សេដ្ឋកិច្ច

ធនាគារសិង្ហបុរីធំៗបង្កើនការត្រួតពិនិត្យលើអតិថិជនអ្នកមានៗ ក្រោយមានករណីលាងលុយកខ្វក់

បានផុស

២ years មុន

នៅ

ថ្ងៃចន្ទ ១០ មិថុនា ២០២៤

ដោយ

ធនាគារវិនិយោគអាមេរិក Citigroup ធនាគារហិរញ្ញវត្ថុពហុជាតិ DBS និងធនាគារប្រតិបត្តិការនៅសិង្ហបុរីផ្សេងៗទៀត ដែលជាប់ក្នុងរឿងអាស្រូវលាងលុយកខ្វក់ដ៏ធំបំផុតរបស់ប្រទេស កំពុងបង្កើនការត្រួតពិនិត្យអតិថិជនអ្នកមានៗ និងអតិថិជនសក្តានុពលរបស់ខ្លួន ដើម្បីជៀសវាងការពាក់ព័ន្ធនឹងលំហូរហិរញ្ញវត្ថុខុសច្បាប់។ នេះបើតាមការចុះផ្សាយផ្ដាច់មុខរបស់សារព័ត៌មាន Bloomberg ដែលស្រង់សម្ដីប្រភពដឹងច្បាស់ពីបញ្ហានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមប្រភពដែលសុំមិនបញ្ចេញឈ្មោះដដែល បានបន្តផងដែរថា បុគ្គលិកធនាគារឯកជននៅតាមស្ថាប័នមួយចំនួន កំពុងទទួលបានការបណ្តុះបណ្តាលបន្ថែម ដើម្បីជួយរកល្បិចដែលឧក្រិដ្ឋជនប្រើ ដើម្បីបិទបាំងប្រវត្តិ និងប្រភពនៃមូលនិធិរបស់ពួកគេ។

ចំណាក់ការ ដែលធ្វើឡើងដោយស្ម័គ្រចិត្តទាំងនេះ បង្ហាញពីរបៀបដែលធនាគារនានាព្យាយាមលុបបំបាត់ចន្លោះប្រហោងផ្សេងៗ ដែលបានបើកផ្លូវឱ្យក្រុមឧក្រិដ្ឋជនមកពីចិនលាងលុយកខ្វក់ជាង ៣ ប៊ីលានដុល្លារសិង្ហបុរី (២,២៣ ប៊ីលានដុល្លារអាមេរិក) ដែលជាប្រាក់ទទួលបានពីល្បែងអនឡាញ ហើយដាក់ចូលក្នុងលំហូរហិរញ្ញវត្តុរបស់ស្ថាប័នហិរញ្ញវត្ថុយ៉ាងហោចណាស់ ១៦ នៅសិង្ហបុរី។ រឿងអាស្រូវនេះ បានធ្វើឱ្យខូចមុខមាត់ប្រទេសសិង្ហបុរី និងបង្ហាញភាពទន់ខ្សោយអំពីរបៀបដែលធនាគារក្នុងស្រុក និងបរទេស និងក្រុមហ៊ុនឈ្មួញកណ្តាល ត្រួតពិនិត្យមើលអតិថិជនរបស់ខ្លួន។

ប្រភពខ្លះអះអាងថា ថ្មីៗនេះ អាជ្ញាធររូបិយវត្ថុសិង្ហបុរី (MAS) បានបញ្ចប់ការត្រួតពិនិត្យនៅនឹងកន្លែងរបស់ធនាគារមួយចំនួន ដែលមានជាប់ពាក់ព័ន្ធក្នុងរឿងអាស្រូវដដែល។ ប្រភពបន្តថា ធនាគារផ្តល់ប្រាក់កម្ចីដែលពាក់ព័ន្ធនឹងឧក្រិដ្ឋជនច្រើនបំផុត តាមរយៈគណនីប្រាក់បញ្ញើ ប្រាក់កម្ចី និងសេវាកម្មហិរញ្ញវត្ថុផ្សេងទៀតនោះ ត្រូវបានគេរំពឹងថានឹងប្រឈមមុខនឹងការផាកពិន័យ និងវិធានការទណ្ឌកម្មជាច្រើន ពីនិយតករហិរញ្ញវត្ថុ បន្ទាប់ពីការស៊ើបអង្កើតបញ្ចប់។

បើតាម Bloomberg អ្នកនាំពាក្យ MAS បាននិយាយថា MAS នឹងវាយតម្លៃថាតើស្ថាប័នហិរញ្ញវត្ថុបានអនុវត្តការត្រួតពិនិត្យគ្រប់ជ្រុងជ្រោយ និងសមស្រប ប្រឆាំងនឹងការលាងលុយកខ្វក់ និងហិរញ្ញប្បទានភេរវកម្មដែរឬយ៉ាងណា។ បន្ទាប់មក MAS នឹងចាត់វិធានការស្ថាប័នហិរញ្ញវត្ថុបំពេញតួនាទីរបស់ខ្លួនមិនគ្រប់គ្រាន់។

គួរគូសបញ្ជាក់ថា ក្រោយករណីលាងលុយកខ្វក់ត្រូវបានទម្លាយជាសាធារណៈក្នុងខែសីហា ឆ្នាំ ២០២៣ រដ្ឋាភិបាលសិង្ហបុរីបានបង្កើតគណៈកម្មាធិការអន្តរក្រសួងមួយ ដើម្បីពិនិត្យឡើងវិញលើការប្រឆាំងការលាងលុយកខ្វក់របស់ប្រទេស និងពង្រឹងការការពារក្នុងវិស័យនានា រួមទាំងស្ថាប័នហិរញ្ញវត្ថុ និងភ្នាក់ងារអចលនទ្រព្យផ្សេងៗ។

ក្រោមរឿងអាស្រូវលាងលុយកង្វក់នោះ ទ្រព្យសម្បត្តិដែលសមត្ថកិច្ចរឹបអូសបានរួមមាន លុយសុទ្ធ ដុំមាស គ្រឿងអលង្ការ រថយន្ត និងទ្រព្យសម្បត្តិលំនៅឋាន និងពាណិជ្ជកម្ម។ ជនជាប់ចោទទាំង១០ នាក់ ដែលបានសារភាពពីទោសកំហុសរបស់ខ្លួន បានជាប់ទាក់ទងនឹងគណនីធនាគារនៅស្ថាប័នហិរញ្ញវត្ថុចំនួន ១៦ ប្រតិបត្តិការនៅសិង្ហបុរី ដែលមានប្រាក់បញ្ញើ និងការវិនិយោគច្រើនជាង ៣៧០ លានដុល្លារសិង្ហបុរី។ ធនាគារដែលកាន់កាប់ទ្រព្យសម្បត្តិច្រើនជាងគេរួមមាន ធនាគារ Credit Suisse អង្គភាពក្នុងស្រុករបស់ធនាគារ Citigroup និងធនាគារ United Overseas Bank៕

Related Topics: