ភ្ញៀវបរទេសទៅថៃធ្លាក់ចុះ ខណៈវិស័យទេសចរណ៍ជំរុញឱ្យ អានុទីន ពង្រឹងទំនាក់ទំនងទេសចរណ៍ជាមួយចិន

ចំនួនភ្ញៀវទេសចរបរទេសទៅលេងប្រទេសថៃ បានធ្លាក់ចុះ ៣,០៩% មកនៅត្រឹម ១៦,៧លាននាក់ ក្នុងអំឡុងថ្ងៃទី១ ខែមករា ដល់ថ្ងៃទី១១ ខែកក្កដា ឆ្នាំ២០២៦ បើធៀបនឹងរយៈពេលដូចគ្នាកាលពីឆ្នាំមុន។ ​នេះបើតាមទិន្នន័យពីក្រសួងទេសចរណ៍ និងកីឡាថៃ​កាលពីថ្ងៃពុធ ខណៈវិស័យទេសចរណ៍របស់ប្រទេស កំពុងប្រឈមនឹងសម្ពាធពីការធ្លាក់ចុះនៃទីផ្សារទេសចរណ៍សំខាន់ៗ។

ស្របពេល​ជាមួយគ្នានោះ ​សមាគមភ្នាក់ងារទេសចរណ៍ថៃ (ATTA) បានអំពាវនាវឱ្យនាយករដ្ឋមន្ត្រីថៃ លោក អានុទីន ចាន់វីរ៉ាគុល ប្រើប្រាស់ដំណើរទស្សនកិច្ចផ្លូវការទៅកាន់ប្រទេសចិនក្នុងសប្ដាហ៍នេះ ដើម្បីពង្រឹងកិច្ចសហប្រតិបត្តិការផ្នែកទេសចរណ៍ និងជំរុញការតភ្ជាប់ជើងហោះហើរត្រង់រវាងប្រទេសទាំង២។

ការអំពាវនាវនេះ​ធ្វើឡើង ក្រោយសេដ្ឋកិច្ចចិនកើនឡើងយឺតជាងការរំពឹងត្រឹម ៤,៣% កាលពីត្រីមាសទី២ ​ដែលនោះជាកំណើនយឺតបំផុតក្នុងរយៈពេលជិត ៣ ឆ្នាំ។ ស្ថានភាពនេះ បានធ្វើឱ្យការចំណាយរបស់ប្រជាជនចិននៅតែទន់ខ្សោយ និងអាចប៉ះពាល់ដល់ការធ្វើដំណើរទេសចរណ៍ទៅក្រៅប្រទេស។

​មន្រ្តី ATTA បានលើកឡើងថា រដ្ឋាភិបាលថៃគួរចរចាជាមួយទីក្រុងនានារបស់ចិន ដើម្បីបង្កើនជើងហោះហើរត្រង់ និងផ្តល់សំបុត្រយន្តហោះក្នុងតម្លៃសមរម្យ។ លោកជឿថា វិធានការទាំងនេះនឹងជួយទាក់ទាញភ្ញៀវទេសចរចិនឱ្យត្រឡប់មកប្រទេសថៃវិញ ខណៈថៃនៅតែជាគោលដៅដែលមានតម្លៃសមរម្យជាងប្រទេសជាច្រើន។

ATTA ក៏បានស្នើឱ្យថៃ និងចិនធ្វើបច្ចុប្បន្នភាពកិច្ចព្រមព្រៀងទេសចរណ៍ទ្វេភាគីឡើងវិញ និងបង្កើតគណៈកម្មាធិការរួម ដើម្បីដោះស្រាយបញ្ហាសុវត្ថិភាពភ្ញៀវទេសចរ កែលម្អស្តង់ដារទេសចរណ៍ និងចែករំលែកទិន្នន័យរវាងប្រទេសទាំង២ ​ខណៈជំរុញឱ្យពន្លឿនកិច្ចសហប្រតិបត្តិការទេសចរណ៍រវាងអាស៊ាន និងចិន ដើម្បីបង្កើតផ្លូវទេសចរណ៍រួម និងពង្រឹងការតភ្ជាប់ក្នុងតំបន់។

អ្នកជំនាញថៃបានលើកឡើងថា ការធ្លាក់ចុះនៃចំនួនភ្ញៀវទេសចរបរទេស កើតឡើងដោយសារតែកង្វល់សុវត្ថិភាព ភាពមិនប្រាកដប្រជានៃសេដ្ឋកិច្ចសកល និងបញ្ហាភូមិសាស្រ្តនយោបាយ ក៏ដូចជាកំណើននៃការប្រកួតប្រជែងពីប្រទេសផ្សេងៗក្នុងតំបន់ជាដើម។

​ដោយឡែក ថ្មីៗនេះ រដ្ឋាភិបាលថៃ​បានប្រកាសកែសម្រួលគោលនយោបាយលើកលែងទិដ្ឋាការ ដើម្បីទប់ស្កាត់ការប្រើប្រាស់ខុសគោលបំណង។ ក្រោមវិធានការថ្មី ថៃនឹងបញ្ចប់ការលើកលែងទិដ្ឋាការរយៈពេល ៦០ ថ្ងៃសម្រាប់ប្រជាពលរដ្ឋពី ៩៣ ប្រទេស ហើយប្ដូរមកអនុញ្ញាតឱ្យប្រជាពលរដ្ឋពី ៦៥ ប្រទេស និងដែនដី ចូលស្នាក់នៅដោយមិនចាំបាច់មានទិដ្ឋាការ បានរយៈពេលមិនលើស ៣០ ថ្ងៃ។ រដ្ឋាភិបាលថៃបញ្ជាក់ថា ការកែប្រែនេះមានគោលបំណងធ្វើឱ្យប្រព័ន្ធទិដ្ឋាការមានតម្លាភាព និងមានស្តង់ដារកាន់តែប្រសើរ ខណៈបន្តគាំទ្រវិស័យទេសចរណ៍ និងការពារសន្តិសុខជាតិ៕