ព័ត៌មានអន្ដរជាតិ

វៀតណាមរំពឹងការវិនិយោគរាប់សិបពាន់លានដុល្លារពីកូរ៉េខាងត្បូង

បានផុស

២ years មុន

នៅ

ថ្ងៃពុធ ១៧ កក្កដា ២០២៤

ដោយ

ទីភ្នាក់ងារវិនិយោគបរទេស (FIA) ចំណុះក្រសួងផែនការ និងវិនិយោគវៀតណាម បានឱ្យដឹងថា វៀតណាមរំពឹងថានឹងទទួលបាននូវរលកវិនិយោគដ៏រាប់សិបពាន់លានដុល្លារពីកូរ៉េខាងត្បូងក្នុងពេលឆាប់ៗនេះ។ នេះបើតាមការចុះផ្សាយរបស់កាសែត Viet Nam News។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រធាន FIA លោក Đỗ Nhất Hoàng បានថ្លែងក្នុងវេទិកាសប្តាហ៍នៃភាពជាដៃគូវៀតណាម-កូរ៉េឆ្នាំ ២០២៤ នៅទីក្រុងហូជីមិញ កាលពីថ្ងៃអង្គារ ថា កូរ៉េខាងត្បូងគឺជាប្រទេសនាំមុខគេមួយក្នុងការវិនិយោគនៅវៀតណាម ដោយគិតត្រឹមខែមិថុនា ប្រទេសនេះបានវិនិយោគជិត ៨៧,៥ ប៊ីលានដុល្លារ ក្នុងគម្រោងជាង ១០ ០០០ ដោយវិស័យផលិតកម្មរួមចំណែកជិត ៧៦ ភាគរយនៃការវិនិយោគ។

មន្រ្តីវៀតណាមដដែល បានកោតសរសើរក្រុមហ៊ុនកូរ៉េខាងត្បូងចំពោះការអនុវត្តគម្រោងយ៉ាងឆាប់រហ័ស គុណភាពខ្ពស់ និងបច្ចេកវិទ្យារបស់ពួកគេ ដោយបង្ហាញទំនួលខុសត្រូវសង្គម និងការយកចិត្តទុកដាក់ចំពោះបុគ្គលិក និងការអនុលោមតាមច្បាប់យ៉ាងតឹងរ៉ឹង។

លើសពីនេះ កូរ៉េខាងត្បូងគឺជាប្រទេសរួមវិភាគទានដ៏ធំមួយលើជំនួយអភិវឌ្ឍន៍ផ្លូវការ (ODA) សម្រាប់វៀតណាម ភាគច្រើនពាក់ព័ន្ធនឹងប្រាក់កម្ចីដើម្បីផ្តល់មូលនិធិដល់ហេដ្ឋារចនាសម្ព័ន្ធដឹកជញ្ជូនក្នុងទីក្រុង ការអប់រំ-បណ្តុះបណ្តាល បរិស្ថាន ថាមពលស្អាត និងបច្ចេកវិទ្យាព័ត៌មាន។

ប្រធានផ្នែកកិច្ចសហប្រតិបត្តិការពាណិជ្ជកម្ម និងសេដ្ឋកិច្ចអន្តរជាតិរបស់ទីភ្នាក់ងារជំរុញពាណិជ្ជកម្ម-វិនិយោគកូរ៉េ លោក Lee Ji Hyung បាននិយាយថា ចាប់តាំងពីបង្កើតទំនាក់ទំនងការទូតក្នុងឆ្នាំ ១៩៩២ ទំនាក់ទំនងរវាងវៀតណាម និងកូរ៉េខាងត្បូង បានរីកចម្រើនលើវិស័យជាច្រើន រួមទាំងការវិនិយោគ និងពាណិជ្ជកម្មផងដែរ។

លោកបានចង្អុលបង្ហាញថា ពាណិជ្ជកម្មទ្វេភាគីបានកើនឡើង ១៦២ ដង ពី ៤៩០ លានដុល្លារក្នុងឆ្នាំ ១៩៩២ ដល់ ៧៩,៤២ ប៊ីលានដុល្លារក្នុងឆ្នាំ ២០២៣។ លោកបន្តថា វៀតណាមគឺជាដៃគូពាណិជ្ជកម្មធំជាងគេទី៣របស់កូរ៉េខាងត្បូងកាលពីឆ្នាំមុន បន្ទាប់ពីចិន និងសហរដ្ឋអាមេរិក ហើយក៏ជាគោលដៅវិនិយោគធំជាងគេទី៣ចន្លោះឆ្នាំ ១៩៨០-២០២៣៕