សមាគមសណ្ឋាគារទទួលទិញស្វាយចន្ទី ២៥០ តោន ពីសហ​គ្រាស​ក្នុង​ស្រុក នៅឆ្នាំដំបូង

សមាគមស្វាយចន្ទីកម្ពុជាតំណាងឱ្យសហគ្រាសជាសមាជិកនៅថ្ងៃទី ១០ ខែធ្នូ ឆ្នាំ ២០២៤ នេះ បាន​ចុះអនុស្សារណៈ​នៃការយោគយល់គ្នា (MOU) ជាមួយសមាគមសណ្ឋាគារកម្ពុជា ក្នុងការទទួលទិញ​ផលិត​​ផលស្វាយ​ចន្ទីពីសហគ្រាសក្នុងស្រុកដែលមានផលិតផលស្ដង់ដា។

នៅឆ្នាំទី១ សមាគមសណ្ឋាគារត្រូវការស្វាយចន្ទី ២៥០តោន ឆ្នាំទី២ត្រូវការ ២៦៥តោន និងឆ្នាំទី៣ ត្រូវការ ២៧៩​តោន។ ក្នុងនោះសមាគមចុងភៅ និងសមាគមភោជនីយដ្ឋានក៏ត្រូវការគ្រាប់ចន្ទីកែច្នៃ​ផង​ដែរ ខណៈសមាគមជោជនីយដ្ឋានក៏បានបញ្ជូនរតំណាងចូលរួម ដែលនឹងអាចមានការចុះអនុស្សារណៈរវាងសមា​គម​ស្វាយ​​ចន្ទីកម្ពុជា និងសមាគមសណ្ឋាគារ ក្រោមការជួយជ្រោមជ្រែងពីក្រសួង​ពាណិជ្ជកម្ម ក្នុង​ការ​ជំរុញ​ទីផ្សារគ្រាប់ចន្ទីកែច្នៃក្នុងស្រុក។

លោក អួន ស៊ីឡុត ប្រធានសមាគមស្វាយចន្ទីកម្ពុជា ប្រាប់កម្ពុជាថ្មីនៅថ្ងៃទី ១០ ខែធ្នូ ឆ្នាំ ២០២៤​នេះថា៖ «ការប្រើប្រាស់ និងលក់ក្នុងស្រុកមានភាពងាយស្រួលជាងនាំចេញ ដូច្នេះ​យើងជំរុញការលក់ក្នុងស្រុកឱ្យបានល្អ ក្រសួងពាណិជ្ជកម្ម​បានជួយរកទីផ្សារក្នុង​ដូចជាការលក់​នៅតាមអាកាសយានដ្ឋាន បន្ទាប់មក​ការលក់តាមម៉ាតនានា ហើយ​ឥឡូវ​នេះចាប់ផ្ដើម​លក់នៅ​តាមសណ្ឋាគារ និងភោជនីយដ្ឋាន​បន្ថែមទៀត ដូច្នេះ​ធ្វើម៉េច​ជំរុញ​ឱ្យការប្រើប្រាស់ និងលក់ស្វាយ​ចន្ទី​ក្នុងស្រុកឱ្យអស់លទ្ធភាព យើងគិត​ទីផ្សារ​ក្នុងស្រុក​សំខាន់​មុនពេលនាំចេញ»។

ក្រសួងពាណិជ្ជកម្មបានជ្រើសរើសសហគ្រាស២ ជាសមាជិកសមាគមស្វាយចន្ទីកម្ពុជា ដែល​មាន​ផលិតផលស្តង់ដា យកទៅដាក់លក់នៅ៧/១១ ក្នុងប្រទេសកម្ពុជា និងថៃ។

កន្លងមក សហគ្រា​ស​ជាសមាជិកសមាគមស្វាយចន្ទីកម្ពុជាមួយត្រូវបានជ្រើសរើសដាក់លក់​ផលិតផល​ស្វាយចន្ទីកែច្នៃនៅ ៧/១១ រួចហើយ។

យោងតាមសមាគមស្វាយចន្ទីកម្ពុជា គិតត្រឹមរយៈពេល ១០ ខែ (មករា-តុលា) ឆ្នាំ ២០២៤ កម្ពុជាផលិតស្វាយចន្ទីបានចំនួន ៨៤ ម៉ឺនតោន កើនឡើង ២៦% បើធៀប​នឹងរយៈពេលដូចគ្នា​នៅឆ្នាំ ២០២៣ ក្នុងនោះកម្ពុជាបាននាំចេញគ្រាប់ស្វាយចន្ទីឆៅ ទៅកាន់ទី​ផ្សារ​វៀត​​ណាម បានជាង ៧៩ ម៉ឺនតោន កើនឡើង ៣១% គិតជាទឹកប្រាក់ ១ ពាន់ ១០០ លាន​ដុល្លារ​ កើនឡើង៩%៕

អត្ថបទ៖ ឡេង ដេត