​រាជរដ្ឋាភិបាលកំពុងអភិវឌ្ឍក្របខណ្ឌច្បាប់ ជួយ​សម្រួលអាជីវកម្មនៅកម្ពុជា ​

លោកស្រី ចម និម្មល រដ្ឋមន្ត្រីក្រសួងពាណិជ្ជកម្ម ​មានប្រសាសន៍ថា រាជរដ្ឋាភិបាល កំពុងធ្វើការ​យ៉ាងសកម្ម ក្នុងការអភិវឌ្ឍក្របខណ្ឌច្បាប់ និងបញ្ញតិ្តក្នុងស្រុក ដើម្បីជួយសម្រួលការដំណើរ​ការអា​ជីវកម្ម​នៅកម្ពុជាឱ្យមានភាពប្រគួត​ប្រជែង និងធានាពង្រឹងដល់បរិយា​កាសធុរកិច្ចឱ្យកាន់តែ​ប្រសើរ​ជាងមុន។​

លោកស្រី ចម និម្មល បានលើកឡើងនៅក្នុងកម្មវិធី “វេទិកាជជែកពិភាក្សា​អំពីពាណិជ្ជកម្ម និងការផ្គូផ្គងពាណិជ្ជកម្ម”​ នៃមហាសន្និបាតអាស៊ីប៉ាស៊ីហ្វិក​ប្រចាំឆ្នាំ២០២៤នៅថ្ងៃទី ០៨ ខែមិថុនា ឆ្នាំ ២០២៤។

លោកស្រីរដ្ឋមន្ត្រីបានលើកឡើងអំពីបរិយាកាសធុរកិច្ចដ៏រស់រវើក និងពោរពេញដោយសក្តានុពល ដែលក្នុងរយៈពេលពីរទស្សវត្សរ៍មកនេះ កម្ពុជាសម្រេចបាននូវកំណើនសេដ្ឋកិច្ចគួរឱ្យកត់​សម្គាល់ជាមធ្យមជាង ៧% ក្នុងមួយឆ្នាំ។ ហើយថា​ជោគជ័យនេះត្រូវបានបង្កើត​ឡើងនៅ​លើមូលដ្ឋាន​នៃស្ថិរភាពនយោបាយ គោលនយោបាយម៉ាក្រូសេដ្ឋកិច្ចល្អ និងរដ្ឋាភិបាល​សកម្ម​ដែលយល់ពីតម្លៃនៃវេទិកាពិគ្រោះយោបល់ជាមួយវិស័យឯកជន។

លោកស្រី​រដ្ឋមន្ត្រី​បាន​មាន​ប្រសាសន៍​ថា បរិវត្តកម្មឌីជីថល ​គឺជា​ចំណុច​ស្នូល​នៃ​យុទ្ធសាស្ត្រ​អភិវឌ្ឍន៍​របស់​ប្រទេស​កម្ពុជា ហើយប្រទេសកម្ពុជាទទួលស្គាល់ថា ការទទួលយកបច្ចេកវិទ្យាឌីជីថលគឺមានសារៈសំខាន់សម្រាប់ការលើកកម្ពស់ប្រសិទ្ធភាព តម្លាភាព និងការប្រកួតប្រជែង។

រាជរដ្ឋាភិបាលកម្ពុជា បានដាក់ចេញនូវគំនិតផ្តួចផ្តើមមួយចំនួនដូចជា៖ ថ្នាលផ្លាស់ប្ដូរទិន្នន័យកម្ពុជា (CAMdx), verify.gov.kh, ប្រព័ន្ធបញ្ជរតែមួយជាតិ, CambodiaTrade.com, ក្របខណ្ឌគោលនយោបាយសេដ្ឋកិច្ច និងសង្គមឌីជីថលកម្ពុជា ២០២១-២០៣៥, ផែនទីបង្ហាញផ្លូវអភិវឌ្ឍន៍ជំនាញឌីជីថលនៅកម្ពុជា ២០២៤-២០៣៥ និងប្រព័ន្ធទូទាត់ឌីជីថល (បាគង)។

លោកស្រីរដ្ឋមន្ត្រីបាន លើកទឹកចិត្ត និងស្នើឱ្យអ្នកវិនិយោគទាំងអស់ចូលរួមស្វែងយល់ពីសក្តានុពល​ដ៏ធំដែលកម្ពុជាផ្តល់ជូនធុរជន។ “តើត្រូវវិនិយោគលើសេដ្ឋកិច្ចដែលកំពុងរីកចម្រើនយ៉ាងឆាប់រហ័សរបស់យើង ទាញយកអត្ថប្រយោជន៍​ពីទីតាំង​យុទ្ធសាស្ត្ររបស់យើង ឬបង្កើនភាពជឿនលឿនផ្នែកឌីជីថលរបស់យើង កម្ពុជាស្វាគមន៍ដោយកក់ក្តៅ”៕