ព័ត៌មានអន្ដរជាតិ

ក្រុមហ៊ុនវៀតណាម VinFast បើករោងចក្រផលិត EV តម្លៃ ៥០០ លានដុល្លារ នៅឥណ្ឌា

បានផុស

១២ ខែ មុន

នៅ

ថ្ងៃពុធ ៦ សីហា ២០២៥

ដោយ

ក្រុមហ៊ុនផលិតរថយន្តអគ្គិសនីវៀតណាម VinFast បានចាប់ផ្តើមបើកដំណើរការផលិតកម្មនៅរោងចក្រផលិតរថយន្តអគ្គិសនី (EV) តម្លៃ ៥០០ លានដុល្លារ នៅរដ្ឋ Tamil Nadu ភាគខាងត្បូងនៃប្រទេសឥណ្ឌា កាលពីថ្ងៃចន្ទ ដែលនេះជាផ្នែកមួយនៃគម្រោងវិនិយោគ ២ ប៊ីលានដុល្លារ នៅឥណ្ឌា និងការពង្រីកខ្លួនលើទីផ្សារអាស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រោងចក្ររបស់ VinFast នៅទីក្រុង Thoothukudi នឹងចាប់ផ្តើមដោយការផលិតរថយន្តអគ្គិសនីចំនួន ៥០ ០០០ គ្រឿង/ឆ្នាំ ហើយអាចបង្កើនបន្តទៀតដល់ ១៥០ ០០០ គ្រឿង/ឆ្នាំ។ វាមានទីតាំងនៅជិតកំពង់ផែធំមួយក្នុងតំបន់ឧស្សាហកម្ម ហើយរំពឹងថានឹងជំរុញការនាំចេញនាពេលអនាគត និងបង្កើតការងារក្នុងស្រុកជាង ៣ ០០០ កន្លែង ។

VinFast បានជ្រើសរើសរដ្ឋ Tamil Nadu គឺដោយសាររដ្ឋនេះជាមជ្ឈមណ្ឌលរថយន្តដ៏សំខាន់មួយ ដែលមានហេដ្ឋារចនាសម្ព័ន្ធរឹងមាំ កម្មករជំនាញ និងខ្សែច្រវ៉ាក់ផ្គត់ផ្គង់ដែលអាចទុកចិត្តបាន។ នេះបើយោងតាមរដ្ឋមន្ត្រីក្រសួងឧស្សាហកម្ម លោក T.R.B. Raaja ។ លោកបាននិយាយថា ការវិនិយោគនេះអាចបង្កើតចង្កោមឧស្សាហកម្មថ្មីមួយនៅភាគខាងត្បូងរដ្ឋ Tamil Nadu ដោយជួយឥណ្ឌាឱ្យរីកចម្រើនក្លាយជាមជ្ឈមណ្ឌលផលិតកម្មពិភពលោក។

នាយកប្រតិបត្តិក្រុមហ៊ុន VinFast Asia លោក Pham Sanh Chau បាននិយាយថា ក្រុមហ៊ុនមានគោលបំណងប្រែក្លាយរោងចក្រទៅជាមជ្ឈមណ្ឌលនាំចេញក្នុងតំបន់។ វាគឺជាជំហានមួយសម្រាប់ក្រុមហ៊ុន Vingroup ដែលជាក្រុមហ៊ុនមេរបស់ VinFast ពង្រីកខ្លួនទៅកាន់ឥណ្ឌានាពេលអនាគតផងដែរ។

គេមើលឃើញថា VinFast បានដាក់រោងចក្រនៅឥណ្ឌា ដើម្បីពង្រីកទីផ្សារនៅអាស៊ី ក្រោយត្រដាបត្រដួសក្នុងការដណ្ដើមទីផ្សារនៅសហរដ្ឋអាមេរិក និងអឺរ៉ុប។ បច្ចុប្បន្ន ក្រុមហ៊ុនកំពុងសាងសង់រោងចក្រផលិត EV តម្លៃ ២០០ លានដុល្លារនៅឥណ្ឌូណេស៊ី និងគ្រោងពង្រីកខ្លួនទៅថៃ និងហ្វីលីពីន។ នៅឆ្នាំ ២០២៤ VinFast បានលក់រថយន្តជិត ៩៧ ០០០ គ្រឿងនៅឆ្នាំមុន កើនឡើង ៣ ដង ប៉ុន្តែ ៩០ ភាគរយ ក្នុងនោះត្រូវបានលក់លើទីផ្សារក្នុងស្រុកវៀតណាម៕