រដ្ឋាភិបាលព្រៀងផែនការមេអភិវឌ្ឍខេត្តព្រះសីហនុទៅជាតំបន់សេដ្ឋកិច្ចពិសេសគំរូពហុបំណង និងជាច្រកទ្វារអន្តរជាតិ

រាជរដ្ឋាភិបាលកម្ពុជាបានរៀបចំសេចក្ដីព្រៀងផែនការមេដើម្បីអភិវឌ្ឍខេត្តព្រះសីហនុ ទៅជា​តំបន់​សេដ្ឋកិច្ចពិសេសគំរូពហុបំណង ដែលផែនការមេនេះ ក៏ជាត្រីវិស័យដើម្បី​អភិវឌ្ឍខេត្តព្រះ​សីហនុ​​ឱ្យទៅ​ជាច្រកទ្វារអន្តរជាតិរបស់ប្រទេសកម្ពុជា និងប៉ូលអភិវឌ្ឍន៍ជាតិ ដោយប្រែក្លាយ​ជា​គោល​ដៅទេស​ចរណ៍​ឆ្នេរសមុទ្រ។

លោក អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ នៅថ្ងៃទី ០៩ ខែ​កក្កដា ឆ្នាំ ២០២៤ បានដឹកនាំកិច្ចប្រជុំគណៈកម្មាធិការសម្របសម្រួលអន្តរក្រសួង លើកទី៣ ដើម្បី​ពិនិត្យ និងផ្ដល់យោបល់ លើសេចក្តីព្រាង​«ផែនការមេ​ដើម្បីអភិវឌ្ឍ​ខេត្តព្រះ​សីហនុ ទៅជាតំបន់​សេដ្ឋកិច្ច​​ពិសេស​គំរូពហុបំណង» និង«ផែនការ​សកម្មភាព​» មុននឹងដាក់ជូន​រាជ​រដ្ឋា​ភិបាល អនុម័ត។

យោងតាមសេចក្ដីប្រកាសព័ត៌មានរបស់ក្រសួងសេដ្ឋកិច្ចចេញផ្សាយនៅថ្ងៃទី ៩ ខែកក្កដា បង្ហាញថា ផែនការមេនេះ មានចក្ខុវិស័យ អភិវឌ្ឍខេត្តព្រះសីហនុទៅជា៖ ទី១. ច្រកទ្វារអន្តរជាតិរបស់ប្រទេសកម្ពុជា ដែលជាមជ្ឈមណ្ឌលពាណិជ្ជកម្ម និងមជ្ឈមណ្ឌលហិរញ្ញវត្ថុអន្តរជាតិ។ ទី២. ប៉ូលអភិវឌ្ឍន៍ជាតិ ដោយប្រែក្លាយជា គោលដៅទេសចរណ៍ឆ្នេរសមុទ្រ និងប្រជុំកោះលំដាប់សកលលោក។ ទី៣. ទីក្រុងធំមួយនៅក្នុងតំបន់អាស៊ាន ជាមួយនឹងកិត្តិនាមជាទីក្រុងគំរូបៃតង ប្រកបដោយចីរភាព, ចម្រុះវប្បធម៌ និងឆ្លាតវៃ។

តាមផែនការមេ ដំណាក់កាលទី ១ ចាប់ពីឆ្នាំ «២០២៥-​២០២៨»៖ ផ្តោតលើការធ្វើសមាហរណកម្មខេត្តព្រះសីហនុ ទៅក្នុងប្រព័ន្ធពាណិជ្ជកម្មក្នុងតំបន់, ការពង្រីកមុខងារភស្តុភារកម្ម និងវិស័យទេសចរណ៍ព្រមទាំងការធ្វើឲ្យប្រសើរឡើងនូវទីក្រុងចាស់ និងអភិវឌ្ឍតំបន់ថ្មី រួមទាំងការទាក់ទាញការវិនិយោគ ដែលមានតម្លៃបន្ថែមខ្ពស់។

ដំណាក់កាលទី ២ «២០២៩-២០៣៨»៖ ខេត្តព្រះសីហនុនឹងពង្រឹងតួនាទីរបស់ខ្លួនជាច្រកទ្វារជាតិ និងជាទីក្រុងមជ្ឈមណ្ឌលក្នុងតំបន់ លើវិស័យហិរញ្ញវត្ថុ ពាណិជ្ជកម្ម ការអភិវឌ្ឍឧស្សាហកម្ម ការដឹកជញ្ជូន និងបច្ចេកវិទ្យា ព្រមទាំងអភិវឌ្ឍខ្លួនទៅជាទីក្រុងពហុមុខងារ សមស្របសម្រាប់សហ-គ្រិនភាព ទីក្រុងបៃតង និងទីក្រុងឆ្លាតវៃ ព្រមទាំងជាខេត្តដែលមានចំណូលខ្ពស់ ប្រកបដោយវិបុល-ភាព៕

អត្ថបទ៖ ឡេង ដេត