ថៃរំពឹង​ពីកំណើនខ្ពស់នៃទីផ្សាររថយន្តអគ្គិសនីនៅឆ្នាំនេះ​

ការលក់រថយន្តអគ្គិសនី​នៅក្នុងប្រទេសថៃរំពឹង​ថានឹង​មាន​កំណើនខ្លាំងក្លានៅឆ្នាំ ២០២៥ នេះ ដែល​ជំរុញ​ដោយ​តម្រូវការផលិតកម្ម និងការឧបត្ថម្ភធនរបស់រដ្ឋាភិបាល។ នេះបើតាម​ការ​ចុះផ្សាយ​របស់​ទីភ្នាក់ងារសារព័ត៌មាន​រ៉យទ័រ​​។

​ក្នុងសារទៅកាន់ទីភ្នាក់ងារសារព័ត៌មាន​រ៉យទ័រកាលពីប៉ុន្មានសប្ដាហ៍មុន​ ប្រធានសមាគមយានយន្តអគ្គិសនីថៃ (EVAT) លោក Suroj Sangsnit បានឱ្យដឹងថា ការលក់រថយន្តអគ្គិសនី​ក្នុងប្រទេសថៃ ដែល​មាន​ទីផ្សាររថយន្តអគ្គិសនីធំជាងគេនៅអាស៊ីអាគ្នេយ៍ ​នឹងកើនឡើង ៤០ ភាគរយ នៅឆ្នាំនេះ ដោយ​​លើសពី ១០០ ០០០ គ្រឿង ​និងស្ទុះងើបឡើងវិញពីការធ្លាក់ចុះ ៨ ភាគរយ នៃការលក់កាលពីឆ្នាំមុន។

កំណើននៃការលក់​តាម​ការ​រំពឹងទុក គឺដោយសារតែកម្មវិធីលើកទឹកចិត្តថ្នាក់ជាតិរបស់​រដ្ឋាភិបាល​ ដែលតម្រូវឱ្យក្រុមហ៊ុននានា​ផលិតរថយន្ត​ចំនួន «១,៥ គ្រឿង»​ ​ ចំពោះគ្រប់ពេល​នាំចូល​រថយន្ត១គ្រឿង​ ចន្លោះឆ្នាំ ២០២២ និង ២០២៣ ​ដើម្បីមានលក្ខណៈគ្រប់គ្រាន់សម្រាប់ការលើកលែង​ពន្ធ និងជៀសវាងការ​ពិន័យធ្ងន់ធ្ងរ។ គោលនយោបាយរបស់រដ្ឋាភិបាលបានជំរុញឱ្យ​មាន​កំណើន​ផលិតកម្មរថយន្តអគ្គិសនី​។

កម្មវិធីលើកទឹកចិត្ត​ ដែលផ្តល់ការឧបត្ថម្ភធនរហូតដល់ ១៥០ ០០០ បាត (៤ ៤០០ ដុល្លារ) បាន​ជួញ​ឱ្យថៃក្លាយជា​ទីផ្សាររថយន្តអគ្គិសនីធំបំផុតនៅអាស៊ីអាគ្នេយ៍ ដោយ​លក់រថយន្តអគ្គិសនីប្រមាណ ៧០ ០០០ គ្រឿង​នៅឆ្នាំមុន និង​បាន​នាំចូល ៨៤ ០០០ គ្រឿងនៅចន្លោះឆ្នាំ ២០២២ និង ២០២៣។

យ៉ាងណា​មិញ ​អ្នកវិភាគព្រមានថា គោលនយោបាយដដែលអាចធ្វើ​​​ឱ្យ​ការប្រកួតប្រជែងតម្លៃរថយន្តកាន់តែអាក្រក់នៅក្នុងទីផ្សារ ចំពេលដែល​ការ​លក់រថយន្តទូទៅធ្លាក់ចុះ​ ដោយសារតែការរឹតត្បឹតប្រាក់កម្ចីរបស់​ធនាគារ និង​បំណុលគ្រួសារ​ខ្ពស់។ ​

ក្រៅពីនេះ​ ការឧបត្ថម្ភធន និងការលើកទឹកចិត្តពន្ធរបស់ថៃ ដែលមានបំណង​ធ្វើឱ្យ​ផលិតកម្មរថយន្តអគ្គិសនី​រួម​ចំណែក ៣០ ភាគរយ នៃ​ផលិតកម្មរថយន្តទូទៅ​នៅឆ្នាំ ២០៣០ បានទាក់ទាញការវិនិយោគលើវិស័យរថយន្តអគ្គិសនីចិន​ជាច្រើន​ ដូចជាក្រុមហ៊ុន BYD, Great Wall Motor, Changan និង GAC AION ជាដើម។ ការណ៍នេះ​ បង្កក្ដីបារម្ភមួយទៀត គឺការផ្គត់ផ្គង់លើសតម្រូវការ៕

​