សេដ្ឋកិច្ច

កម្ពុជានាំចេញទំនិញទៅអាមេរិកជាង $៤,៣៥ ពាន់លាន រយៈពេល ៥ ខែ ឆ្នាំនេះ

បានផុស

១ year មុន

នៅ

ថ្ងៃពុធ ១១ មិថុនា ២០២៥

ដោយ

នៅក្នុងរយៈពេល ៥ ខែ (មករា-ឧសភា) ឆ្នាំ ២០២៥ កម្ពុជាបាននាំចេញទំនិញទៅកាន់ទីផ្សារសហរដ្ឋអាមេរិក មានទឹកប្រាក់ចំនួន ៤,៣៥ ពាន់លានដុល្លារ កើនឡើង ២៧% ធៀបនឹងរយៈពេលដូចគ្នាកាលពីឆ្នាំមុន ដែលមានទំហំ ៣,៤២ ពាន់លានដុល្លារ។ នេះបើយោងតាមអគ្គនាយកដ្ឋានគយ និងរដ្ឋាករកម្ពុជា (GDCE) ចេញផ្សាយនៅថ្ងៃទី ១០ ខែមិថុនា ឆ្នាំ ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទិន្នន័យរបស់ GDCE បង្ហាញថា ចាប់ពីខែមករា ដល់ខែឧសភា ឆ្នាំ ២០២៥ ការនាំចេញទំនិញរបស់កម្ពុជាទៅសហរដ្ឋអាមេរិក មានទំហំទឹកប្រាក់ ៤,៣៥ ពាន់លានដុល្លារ កើន ២៧% ចំណែកឯការ នាំទំនិញចូលមកវិញមានទំហំទឹកប្រាក់ ១២០ លានដុល្លារ កើន ២៥,៦%។

អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា ប្រាប់កម្ពុជាថ្មីនៅថ្ងៃទី ១០ ខែមិថុនា ថា តាមរយៈទិន្នន័យខាងលើការនាំចេញរបស់កម្ពុជាទៅអាមេរិកនៅតែមានភាពវិជ្ជមាន ខណៈកម្ពុជា-អាមេរិកកំពុងចរចារលើពន្ធបដិការដែលបានដាក់ចេញដោយរដ្ឋបាលរបស់លោក ដូណាល់ ត្រាំ។

អ្នកឧកញ៉ា លឹម ហេង មានប្រសាសន៍ថា៖ «ពន្ធបដិការរបស់អាមេរិក កាលណាមិនទាន់បានអនុវត្តទេ យើងមិនអាចសន្និដ្ឋានបានទេ ព្រោះអីកាលប៉ះពាល់យ៉ាងណានោះ លុះត្រាតែចេញហើយ ត្រូវអនុវត្តទៀត ក្នុងរយៈពេលណាមួយបានយើងវាយតម្លៃថា ប៉ះពាល់ឬមិនប៉ះពាល់ ក្នុងការផលិតនាំចេញទៅអាមេរិក»។

បើតាមអ្នកឧកញ៉ា លឹម ហេង រង់ចាំការចរចាររវាងថ្នាក់ដឹកនាំរាជរដ្ឋាភិបាលជាមួយអាមេរិករួចហើយ ចាំការអនុវត្ត នោះយើងនឹងអាចវាយតម្លៃបានថា មានអ្វីខ្លះប៉ះពាល់អ្វីខ្លះសម្រាប់អ្នកនាំចេញទៅអាមេរិក។

អ្នកឧកញ៉ា លឹម ហេង បន្ថែមថា៖«វិនិយោគប្រទេសកម្ពុជាយើង មិនមែនសំដៅលើទីផ្សារអាមេរិកតែមួយទេ បើមានការខុសឆ្គងអី វាប៉ះតែអ្នកនាំចេញទៅអាមេរិកទេ បើនាំចេញទៅសហគមន៍អឺរ៉ុប ចិន កូរ៉េអី ដែលយើងមានកិច្ចព្រមព្រៀងពាណិជ្ជកម្មសេរី និង RCEP អីនេះ យើងមិនប៉ះទេ វានឹងមានកំណើនឡើងទៅវិញក៏មានដែរ ដល់ចឹងគម្រោងវិនិយោគទាំងឡាយ គឺគេសម្លឹងឃើញទីផ្សារអន្តរជាតិ គេមិនសម្លឹងឃើញតែទីផ្សារប្រទេសមួយទេ ដែលមកវិនិយោគប្រទេសយើងនេះ»។

យោងតាមក្រសួងពាណិជ្ជកម្ម នៅក្នុងឆ្នាំ ២០២៤ ពាណិជ្ជកម្មទ្វេភាគីកម្ពុជា-អាមេរិកសម្រេចបានទឹកប្រាក់ជាង ១០ ពាន់លានដុល្លារកើនឡើង ១១% ធៀបនឹងឆ្នាំ ២០២៣ ក្នុងនោះ កម្ពុជានាំចេញទំនិញទៅអាមេរិកមានតម្លៃ ៩,៩១ ពាន់លានដុល្លារ កើនឡើង ១១,៤% និងទំនិញអាមេរិកនាំចូលមកកម្ពុជាតម្លៃជាង ២៦៤ លានដុល្លារ កើន ២%។

ទំនិញដែលកម្ពុជានាំចេញទៅអាមេរិកមានដូចជា សម្លៀកបំពាក់ សម្ភារធ្វើដំណើរ កង់ និងសម្ភារប្រើប្រាស់មួយចំនួនទៀត។ ចំណែកអាមេរិកនាំចូលមកវិញ មានដូចជារថយន្ត គ្រឿងយន្ត គ្រឿងអលង្ការ គ្រឿងសំអាង សម្ភារអគ្គិសនី អេឡិចត្រូនិក និងសម្ភារប្រើប្រាស់មួយចំនួនទៀត៕

អត្ថបទ៖ ឡេង ដេត