ក្រុមហ៊ុនអាកាសចរណ៍ Ruili តភ្ជាប់ជើងហោះហើរឡើងវិញ ដឹកភ្ញៀវទេសចរចិន ១២៥ នាក់ ចុះចតនៅខេត្តព្រះសីហនុ

លោក វ៉ាង វិនពិន ឯកអគ្គរដ្ឋទូតសាធារណរដ្ឋប្រជាមានិតចិនប្រចាំកម្ពុជា មានប្រសាសន៍ថា ជើងហោះ​ហើរត្រង់​រវាងទី​ក្រុង​វ៉ូស៊ី និងក្រុងព្រះសីហនុ ត្រូវបានចាប់ផ្ដើមដំណើរការឡើងវិញ ដោយក្រុមហ៊ុនអាកាសចរណ៍ Ruili Airlines ចាប់ពីថ្ងៃទី ១៨ ខែ ឧសភានេះ ហើយការតភ្ជាប់នេះ នឹងបំពេញតម្រូវការកាន់តែច្រើនសម្រាប់អ្នកដំណើរធុរជន និងទេសចរណ៍។

ក្រុមហ៊ុនអាកាសចរណ៍ Ruili Airlines នៅថ្ងៃទី ១៨ ខែឧសភា ឆ្នាំ ២០២៥ បានចាប់ផ្តើមតភ្ជាប់ជើង​ហោះ​ហើរប្រចាំសប្ដាហ៍​ឡើង​​វិញមកខេត្តព្រះសីហនុ ដោយបានដឹកភ្ញៀវទេសចរ ជនជាតិចិនចំនួន១២៥នាក់ មកពី​ទី​ក្រុង​វ៉ូស៊ី ខេត្តជាំងស៊ូ ប្រទេសចិន ចុះចតនៅលានយន្តហោះ កងកេង ក្រុងកំពង់សោម ខេត្តព្រះសីហនុ ដើម្បី​ទស្ស​នាកម្សាន្ត តាមបណ្តារមនីយដ្ឋាននានាក្នុងខេត្តព្រះសីហនុ។

នេះជាងជើងហោះហើររបស់ក្រុមហ៊ុនអាកាសចរណ៍ចិន ជាលើកដំបូងបន្ទាប់ពីការផ្អាករយៈពេលជាង២ឆ្នាំ នៅ​អា​កាស​​​​យានដ្ឋានអន្តរជាតិខេត្តព្រះសីហនុ។

យោងតាមក្រសួងទេសចរណ៍ កម្ពុជាបានស្វាគមន៍ភ្ញៀវទេចរអន្តរជាតិជាង​ ១,៨៣ លាននាក់ក្នុងត្រីមាសទី១ កើនឡើង១៦,១%ធៀបនឹងរយៈពេលដូចគ្នាកាលពីឆ្នាំមុន បង្ហាញអំ​ពីភាពល្អប្រសើរនៃលំហូរទេសចរណ៍​ទាំង​ក្នុង​តំបន់ និងសកលលោក ក្នុងនោះមានភ្ញៀវទេស​ចរឥណ្ឌូនេស៊ីជាង ៤ ម៉ឺននាក់ កើន៧%។

ក្នុងចំណោមភ្ញៀវទេសចរជាង ១,៨៣ លាននាក់ ទេសចរណ៍ថៃឈរនៅ​លំដាប់​លេខរៀងទី ១ មាន​ចំនួនជាង ៥០,១៦ ម៉ឺននាក់ កើន ១៩,៥% វៀតណាមជាង ៣០,៤៦ ម៉ឺននាក់ កើន ១,៨% និងចិនជាង ២៨,៦១% កើន ៥០,៦%។

នៅក្នុងឆ្នាំ២០២៤ កម្ពុជា​ទទួលបានភ្ញៀវទេសចរណ៍​អន្តរជាតិ​ជាង ៦,៧ លាន​នាក់ ​កើន​ឡើង​ជិត ២៣ ភាគរយ បើធៀបនឹងឆ្នាំ ២០២៣ ដែលមានចំនួន ៥,៤៥ លាននាក់៕

អត្ថបទ៖ ឡេង ដេត