គិតត្រឹមខែកុម្ភៈ មានអ្នកចុះឈ្មោះក្នុងសេដ្ឋកិច្ចក្រៅប្រព័ន្ធសរុបជាង ១ ម៉ឺន

រដ្ឋមន្ត្រី​ក្រសួង​ឧស្សាហកម្ម វិទ្យាសាស្ត្រ បច្ចេកវិទ្យា និង​នវានុវត្តន៍ លោក ហែម វណ្ណឌីបាន​ឱ្យដឹងថា គិតត្រឹមថ្ងៃទី១១ ខែកុម្ភៈ ឆ្នាំ២០២៥ ថ្នាលចុះ​ឈ្មោះអ្នកសេដ្ឋកិច្ចក្រៅ​ប្រព័ន្ធបាន​ទទួលពាក្យចុះ​ឈ្មោះ​ចំនួន ១១ ៤៤៧ ដែល​ភាគច្រើន​ស្ថិតក្នុងភូមិសាស្ត្ររាជធានីភ្នំពេញ។

ថ្លែងក្នុង​កិច្ច​ប្រជុំពិនិត្យវឌ្ឍនភាពនៃវិធានការគន្លឹះ ដែល​អនុវត្តដោយក្រសួង-ស្ថាប័នពាក់ព័ន្ធ នៅ​ថ្ងៃ​ទី​១២ ខែ​កុម្ភៈ លោក ហែម វណ្ឌឌី បាន​មាន​ប្រសាសន៍​ថា ផ្អែកទៅលើលទ្ធផលដែលសម្រេចបាននាពេលកន្លងមក ក៏ដូចជាដើម្បី​ពង្រីក​ការ​ចុះឈ្មោះ​នៅទូទាំង​ប្រទេសឱ្យបានកាន់តែប្រសើរបន្ថែមទៀត ក្រសួង-ស្ថាប័ន និង​រដ្ឋបាល​ថ្នាក់​ក្រោមជាតិ គួរតែ​បង្កើន​យុទ្ធនាការផ្សព្វ​ផ្សាយ និង​បន្ត​រៀបចំ​អត្ថប្រយោជន៍​សម្រាប់​អ្នក​សេដ្ឋកិច្ច​ក្រៅប្រព័ន្ធ ដោយ​លើកឡើង​ជា​ឧទាហរណ៍​ពី​គម្រោងពង្រឹងស្តង់ដារអនាម័យ និងរបៀបរៀបរយ​សម្រាប់អ្នក​លក់​អាហារតាម​ចិញ្ចើម​ថ្នល់ និង​តាមផ្សារ ដែលនឹងអនុវត្តសាកល្បងក្នុងភូមិសាស្ត្រខេត្តកំពង់ធំ។

មិន​តែប៉ុណ្ណោះ ត្រូវយកចិត្តទុកដាក់​ក្នុងការពន្លឿនវឌ្ឍនភាព ក្នុងចំណោម​រដ្ឋបាលថ្នាក់​ក្រោមជាតិ ទាក់ទងនឹងការ ចុះឈ្មោះ និងការធានា​ថាអ្នកសេដ្ឋកិច្ចក្រៅប្រព័ន្ធ​ដែល​បានចុះឈ្មោះហើយ អាច​ទទួលបានអត្ថប្រយោជន៍​ពិតប្រាកដ។ បន្ថែមពីនេះ សមាគមធុរកិច្ច​នានា គួរ​ជំរុញចលនា​ចាប់យក​ស្តង់ដារ​អនាម័យ​ទាំងនេះ​ក្នុងចំណោម​អ្នកសេដ្ឋកិច្ចក្រៅប្រព័ន្ធ។

លោក​ថា គណៈកម្មាធិការ​សម្របសម្រួល​ការ​អភិវឌ្ឍសេដ្ឋកិច្ចក្រៅប្រព័ន្ធ ក៏កំពុងរៀបចំប្រព័ន្ធពិនិត្យតាមដាន និងវាយតម្លៃ ដើម្បីតាមដាន​សូចនាករសំខាន់ៗ ពង្រឹងគណនេយ្យភាព និងត្រៀម​របាយការណ៍​វឌ្ឍនភាព​ដើម្បី​ដាក់​ជូន​រាជ​រដ្ឋាភិបាលផងដែរ។

កិច្ចប្រជុំ រៀបចំឡើងដោយបាន​ពិនិត្យការ​អនុវត្តវិធានការគន្លឹះទាំង៤៥ និងកំណត់បញ្ហា​ប្រឈមមួយចំនួន​នៃការអនុវត្តយុទ្ធសាស្ត្រ​ជាតិក្នុងចំណោមក្រសួង-ស្ថាប័ន និងរដ្ឋបាលថ្នាក់ក្រោមជាតិ ក៏ដូចជា​ការ​ពិភាក្សាអំពីយន្តការគាំទ្រ និងការបន្តរៀបចំអត្ថប្រយោជន៍ពាក់ព័ន្ធនឹងពន្ធដារ ការអភិវឌ្ឍជំនាញ សេវាហិរញ្ញវត្ថុ សេវាគាំពារសង្គម និងបេឡាជាតិសន្តិសុខសង្គម (ប.ស.ស) ជាដើម។

កាលពីថ្ងៃទី២០ ខែមករា ឆ្នាំ២០២៥ គណៈកម្មាធិការសម្របសម្រួលការអភិវឌ្ឍសេដ្ឋកិច្ចក្រៅប្រព័ន្ធ បានសហការជាមួយរដ្ឋបាលរាជធានីភ្នំពេញ រៀបចំយុទ្ធនាការផ្សព្វផ្សាយ​ដែលមានការ​ចូលរួមពីអ្នក​សេដ្ឋកិច្ចក្រៅ​ប្រព័ន្ធ​ប្រមាណ ១.៥០០ នាក់ ក្នុងគោលដៅជំរុញការចុះឈ្មោះឱ្យកាន់តែទូលំទូលាយ។ គណៈកម្មាធិការ ក៏គ្រោង​រៀបចំ​យុទ្ធនាការ​ស្រដៀងគ្នា​នេះនៅខេត្តបាត់ដំបង នៅថ្ងៃទី២៣ ខែកុម្ភៈ ខេត្តសៀមរាប កំពង់ស្ពឺ កំពង់ធំ និងខេត្តផ្សេងៗទៀតជាបន្តបន្ទាប់៕