សហរដ្ឋអាមេរិក អាចអស់សាច់ប្រាក់ត្រឹមថ្ងៃទី១ខែមិថុនា

រដ្ឋមន្ត្រីក្រសួងរតនាគារសហរដ្ឋអាមេរិកលោកស្រី Janet Yellen បានព្រមានថា សហរដ្ឋអាមេរិកអាចនឹងអស់សាច់ប្រាក់ត្រឹមថ្ងៃទី០១ខែមិថុនា ប្រសិនបើសភាមិនអាចដំឡើង ឬផ្អាកបំណុល​អតិបរិមាទេនោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការឈានដល់បំណុល​អតិបរិមា មានន័យថា រដ្ឋាភិបាលមិនអាចខ្ចីប្រាក់បានទៀតនោះទេ។

នៅថ្ងៃអង្គារទី០២ខែឧសភា លោកស្រី Yellen បានជំរុញឲ្យសភាធ្វើសកម្មភាព ឲ្យបានឆាប់តាមដែលអាចធ្វើទៅបាន ដើម្បីដោះស្រាយដែនកំណត់បំណុលចំនួន ៣១.៤ទ្រីលានដុល្លារ។

ពាក់ព័ន្ធរឿងនេះដែរ លោកប្រធានាធិបតី ចូ បៃដិន នឹងរៀបចំកិច្ចប្រជុំមេដឹកនាំសភាស្តីអំពីបញ្ហានេះនៅថ្ងៃទី០៩ឧសភា។

គួរបញ្ជាក់ថា បំណុល​អតិបរិមាត្រូវបានដំឡើង ពង្រីក ឬកែសម្រួល ៧៨ដងមកហើយចាប់តាំងពីឆ្នាំ១៩៦០មក។

ក្នុងករណីនេះ សមាជិកសភាមកពីគណបក្សសាធារណរដ្ឋ បានទាមទារឲ្យមានការកាត់បន្ថយការចំណាយ និងផ្លាស់ប្តូរគោលការណ៍មួយចំនួនក្នុងរបៀបវារៈរបស់លោក បៃដិន រួមទាំងកម្មវិធីលើកលែងប្រាក់កម្ចីសិស្សនិស្សិតរបស់គាត់ និងឥណទានពន្ធថាមពលបៃតងផងដែរ ជាថ្នូរនឹងការបោះឆ្នោតដើម្បីដំឡើងបំណុល​អតិបរិមា។

ទោះបីជាយ៉ាងណាក៏ដោយ ​តម្រូវការនេះ បាន​ជំរុញ​ឲ្យ​មាន​ការ​ជំទាស់​ពី​ក្រុម​អ្នក​ប្រជាធិបតេយ្យ​នៅ​ក្នុង​ព្រឹទ្ធសភា និង​ពី​លោក​ប្រធានាធិបតី បៃដិន ផងដែរ​​ ដែល​បាន​និយាយ​កាល​ពី​សប្តាហ៍​មុន​ថា បញ្ហា​នេះ​មិន​អាច​ចរចា​បាន​ឡើយ។

យ៉ាងណាក្តី លោកប្រធានាធិបតីកំពុងរងសម្ពាធកាន់តែខ្លាំងឡើងពីក្រុមធុរកិច្ច រួមទាំងសភាសហរដ្ឋអាមេរិកផងដែរ ដើម្បីឲ្យគាត់ពិភាក្សាអំពីសំណើរបស់គណបក្សសាធារណរដ្ឋ។

ការមិនសងបំណុលតាមសន្យា ដែលនឹងជាលើកដំបូងក្នុងប្រវត្តិសាស្ត្រអាមេរិក អាចប៉ះពាល់ដល់ទីផ្សារហិរញ្ញវត្ថុសកល និងបំផ្លាញសេចក្តីទុកចិត្តនៅសហរដ្ឋអាមេរិកក្នុងនាមជាដៃគូអាជីវកម្មសកល។

អ្នកជំនាញបានព្រមានថា ការមិនសងបំណុលតាមសន្យា ក៏អាចនាំសហរដ្ឋអាមេរិកឈានទៅរកវិបត្តិសេដ្ឋកិច្ច និងនាំទៅរកការកើនឡើងនៃភាពអត់ការងារធ្វើផងដែរ។ នេះក៏មានន័យដែរថា សហរដ្ឋអាមេរិកនឹងមិនអាចខ្ចីប្រាក់ ដើម្បីបើកប្រាក់បៀវត្សរ៍ដល់បុគ្គលិករដ្ឋាភិបាល និងយោធា បាននោះទេ៕

ប្រែសម្រួល៖ Vann Vann

ប្រភព៖ BBC

ចុចអាន៖ ធនាគារ អាមេរិក មួយទៀតអាចនឹងមានវាសនាដូច Silicon Valley