Microsoft គ្រោងបញ្ឈប់បុគ្គលិកជិត ៤% ខណៈបង្កើនការវិនិយោគលើ AI

ក្រុមហ៊ុនបច្ចេកវិទ្យាយក្ស Microsoft បាន​ឱ្យដឹងកាលពីថ្ងៃអង្គារថា ខ្លួន​នឹង​កាត់បញ្ឈប់បុគ្គលិកប្រមាណជិត ៤ ភាគរយ នៃបុគ្គលិកសរុប ចំពេលដែលក្រុមហ៊ុនបង្កើនការវិនិយោគសម្រាប់បញ្ញាសិប្បនិម្មិត (AI)។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ។

ការបញ្ឈប់របស់ Microsoft ដែលមានបុគ្គលិកប្រហែល ២២៨ ០០០ នាក់ នៅទូទាំងពិភពលោក​គិតត្រឹមខែមិថុនា ឆ្នាំ ២០២៤ នឹង​ប៉ះពាល់ដល់បុគ្គលិករាប់ពាន់នាក់។ Microsoft ថា ខ្លួនគ្រោងនឹងកាត់បន្ថយបុគ្គលិកផ្នែកគ្រប់គ្រង និងសម្រួលផលិតផល ដំណើរការការងារ​ផ្សេងៗ និងតួនាទីការងារ​។

កាលពីខែឧសភា ក្រុមហ៊ុននេះបាន​ប្រកាសបញ្ឈប់បុគ្គលិកប្រមាណ ៦ ០០០ នាក់ រួចហើយ ខណៈ Bloomberg News បានរាយការណ៍កាលពីខែមុនថា Microsoft មានគម្រោងកាត់បន្ថយការងាររាប់ពាន់នាក់ ជាពិសេសផ្នែកលក់។

ការ​កាត់​បន្ថយ​​បុគ្គលិកនេះ ធ្វើ​ឡើង​​ខណៈ Microsoft បន្ត​វិនិយោគ​ប្រាក់​ដ៏​ច្រើនសណ្ធឹក​ក្នុង​មជ្ឈមណ្ឌល​ទិន្នន័យ បន្ទះ​​ឈីប​កុំព្យូទ័រ​ឯកទេស និង​ហេដ្ឋារចនាសម្ព័ន្ធ​ផ្សេង​ទៀត​ដែល​ត្រូវ​ការ​ដើម្បី​ជំរុញ​មហិច្ឆតា AI របស់​ខ្លួន។ ក្រុមហ៊ុនបានរំពឹងថា ការចំណាយទាំងនោះ​នឹង​សរុបទាំងអស់ប្រហែល ៨០ ​ប៊ីលានដុល្លារក្នុងឆ្នាំសារពើពន្ធចុងក្រោយ។ ឆ្នាំសារពើពន្ធថ្មីរបស់​ក្រុមហ៊ុន បានចាប់ផ្តើមកាលពីថ្ងៃអង្គារ។

គួរគូសបញ្ជាក់ថា ក្រុមហ៊ុនបច្ចេកវិទ្យាធំៗដែលវិនិយោគលើ AI ក៏កំពុងកាត់បន្ថយការងារផងដែរ។Meta បាននិយាយ​កាលពីដើមឆ្នាំនេះ ​ខ្លួន​នឹង​បញ្ឈប់បុគ្គលិកប្រហែល ៥ ភាគរយ ខណៈ​ Google បានបញ្ឈប់ការងាររាប់រយនាក់កាលពីឆ្នាំមុន។ Amazon ឯណោះវិញ បានកាត់បន្ថយការងារនៅក្នុងផ្នែកជាច្រើន រួមទាំងផ្នែកប្រតិបត្តិការលក់សៀវភៅ និងឧបករណ៍ ផ្នែកសេវាកម្ម និងក្រុមទំនាក់ទំនងរបស់ខ្លួន៕