ព័ត៌មានអន្ដរជាតិ

ក្រុមហ៊ុនផលិត EV វៀតណាម VinFast ខាតបង់សុទ្ធជាង ៧០០ លានដុល្លារ នៅត្រីមាសទី១

បានផុស

១ year មុន

នៅ

ថ្ងៃអង្គារ ១០ មិថុនា ២០២៥

ដោយ

ក្រុមហ៊ុនផលិតរថយន្តអគ្គិសនីដំបូងបង្អស់របស់វៀតណាម Vinfast កាលពីថ្ងៃចន្ទ បានរាយការណ៍ពីការខាតបង់សុទ្ធប្រមាណ ៧១២ លានដុល្លារ ក្នុងត្រីមាសទី ១ នៃឆ្នាំនេះ បើទោះបីជាមានកំណើននៃការចែកចាយរថយន្តក៏ដោយ។ នេះបើតាមការចុះផ្សាយរបស់ទីភ្នាក់ងារសារព័ត៌មាន AFP។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការបន្តខាតបង់ធ្ងន់ធ្ងរបែបនេះ កើតឡើងចំពេលដែលក្រុមហ៊ុនព្យាយាមប្រកួតប្រជែងជាមួយក្រុមហ៊ុនយក្សពិភពលោកដូចជា Tesla និង BYD ប៉ុន្តែពិបាកក្នុងការស៊កខ្លួនចូលទៅក្នុងទីផ្សារអន្តរជាតិ។

ក្រុមហ៊ុនបាននិយាយកាលពីថ្ងៃចន្ទថា ខ្លួនបានចែកចាយរថយន្តអគ្គិសនីចំនួន ៣៦ ៣៣០ គ្រឿង ក្នុងរយៈពេល ៣ ខែដំបូង ឆ្នាំ ២០២៥ ដោយកើនឡើងប្រមាណ ២៩៦ ភាគរយ ធៀបនឹងរយៈពេលដូចគ្នាកាលពីឆ្នាំមុន។

ក្នុងត្រីមាសដដែល ក្រុមហ៊ុនរកប្រាក់ចំណូលបានប្រមាណ ៦៥៦,៥ លានដុល្លារ ដោយកើនឡើងជិត ១៥០ ភាគរយ ក្នុងអត្រាប្រចាំឆ្នាំ។ ការខាតបង់សុទ្ធនៅត្រីមាសទី ១ គឺជាការបន្តខាតបង់សុទ្ធ ៣ ប៊ីលានដុល្លារ ពេញមួយឆ្នាំ ២០២៤។

ទោះជាយ៉ាងណាក៏ដោយ ប្រធានក្រុមហ៊ុន Vinfast លោក Thuy Le បាននិយាយថា កំណើនការចែកចាយតំណាងឱ្យ «ការលើកទឹកចិត្តសម្រាប់ការចាប់ផ្ដើមឆ្នាំ ២០២៥ ចំពេលមានភាពមិនច្បាស់លាស់ជាសកលដែលកំពុងបន្ត»៕