អ្នកជំនាញថៃព្រមានពីផលប៉ះពាល់ធ្ងន់​នៃពន្ធ ៣៦% របស់ ត្រាំ ខណៈជំរុញពន្លឿនការចរចា

អ្នកជំនាញក្នុងប្រទេសថៃ កំពុងសម្ដែងការព្រួយបារម្ភពីផលប៉ះពាល់ធ្ងន់ធ្ងរនៃពន្ធខ្ពស់ ៣៦ ភាគរយ ​លើទំនិញថៃ របស់ប្រធានាធិបតីសហរដ្ឋអាមេរិក ដូណាល់ ត្រាំ ​ខណៈជំរុញឱ្យ​​រដ្ឋាភិបាល​​​ពន្លឿនការចរចាដើម្បីបន្ធូរបន្ថយ​វា។

​បញ្ហា​ដែលត្រូវបាន​លើកឡើងរួមមានផលប៉ះពាល់​លើការប្រកួតប្រជែងសម្រាប់កា​រនាំចេញ និងការធ្លាក់ចុះនៃទំនុកចិត្តវិនិយោគិន ជាពិសេសវិនិយោគិនពីបរទេស ​ស្របពេល​ដែល​សេដ្ឋកិច្ចថៃ ដែលពឹង​ផ្អែកខ្លាំងលើការនាំចេញ ប្រឈមនឹង​បញ្ហា​ផ្សេងៗរួចហើយរួមទាំង​វិបត្តិនយោបាយ វិបត្តិទេសចរណ៍ និងបំណុលគ្រួសារ ដែលធ្វើឱ្យ​កំណើនដើរយឺតយ៉ាវ។

រដ្ឋមន្រ្តីក្រសួង​ហិរញ្ញវត្ថុថៃ លោក Pichai Chunhavajira ដែល​ដឹកនាំក្រុមចរចាថៃ បាននិយាយថា លោក​ភ្ញាក់ផ្អើលនឹង​ការសម្រេចចិត្តរបស់អាមេរិក ប៉ុន្តែ​លោក​មា​នទំនុកចិត្តថា​ ថៃ​នៅតែ​អាច​ចរចា​កាត់បន្ថយ​ពន្ធ​ខ្ពស់នេះ មុនពេលវា​ចូល​ជាធរមាន​នៅ​ថ្ងៃទី​១ ខែសីហា​។

ក្រោយ​អាមេរិកប្រកាសកិច្ចព្រមព្រៀងពន្ធ ២០ ភាគរយ លើវៀតណាម លោក Pichai និងមន្រ្តីថៃផ្សេងទៀត​ បាន​អះអាងថា ថៃអាច​នឹង​ជាប់ពន្ធតិចជាងវៀតណាម យ៉ាងណាមិញបាន​សុំឱ្យ​អាមេរិក​ពន្យារពេល​បន្ថែមដើម្បីចរចា។ ខណៈជួបការលំបាក ហើយថ្ងៃកំណត់ចាស់ (៩ កក្កដា) ខិតជិតមកដល់ ថៃបាន​បញ្ជូនសំណើថ្មីទៅសហរដ្ឋអាមេរិកកាលពីថ្ងៃអាទិត្យ​ ដោយ​បន្ថែមការបើកទីផ្សារសម្រាប់ទំនិញកសិកម្ម និងឧស្សាហកម្មអាមេរិក រួមជាមួយ​ការទិញថាមពលអាមេរិក​ ដើម្បីកាត់បន្ថយអតិរេកពាណិជ្ជកម្មជាង ៤៦ ប៊ីលាន​ដុល្លារ កាលពីឆ្នាំមុន។

ខណៈវៀតណាមបើកទីផ្សារទាំងស្រុងឱ្យសហរដ្ឋអាមេរិកដោយ​មិនគិតពន្ធ លោក Pichai បាន​ឱ្យដឹងថា ក្នុងសំណើថ្មី ប្រទេសថៃបានយល់ព្រមកាត់បន្ថយពន្ធនាំចូលសម្រាប់ជាង​ ៩០ ភាគរយ នៃទំនិញអាមេរិក ដោយ​មុខទំនិញមួយចំនួនត្រូវបានកាត់បន្ថយអត្រាពន្ធមកត្រឹមសូន្យ​ភាគរយ​។

យ៉ាងណាមិញ លោកបាន​ពន្យល់យ៉ាងដូច្នេះថា៖ «មានទំនិញ(អាមេរិក​)ប្រហែល ១០ ភាគរយ​ ដែលយើងមិនអាចកាត់បន្ថយ​ពន្ធបាន​ ដោយសារយើងត្រូវការពារអាជីវកម្មក្នុងស្រុក និងធានាថាវិធានការពន្ធ មិនប៉ះពាល់យ៉ាងធ្ងន់ធ្ងរដល់ទំនិញពីប្រទេសដទៃ ដែលថៃ​មានកិច្ចព្រមព្រៀងពាណិជ្ជកម្មសេរី (FTAs) ជាមួយ ហើយក៏ជាទីផ្សារនាំចេញដ៏សំខាន់ផងដែរនោះ»។

បច្ចុប្បន្ន ថៃមាន​រយៈពេលប្រហែល ៣ សប្ដាហ៍ ដើម្បីចរចាទម្លាក់ពន្ធ ខណៈប្រទេសគូប្រជែងដទៃក្នុងតំបន់ រងនូវពន្ធតិចជាងថៃ ក្នុងនោះរួមមាន វៀតណាម (២០ ភាគរយ) ម៉ាឡេស៊ី (៣៥ ភាគរយ) និងឥណ្ឌូណេស៊ី (៣២ ភាគរយ)។

ដោយសារតែកម្រិតខ្ពស់ជាងគូប្រជែងនេះហើយ ​ទើប​​អ្នកជំនាញថៃ​​ព្រមានពីផលប៉ះពាល់លើការប្រកួតប្រជែងសម្រាប់ទំនិញនាំចេញថៃ និងការវិនិយោគនៅក្នុងស្រុក​ថៃ រួមទាំងលទ្ធភាពដែលថា វិនិយោគបរទេសជាពិសេសពីចិន និងជប៉ុន អាច​ផ្លាស់ប្ដូរទីតាំងផលិតកម្មរបស់ខ្លួនចេញពីប្រទេសថៃ ទៅកាន់ប្រទេសផ្សេងទៀត​។

សេដ្ឋវិទូ និងជាអ្នកជំនាញខាងគោលនយោបាយម៉ាក្រូសេដ្ឋកិច្ច លោក Kobsak Pootrakool បានលើកឡើងថា ប្រសិនបើវៀតណាមប្រឈមមុខនឹងពន្ធ ២០ ភាគរយ​ ហើយម៉ាឡេស៊ី ២៥ ភាគរយ ​នោះវាទាបជាងថៃចន្លោះពី ១០-១៦ ភាគរយ ​ដែល​នេះ​នឹងជះឥទ្ធិពលយ៉ាងខ្លាំងដល់ក្រុមហ៊ុននាំចេញថៃ ដោយសារដៃគូពាណិជ្ជកម្មអាចជ្រើសរើសទិញទំនិញពីប្រទេស ដែល​ត្រូវចំណាយទាបជាងសម្រាប់ពន្ធ។ នេះបើតាមការចុះផ្សាយរបស់កាសែត The Nation។

ចំពោះផលប៉ះពាល់លើការវិនិយោគ លោក Kobsak ដែលជំរុញឱ្យថៃបង្កើនការចរចា យល់ឃើញ​ថា ថ្លៃពន្ធខ្ពស់​នៅថៃនឹងមានឥទ្ធិពលយ៉ាងខ្លាំងលើការសម្រេចចិត្តវិនិយោគពីបរទេស ដោយសារអ្នកវិនិយោគអាចជ្រើសរើសបង្កើតរោងចក្រនៅក្នុងប្រទេសដែលមានអត្រាពន្ធទាប ដូចជាវៀតណាមជាដើម។

ជាមួយ​គ្នា​នោះ ប្រធានសមាគមអចលនទ្រព្យថៃ លោក Pornarit Chounchaisit បាន​និយាយបន្ថែម​ថា ពន្ធ ៣៦ ភាគរយ ​បង្កការគំរាមកំហែងទាំង​សម្រាប់​សួនឧស្សាហកម្មថៃ ដែល​មាន​ការវិនិយោគបរទេសរួមចំណែកសំខាន់ ជាពិសេស​ច្រករបៀងសេដ្ឋកិច្ចភាគខាងកើត (EEC)។ ​បញ្ហាពន្ធ ​ក៏​បង្ក​ការ​ព្រួយបារម្ភ​អំពី​អនាគត​នៃ​ការ​វិនិយោគ​បរទេស​ក្នុង​ប្រទេស​ថៃ ជាពិសេស​ពី​​ចិន។ ក្រុមហ៊ុនចិនជាច្រើនបាននឹងកំពុងទិញដី​ក្នុងប្រទេសថៃ ជាពិសេសនៅតំបន់ឧស្សាហកម្មក្នុង EEC។ ​ប្រសិន​បើ​តម្លៃផលិតកម្មខ្ពស់​ នោះក្រុមហ៊ុនទាំង​នោះអាចពិចារណាផ្លាស់ប្តូរទីតាំងផលិតកម្មរបស់​គេទៅកន្លែងផ្សេង។

ខណៈជំរុញការចរចា ​នាយកគ្រប់គ្រង និងជាប្រធានសេដ្ឋវិទូនៃក្រុមហ៊ុន Kiatnakin Phatra Financial Group លោក​ Pipat Luengnaruemitchai ឯណោះវិញ បាន​និយាយថា ស្ថានភាពបច្ចុប្បន្ន ថៃពិបាកចរចាក្រោមយុទ្ធសាស្រ្តឈ្នះ-ឈ្នះជាមួយ​រដ្ឋបាល ត្រាំ ណាស់ ដែល​ទាមទារឱ្យថៃត្រូវពិចារណាពីយុទ្ធសាស្រ្ត «ផ្ដល់ឱ្យ និងយកមកវិញ» តាមរយៈការយល់ឱ្យ​ច្បាស់ពីការទាមទាររបស់សហរដ្ឋអាមេរិក​។

​ចំណែកឯអតីតរដ្ឋមន្ត្រីក្រសួងហិរញ្ញវត្ថុថៃ លោក Korn Chatikavanij ​បាន​យល់ស្របការណ៍ដែលថា ថៃពិបាក​ប្រើយុទ្ធសាស្រ្តឈ្នះ​ទាំងសងខាង ហើយថា ពន្ធ ៣៦ ភាគរយ គឺជា «លទ្ធផលនៃលទ្ធភាព​ដ៏អាក្រក់បំផុត»។

តាមការចុះផ្សាយរបស់សារព័ត៌មាន​ Thai Enquirer លោក​បាន​រិះគន់ក្រុមចរចាថៃ មិនមើលពីស្ថានការណ៍ឱ្យ​រហ័ស មិនដូចជាវៀតណាម ដែល​ប្រើសំណើយុទ្ធសាស្រ្តផ្សេងៗដើម្បីបាន​​ទម្លាក់ពន្ធមកត្រឹម ២០ ភាគរយ។ អតីតរដ្ឋមន្រ្តីដដែល បន្តយ៉ាងដូច្នេះថា៖ «សំណួរសួរថា ​ក្នុងការចរចា តើយើង​បន្ត​ព្យាយាមការពារអ្នកណា? តើ​ការការពារនោះសាកសមនឹងការលំបាកសម្រាប់អ្នកនាំចេញ និងការបាត់បង់ប្រាក់ចំណូលសម្រាប់ប្រទេសដែរឬទេ?​»៕