិជ្ជកម្មបដិការជាមួយសហរដ្ឋអាមេរិក»។

យោងតាមក្រសួងពាណិជ្ជកម្ម នៅក្នុងឆ្នាំ ២០២៥ ទំហំពាណិជ្ជកម្មទ្វេភាគីកម្ពុជា-អាមេរិក សម្រេចបានជាង ១៣,១៤ ពាន់លានដុល្លារ កើនឡើង ២៩,២៤% ក្នុងនោះ កម្ពុជានាំចេញទៅអាមេរិក មានតម្លៃ ១២,៧៣ ពាន់លានដុល្លារ កើនឡើង២៨,៤៨% ចំណែកអាមេរិកនាំចូលមកវិញមានតម្លៃ ៤១៧ លានដុល្លារ កើនឡើង ៥៧,៨៣%៕

អត្ថបទ៖ ឡេង ដេត

Related Topics:ពាណិជ្ជកម្មទ្វេភាគីកម្ពុជា-អាមេរិក

សេចក្ដីជូនដំណឹង៥ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា