ព័ត៌មានអន្ដរជាតិ

VinFast ចង់ខ្ចីលុយធនាគារ ២៥០ លានដុល្លារ ដើម្បីបើករោងចក្រផលិតរថយន្តអគ្គិសនីនៅឥណ្ឌូណេស៊ី

បានផុស

២ years មុន

នៅ

ថ្ងៃព្រហស្បតិ៍ ១១ កក្កដា ២០២៤

ដោយ

ក្រុមហ៊ុនផលិតរថយន្តអគ្គិសនីរបស់វៀតណាម VINFAST Auto ចង់ខ្ចីប្រាក់ពីធនាគារប្រហែល ២៥០ លានដុល្លារអាមេរិក ដើម្បីវិនិយោគលើការសាងសង់រោងចក្រដំឡើងរថយន្តរបស់ខ្លួននៅទីក្រុង Subang ខេត្តជ្វាខាងលិច នៃប្រទេសឥណ្ឌូណេស៊ី។

សារព័ត៌មាន Bloomberg បានចុះផ្សាយកាលពីថ្ងៃពុធ ដោយស្រង់សម្ដីប្រភពច្រើនរូប ដែលដឹងច្បាស់ពីបញ្ហានេះថា ក្រុមហ៊ុន VINFAST ដែលជាបុត្រសម្ព័ន្ធរបស់ក្រុមហ៊ុនពហុវិស័យវៀតណាម Vingroup បានទាក់ទងទៅធនាគារនៅក្នុងប្រទេសឥណ្ឌូណេស៊ី ដើម្បីសុំប្រាក់កម្ចីជាដុល្លារអាមេរិក ឬរូបិយប័ណ្ណក្នុងស្រុកឥណ្ឌូណេស៊ី។

យ៉ាងណាមិញ អ្នកនាំពាក្យរបស់ក្រុមហ៊ុន VINFAST ដែលគ្រប់គ្រងដោយមហាសេដ្ឋីប្រចាំប្រទេសវៀតណាម លោក Pham Nhat Vuong បានបដិសេធមិនបកស្រាយលើព័ត៌មាននេះ។

គេមើលឃើញថា ការបោះជំហានយ៉ាងដូច្នេះរបស់ VINFAST បានគូសបញ្ជាក់ពីមហិច្ឆិតានៃការចាប់ផ្តើមអាជីវកម្ម ដើម្បីប្រកួតប្រជែងក្នុងតំបន់ជាមួយក្រុមហ៊ុនផលិតរថយន្តអគ្គិសនីអន្តរជាតិផ្សេងៗទៀត ខណៈទីផ្សាររថយន្តអគ្គិសនីកំពុងមានការប្រកួតប្រជែងខ្លាំង។

យ៉ាងណាមិញ កាលពីចុងខែឧសភាកន្លងទៅ មានសេចក្ដីរាយការណ៍ថា VINFAST បានបន្តពន្យារពេលលើគម្រោងសាងសង់រោងចក្រផលិតរថយន្តអគ្គិសនីតម្លៃ៤ប៊ីលានដុល្លារនៅរដ្ឋខារ៉ូលីណាខាងជើង សហរដ្ឋអាមេរិក ខណៈការលក់នៅទូទាំងពិភពលោកខ្សោយខ្លាំង ហើយក្រុមហ៊ុននេះបានខាតបង់ប្រាក់ជាង ២,៤ ប៊ីលានកាលពីឆ្នាំមុន។

ទោះជាយ៉ាងណាក៏ដោយ លោក Vuong បានលើកឡើងក្នុងបទសម្ភាសន៍ជាមួយ Bloomberg កាលពីខែមុនថា ក្រុមហ៊ុន VinFast នឹងបន្តទទួលបានការគាំទ្រពីលោក រហូតទាល់តែលោកអស់លុយ៕

Related Topics:ក្រុមហ៊ុន VinFast