ចិន ​កាត់បន្ថយអត្រាការប្រាក់គោលដើម្បីគាំទ្រសេដ្ឋកិច្ចជាតិ

​ធនាគារជាតិចិននៅថ្ងៃចន្ទនេះបានប្រកាសកាត់បន្ថយអត្រាការប្រាក់កម្ចីគោលដ៏សំខាន់មួយ នៅក្នុងការប៉ុនប៉ងដើម្បីទប់ទល់នឹងការធ្លាក់ចុះនៃកំណើន ក្រោយរោគរាតត្បាតកូវីដ ១៩ នៅក្នុងប្រទេសសេដ្ឋកិច្ចធំបំផុតទី ២ របស់ពិភពលោកមួយនេះ ។

ធនាគារជាតិចិនបញ្ជាក់ថា អត្រាប្រាក់កម្ចីប្រចាំឆ្នាំដែលដើរតួជាគោលសម្រាប់កម្ចីសាជីវកម្មត្រូវបានកាត់បន្ថយពី ៣.៥៥ ភាគរយទៅ ៣.៤៥ ភាគរយ ហើយតាមរយៈការកាត់បន្ថយនេះ គឺមានគោលបំណងលើកទឹកចិត្តឲ្យធនាគារពាណិជ្ជផ្តល់ប្រាក់កម្ចីកាន់តែច្រើន​ក្នុងអត្រាអត្ថប្រយោជន៍ផ្សេងៗ ។

បន្ទាប់ពីកូវីដបានបិទបញ្ចប់ ប្រទេស​ជាច្រើនរំពឹងថា ចិននឹងជួយជំរុញកំណើនសេដ្ឋកិច្ចពិភពលោកឡើងវិញ ប៉ុន្តែការពិតសេដ្ឋកិច្ចចិននាពេលបច្ចុប្បន្នហាក់ផ្ទុយ​ពីការរំពឹងទុកទៅវិញ ។

ទន្ទឹមនោះ ការសម្រេចចិត្តរបស់ធនាគារជាតិចិនក៏កើតមានឡើង ស្របពេលដែលមានបញ្ហាវិបត្តិ​អចលនទ្រព្យនៅក្នុងប្រទេសផងដែរ ដោយក្រុមហ៊ុនអភិវឌ្ឍ​ន៍ធំៗដូចជា Country Garden ​បាននឹងកំពុងជួបប្រទះ​បញ្ហាបំណុលជាច្រើនពាន់លានដុល្លារ ។

គួរបញ្ជាក់ថា ក្រៅ​ពី​បញ្ហា​អចលនទ្រព្យ កំណើនសេដ្ឋកិច្ចចិន​ក៏​ត្រូវ​បាន​រារាំង​ដោយ​ការ​ចំណាយ​របស់ប្រជាពលរដ្ឋ​​ក្នុង​ពេល​ដែល​ភាព​មិន​ប្រាកដប្រជា​ក្នុង​ទីផ្សារ​ការងារ និង​ការ​ធ្លាក់​ចុះ​សេដ្ឋកិច្ច​ពិភពលោកផងដែរ ៕

ប្រែសម្រួល៖ នាង រតនៈ

ប្រភព៖ CNA