សេដ្ឋកិច្ច

ល្បាយប្រជាជនវ័យក្មេង និងពេញធ្វើការច្រើនរបស់ឥណ្ឌា និងឥណ្ឌូណេស៊ី ធ្វើឱ្យប្រទេសទាំង២លេចធ្លោសម្រាប់វិនិយោគិន

បានផុស

១ year មុន

នៅ

ថ្ងៃអង្គារ ២៨ ឧសភា ២០២៤

ដោយ

ប្រទេសទីផ្សារកំពុងលូតលាស់នៅអាស៊ី រួមមានឥណ្ឌា និងឥណ្ឌូណេស៊ី កំពុងលេចធ្លោជាសក្ដានុពលសម្រាប់វិនិយោគិន ក្នុងបរិបទដែលចំនួនប្រជាជននៃប្រទេសទាំង២កើនឡើងក្នុងល្បឿនល្អ ខណៈកត្តាប្រជាសាស្រ្តចាប់ផ្ដើមដើរតួយ៉ាងសំខាន់ក្នុងការសម្រេចចិត្តលើការវិនិយោគផ្សេងៗ។ នេះបើតាមការវិភាគរបស់ក្រុមហ៊ុនផ្ដល់សេវាកម្មហិរញ្ញវត្ថុ Fidelity International និងក្រុមហ៊ុនផ្ដល់ការប្រឹក្សា និងការវិនិយោគ BlackRock Investment Institute។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សារព័ត៌មាន Bloomberg បានចុះផ្សាយការវិភាគ ដែលនិយាយថា ក្រុមវិនិយោគិនកំពុងផ្តោតលើប្រទេសមានទីផ្សារកំពុងរីកលូតលាស់នៅអាស៊ីទាំង២ ដែលមួយផ្នែកដោយសារតែកំណើនលើគម្រោងចំណាយលើហេដ្ឋារចនាសម្ព័ន្ធ ដែលវាផ្តល់ផលល្អសម្រាប់សេដ្ឋកិច្ចរបស់ប្រទេស។ លើសពីនេះ ទាំងឥណ្ឌា និងឥណ្ឌូណេស៊ី បានបង្ហាញដល់ពិភពលោកនូវមហិច្ឆតារបស់ខ្លួន ក្នុងការផ្លាស់ប្តូរទៅជាអំណាចសេដ្ឋកិច្ចធំៗ ដែលមានចំនួនប្រជាជនដ៏ច្រើនលើសលុប ជាកម្លាំងចលករសំខាន់។

ភាពលេចធ្លោរបស់ប្រទេសទាំង២ រំលេចឡើង ចំពេលដែលអត្រាខ្ពស់នៃប្រជាជនវ័យចំណាស់ បានក្លាយជាបញ្ហាសម្រាប់ប្រទេសធំៗក្នុងតំបន់មួយចំនួន រួមទាំងចិន ដែលធ្លាក់ដំណែងទី១ទៅឱ្យឥណ្ឌា ក្នុងនាមជាប្រទេសមានមានប្រជាជនច្រើនជាងគេបំផុតនៅលើពិភពលោក កាលពីពាក់កណ្ដាលឆ្នាំមុន។

ត្រង់ចំណុចនេះ ការវិភាគរបស់ក្រុមហ៊ុន BlackRock បានបង្ហាញពីទំនាក់ទំនងវិជ្ជមានរវាងកំណើនចំនួនប្រជាជនក្នុងវ័យធ្វើការ និងការវាយតម្លៃភាគហ៊ុនរបស់ប្រទេសមួយ ខណៈក្រុមហ៊ុន Fidelity មើលឃើញថា វិស័យហិរញ្ញវត្ថុ ដើរតួទាញផលប្រយោជន៍ដ៏សំខាន់ ស្របពេលដែលតម្រូវការឥណទានកើនឡើងសម្រាប់សាជីវកម្ម និងអ្នកប្រើប្រាស់។

អ្នកគ្រប់គ្រងមូលនិធិរបស់ក្រុមហ៊ុន Fidelity នៅប្រទេសសិង្ហបុរី លោក Ian Samson បាននិយាយថា៖ «កម្លាំងពលកម្មរបស់ឥណ្ឌា និងឥណ្ឌូណេស៊ីនៅក្មេង ជាមួយនឹងភាគលាភប្រជាសាស្រ្តដែលលើសពីប្រទេសមានសេដ្ឋកិច្ចធំជាងគេមួយចំនួននៅក្នុងតំបន់»។

យោងតាមទិន្នន័យពីធនាគារពិភពលោក ឥណ្ឌា និងឥណ្ឌូណេស៊ី រំពឹងថានឹងកើនឡើងចំនួនប្រជាជនយ៉ាងហោចណាស់ ១០ ភាគរយ ចាប់ពីបច្ចុប្បន្ន ដល់ឆ្នាំ ២០៤០ ខណៈប្រទេសចិនវិញ ទំនងជានឹងធ្លាក់ចុះចំនួនប្រជាជនជិត ៤ ភាគរយ។

អ្វីដែលសំខាន់ជាងនេះ គឺការផ្លាស់ប្ដូរផ្សេងៗក្នុងប្រជាជនពេញវ័យធ្វើការ ដែលគេកំណត់ចន្លោះ ១៥-៦៤ ឆ្នាំ ខណៈឥណ្ឌា ជាប្រទេសមានប្រជាជនវ័យក្មេងច្រើនជាងគេ ក្នុងចំណោមប្រទេសសេដ្ឋកិច្ចធំៗទាំងអស់។

ការកើនឡើងលឿននៃក្រុមប្រជាជនពេញធ្វើការ ជាធម្មតាគឺជាសញ្ញានៃកំណើនប្រាក់ចំណូលកាន់តែខ្ពស់នាពេលអនាគត។ នេះបើតាមការឱ្យដឹងរបស់ក្រុមអ្នកអ្នកយុទ្ធសាស្រ្តរបស់ BlackRock ដែលបន្ថែមថា ការធ្វើចំណាកស្រុក ការចូលរួមកម្លាំងពលកម្មកាន់តែច្រើន និងស្វ័យប្រវត្តិកម្ម ក៏ជាកត្តាសំខាន់ផងដែរ។

លើសពីនេះ អ្នកវិភាគកត់សម្គាល់ថា កំណែទម្រង់រចនាសម្ព័ន្ធដើម្បីកាត់បន្ថយបទប្បញ្ញត្តិរឹងរូស បង្កើនភាពបត់បែនទីផ្សារការងារ និងសម្របសម្រួលការវិនិយោគពីបរទេស មានសារៈសំខាន់សម្រាប់ប្រទេសផ្សេងៗទាញយកប្រយោជន៍ពីចរន្តប្រជាសាស្ត្រ។ គេក៏ឃើញមានកំណែទម្រង់នេះ នៅឥណ្ឌា និងឥណ្ឌូណេស៊ីផងដែរ។

អ្នកវិភាគលើកឡើងថា សម្រាប់វិនិយោគិន បំណុលរដ្ឋ អត្រាអាយុរបស់ប្រជាជន និងបន្ទុកសារពើពន្ធ គឺស្ថិតក្នុងចំណោមការវាស់ស្ទង់ដែលត្រូវពិចារណា សម្រាប់ការវិនិយោគរយៈពេលវែង៕