ប្រេងសាំងបន្តចុះថ្លៃ នៅត្រឹម ៤,៣៥០រៀល ក្នុងមួយលីត្រ និងម៉ាស៊ូត ៤,៨៥០រៀល

ក្រសួងពាណិជ្ជកម្ម បានប្រកាសនៅថ្ងៃទី ២១ ខែ កញ្ញា នេះថា តម្លៃប្រេងសាំងធម្មតា លក់រាយក្នុងសប្តាហ៍នេះ មានតម្លៃ ៤,៣៥០រៀល និងប្រេងម៉ាស៊ូត ៤,៨៥០រៀល ក្នុងមួយលីត្រ ដោយអនុវត្តចាប់ពីថ្ងៃជូនដំណឹងនេះ រហូតដល់ថ្ងៃទី ៣០ ខែកញ្ញា។

យោងតាមតម្លៃថ្មីនេះ មានន័យថា ប្រេងសាំងធម្មតា ចុះថ្លៃ ៥០រៀល ក្នុងមួយលីត្រ ខណៈប្រេងម៉ាស៊ូត ចុះថ្លៃ ៣៥០រៀល។

បច្ចុប្បន្ន ក្រុមហ៊ុនលក់រាយនៅកម្ពុជា ដែលនាំចូលប្រេងឥន្ធនៈ មានដូចជា ក្រុមហ៊ុនតេលា សូគីម៉ិច ប៉ាប៉ា សាវីម៉ិច លឹមឡុង និងក្រុមហ៊ុនមួយចំនួនទៀត។ ចំណែកក្រុមហ៊ុនបរទេស ដែលនាំចូលប្រេងឥន្ធនៈមកស្រុកខ្មែរ រួមមាន ក្រុមហ៊ុនតូតាល់ កាល់តិច និងក្រុមហ៊ុនភីធីធី។ នេះបើតាមការបញ្ជាក់របស់លោក ប៉ែន សុវិជាតិ អ្នកនាំពាក្យក្រសួងពាណិជ្ជកម្ម។ លោកបានបន្ថែមថា ក្រសួងពាណិជ្ជកម្ម ចេញតម្លៃលក់រាយរៀងរាល់ ១០ថ្ងៃម្តង ដើម្បីឆ្លើយតបឱ្យទាន់និន្នាការនៃការប្រែ​ប្រួលថ្លៃប្រេងឥន្ធនៈនៅលើសកលលោក។

សូមបញ្ជាក់ថា បច្ចុប្បន្ន​នេះប្រេងឥន្ធនៈដែលកម្ពុជាប្រើប្រាស់ នាំចូលពីប្រទេសសិង្ហបុរី ថៃ និងវៀតណាម៕