ព័ត៌មានអន្ដរជាតិ

ពាណិជ្ជកម្មវៀតណាមកើនជិត ៤៤០ ប៊ីលានលាន ៧ ខែដើមឆ្នាំ បង្កើនអតិរេកពាណិជ្ជកម្មដល់ ១៤ ប៊ីលានដុល្លារ

បានផុស

២ years មុន

នៅ

ថ្ងៃពុធ ៣១ កក្កដា ២០២៤

ដោយ

ទិន្នន័យពីការិយាល័យស្ថិតិទូទៅវៀតណាម បានបង្ហាញថា ទំហំពាណិជ្ជកម្មសរុបរបស់វៀតណាមបានកើនឡើងដល់ ៤៣៩,៨៨ ប៊ីលានដុល្លារ ក្នុងរយៈពេល៧ខែដំបូងនៃឆ្នាំ ២០២៤ ជាមួយនឹងអតិរេកពាណិជ្ជកម្មប្រមាណ ១៤,០៨ ប៊ីលានដុល្លារ។ នេះបើតាមការចុះផ្សាយរបស់កាសែត Viet Nam News។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គិតតែក្នុងខែកក្កដា ពាណិជ្ជកម្មវៀតណាម មានទំហំ ៦៩,៧២ ប៊ីលានដុល្លារ ដោយកើនឡើង ៨,៧ ភាគរយ ធៀបនឹងខែមិថុនា និង ២១,៨ ធៀបនឹងរយៈពេលដូចគ្នាកាលពីឆ្នាំមុន។

ចន្លោះពីខែមករា ដល់ខែកក្កដា ការនាំចេញសរុបរបស់វៀតណាម មានចំនួនសរុប ២២៦,៩៨ ប៊ីលានដុល្លារ ដោយកើនឡើង ១៥,៧ ភាគរយ។ ក្នុងនោះ វិស័យក្នុងស្រុករួមចំណែក ២៧,៨ ភាគរយ និងវិស័យវិនិយោគពីបរទេសរួមចំណែកប្រមាណ ៧២,២ ភាគរយ។

ការនាំចូលសរុប មានប្រមាណ ២១២,៩ ប៊ីលានដុល្លារក្នុងរយៈពេល ៧ ខែដូចគ្នា ដោយកើនឡើង ១៨,៥ ភាគរយ។

ទិន្នន័យដដែលបង្ហាញថា អាមេរិកបន្តជាប្រទេសនាំចូលទំនិញពីវៀតណាមដ៏ធំបំផុត (ទំហំ ៦៦,១ ប៊ីលានដុល្លារ) ខណៈវៀតណាមនាំចូលពីចិនច្រើនបំផុត (៧៩,២ ប៊ីលានដុល្លារ)។

គួរគូសបញ្ជាក់ថា វៀតណាមជាប្រទេសនាំចេញដ៏ធំមួយរបស់ពិភពលោកលើមុខទំនិញជាច្រើនដូចជាអង្ករ ម្រេច និងសម្លៀកបំពាក់ យ៉ាងណាមិញ មន្រ្តីវៀតណាមទទូចថា វាមានសារៈសំខាន់ណាស់សម្រាប់វៀតណាមក្នុងការបន្តកែលម្អគុណភាពផលិតផល ដើម្បីបំពេញតម្រូវការទីផ្សារនាំចូល។

លើសពីនេះ ក្រុមហ៊ុនវៀតណាមក៏ចាំបាច់ត្រូវធ្វើពិពិធកម្មទៅក្នុងទីផ្សារផ្សេងទៀត និងពង្រីកទៅកាន់ទីផ្សារដូចជា មជ្ឈិមបូព៌ា អាហ្វ្រិក និងអាមេរិកខាងត្បូង ដើម្បីកាត់បន្ថយហានិភ័យពីការពឹងផ្អែកលើទីផ្សារតែមួយ ឬច្រើន។

អនុប្រធាននាយកដ្ឋាននាំចូល-នាំចេញ ក្រោមក្រសួងឧស្សាហកម្ម និងពាណិជ្ជកម្មវៀតណាម លោក Trần Thanh Hải បានថ្លែងថា ការនាំចេញ និងនាំចូលរបស់វៀតណាម ស្ថិតនៅក្នុងភាពរឹងមាំ ដែលកន្លងមក អ្នកវិភាគទាញភ្ជាប់ទៅនឹងកំណើនតម្រូវការសកល ក៏ដូចជាអំណោយផលនៃកិច្ចព្រមព្រៀងពាណិជ្ជកម្ម ដែលវៀតណាមមានជាមួយប្រទេសដទៃ៕

Related Topics: