តម្លៃហាងឆេងមាសបានហក់ឡើងបំបែកកំណត់ត្រាថ្មីទៀត ៣ ១៣២ ដុល្លារ នៅចំពេលអាមេរិកទម្លាក់អត្រាការប្រាក់ ០,៥%

តម្លៃមាសបានហក់ឡើងបំបែកកំណត់ត្រាជាថ្មីបន្ថែមទៀតដល់ ២៦០០ ដុល្លារក្នុងមួយអោន នៅលើទីផ្សារអន្តរជាតិ ឬស្មើរនឹង ៣ ១៣២ ដុល្លារ ក្នុងមួយតម្លឹងនៅកម្ពុជា នៅចំពេលដែលធនា​គារ​កណ្ដាល​អាមេរិក​កាត់បន្ថយអត្រាការប្រាក់០,៥ ភាគរយ។

លោក ឡុង សំណាង ​ប្រធានផ្នែកប្រឹក្សាយោបល់ហិរញ្ញវត្ថុនៅក្រុមហ៊ុន ​PP Link securities ​ប្រាប់កម្ពុជាថ្មី នៅថ្ងៃទី ១៩ ខែកញ្ញា ឆ្នាំ ២០២៤ នេះថា បន្ទាប់ពីការហក់​ឡើងដល់​តម្លៃខ្ពស់បំផុត មាសបានធ្លាក់ចុះបន្តិចវិញមកតម្លៃ ២៥៥៦ ដុល្លារក្នុងមួយអោន ឬស្មើរនឹង ៣០៨១ ដុល្លារ ក្នុងមួយតម្លឹងនៅកម្ពុជា។

លោក ឡុង សំណាង បញ្ជាក់ថា៖ «តម្លៃហាងឆេងមាសមានការប្រែប្រួលខ្លាំង ភាគរយកើនឡើងខ្ពស់ ដូចជាការកាត់បន្ថយអត្រាការប្រាក់នៅយប់មិញ ក៏ដូចជាគម្រោង​ការកាត់បន្ថយអត្រាការប្រាក់បន្ថែមទៀត»។

បើតាមលោក ឡុង សំណាង តាមផែនការធនា​គារ​កណ្ដាល​អាមេរិក​នឹងកាត់បន្ថយអត្រាការ​ប្រាក់បន្ថែមទៀតអាចនៅត្រឹមចន្លោះជាង ៤ ភាគរយ នៅក្នុងឆ្នាំ ២០២៤ ខណៈភូមិសាស្ត្រ​នយោ​បាយនៅមជ្ឈិមប្រទេសមិនទាន់ល្អប្រសើរ ធ្វើឱ្យសេដ្ឋកិច្ចលំបាកដែលជាកត្តា​ធ្វើឱ្យ​តម្លៃមាសកើនឡើងដដែល។

សម្រាប់ហាងឆេងមាសក្នុងស្រុកនៅថ្ងៃទី ១៩ ខែកញ្ញា ឆ្នាំ ២០២៤ ម្ចាស់ហាងលក់មាសផ្សារជម្ពូវន្ត លក់ចេញក្នុងតម្លៃ ៣០៧ ដុល្លារ ក្នុងមួយជី៕

អត្ថបទ៖ ឡេង ដេត