ព័ត៌មានអន្ដរជាតិ

យោធាអាមេរិកទម្លាយថាពួកគេប្រើប្រាស់ AI កម្រិតខ្ពស់ ក្នុងសង្រ្គាមជាមួយអ៊ីរ៉ង់

បានផុស

៤ ខែ មុន

នៅ

ថ្ងៃព្រហស្បតិ៍ ១២ មីនា ២០២៦

ដោយ

មន្ត្រីយោធាសហរដ្ឋអាមេរិក បានបញ្ជាក់ថា យោធារបស់អាមេរិកបានប្រើប្រាស់ឧបករណ៍បញ្ញាសិប្បនិម្មិត (AI) ជាច្រើនប្រភេទក្នុងសង្គ្រាមជាមួយអ៊ីរ៉ង់ ខណៈមានការព្រួយបារម្ភកាន់តែខ្លាំងនៃការកើនឡើងចំនួនជនស៊ីវិលដែលស្លាប់ក្នុងជម្លោះនេះ។

យោងតាម Al Jazeera ផ្សាយថ្ងៃទី១១ ខែមីនា ឆ្នាំ២០២៦, លោក Brad Cooper ប្រធានបញ្ជាការកណ្តាលសហរដ្ឋអាមេរិក (CENTCOM) លើកឡើងកាលពីថ្ងៃពុធថា បញ្ញាសិប្បនិម្មិត (AI) កំពុងជួយទាហានអាមេរិកឱ្យដំណើរការទិន្នន័យយ៉ាងច្រើន។

លោក Brad Cooper ប្រធានបញ្ជាការកណ្តាលអាមេរិក! រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Cooper និយាយក្នុងសារជាវីដេអូមួយថា៖ «អ្នកប្រយុទ្ធក្នុងសង្គ្រាមរបស់យើងកំពុងប្រើប្រាស់ឧបករណ៍ AI កម្រិតខ្ពស់ជាច្រើនប្រភេទ។ ប្រព័ន្ធទាំងនោះជួយយើងឱ្យវិភាគទិន្នន័យយ៉ាងច្រើនក្នុងរយៈពេលតែប៉ុន្មានវិនាទី ដូច្នេះក្រុមទាហានរបស់យើងអាចកាត់បន្ថយសំឡេងរំខាន និងធ្វើការសម្រេចចិត្តដ៏ឆ្លាតវៃជាងសត្រូវដែលមានប្រតិកម្ម»។

លោកបន្តថា៖ «មនុស្សតែងតែធ្វើការសម្រេចចិត្តចុងក្រោយលើអ្វីដែលត្រូវបាញ់ អ្វីដែលមិនត្រូវបាញ់ និងពេលណាដែលត្រូវតែបាញ់។ ប៉ុន្តែឧបករណ៍ AI កម្រិតខ្ពស់នេះអាចប្រែក្លាយដំណើរការដែលធ្លាប់តែចំណាយពេលច្រើនម៉ោង ទៅជាខ្លីបាន និងជួនកាលពីច្រើនថ្ងៃទៅជាវិនាទីទៀតផង»។

ការបញ្ជាក់នេះកើតឡើងពេលមានការអំពាវនាវឱ្យមានការស៊ើបអង្កេតឯករាជ្យកាន់តែខ្លាំងលើការទម្លាក់គ្រាប់បែកលើសាលារៀនមួយនៅភាគខាងត្បូងប្រទេសអ៊ីរ៉ង់ ដែលសម្លាប់មនុស្សជាង ១៧០នាក់ ភាគច្រើនជាកុមារ។

ទោះបីជាលោក Cooper បានសង្កត់ធ្ងន់ថាមនុស្សកំពុងធ្វើការសម្រេចចិត្តកំណត់គោលដៅចុងក្រោយក៏ដោយ តែក្រុមអ្នកសិទ្ធិមនុស្សសម្តែងការព្រួយបារម្ភកាន់តែខ្លាំងលើការប្រើប្រាស់ AI ក្នុងសង្គ្រាម។

គួរបញ្ជាក់ថារបាយការណ៍ជាច្រើនរកឃើញថាអ៊ីស្រាអែលពឹងផ្អែកយ៉ាងខ្លាំងទៅលើ AI អំឡុងពេលសង្គ្រាមប្រល័យពូជសាសន៍របស់ពួកគេលើតំបន់ហ្គាហ្សា សម្លាប់ជនជាតិប៉ាឡេស្ទីនជាង ៧២ ០០០នាក់ ចាប់តាំងពីខែតុលា ឆ្នាំ២០២៣ ៕

ប្រែសម្រួល៖ ណឺ មិនា