សេដ្ឋកិច្ច

ហ្វីលីពីនបន្តគោលនយោបាយមិនយកពន្ធលើរថយន្តអគ្គិសនីរហូតដល់ឆ្នាំ ២០២៨

បានផុស

១១ ខែ មុន

នៅ

ថ្ងៃព្រហស្បតិ៍ ១៦ ឧសភា ២០២៤

ដោយ

គណៈកម្មាធិការសេដ្ឋកិច្ចរបស់រដ្ឋាភិបាលហ្វីលីពីន និយាយនៅថ្ងៃព្រហស្បតិ៍នេះថា ប្រទេសហ្វីលីពីនបានបន្តគោលនយោបាយមិនយកពន្ធលើរថយន្តអគ្គិសនី និងគ្រឿងបន្លាស់រហូតដល់ឆ្នាំ ២០២៨ ក្នុងគោលបំណងកាត់បន្ថយឥន្ធនៈហ្វូស៊ីល និងជំរុញទីផ្សាររថយន្តអគ្គិសនីEV របស់ខ្លួន។ នេះបើតាមការរាយការណ៍របស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គណៈកម្មាធិការដែលដឹកនាំដោយលោកប្រធានាធិបតី ហ្វឺរឌីណង់ ម៉ាកូស ជូនៀរ (Ferdinand Marcos Jr.) ក៏បានពង្រីកបញ្ជីអត្រាពន្ធអនុគ្រោះផងដែរ ដោយរួមបញ្ចូលរថយន្តអគ្គិសនីកូនកាត់ ម៉ូតូអេឡិចត្រូនិក និងកង់អេឡិចត្រូនិក។

លោក ម៉ាកូស បានអនុម័តគោលនយោបាយអនុគ្រោះពន្ធជាលើកដំបូង ក្នុងខែមករា ឆ្នាំ ២០២៣ ដោយកាត់បន្ថយពន្ធលើរថយន្តអគ្គិសនី ដូចជារថយន្តធ្វើដំណើរធម្មតា រថយន្តដឹកទំនិញ និងរថយន្តក្រុង មកត្រឹម ០ ភាគរយ។ ពន្ធនាំចូលពីមុន មានចាប់ពី ៥ ភាគរយ រហូតដល់ ៣០ ភាគរយ។

មេដឹកនាំហ្វីលីពីនដដែល បានដាក់បញ្ចូលថាមពលកកើតឡើងវិញ និងការប្រយុទ្ធប្រឆាំងនឹងការប្រែប្រួលអាកាសធាតុ ជាចំណុចសំខាន់នៃរបៀបវារៈគោលនយោបាយរបស់លោក ដោយលើកកម្ពស់ថាមពលស្អាត ហើយងាកចេញពីឥន្ធនៈហ្វូស៊ីល។ ហ្វីលីពីន ដែលងាយរងគ្រោះនឹងព្រឹត្តិការណ៍ធាតុអាកាសហួសហេតុ មានបំណងកាត់បន្ថយការបំភាយឧស្ម័នផ្ទះកញ្ចក់ចំនួន ៧៥ ភាគរយ នៅត្រឹមឆ្នាំ ២០៣០ ក្រោមការប្តេជ្ញាចិត្តនៃកិច្ចព្រមព្រៀងទីក្រុងប៉ារីសរបស់ខ្លួន។

លេខាធិការផែនការសេដ្ឋកិច្ចលោក Arsenio Balisacan បាននិយាយថា៖ «តាមរយៈការលើកទឹកចិត្តអ្នកប្រើប្រាស់ឱ្យទទួលយករថយន្តអគ្គិសនី យើងកំពុងលើកកម្ពស់មធ្យោបាយដឹកជញ្ជូនដែលស្អាត ធន់ជាងមុន និងកាន់តែល្អសម្រាប់បរិស្ថាន»។

គួរគូសបញ្ជាក់ថា វិស័យរថយន្តរបស់ហ្វីលីពីន ពឹងផ្អែកភាគច្រើនលើប្រេងនាំចូល។ ប្រទេសនេះក៏ទិញប្រេង និងធ្យូងថ្មនៅបរទេស សម្រាប់តម្រូវការផលិតថាមពល ដែលធ្វើឱ្យខ្លួនងាយរងគ្រោះទៅនឹងការប្រែប្រួលតម្លៃផងដែរ៕