លោក ត្រាំ បង្ហាញមុខលើកាក់១ដុល្លារថ្មី បង្កឱ្យមានការជជែកវែកញែក

សហរដ្ឋអាមេរិក កំពុងផ្ទុះ​ការវែកញែក​យ៉ាងខ្លាំង បន្ទាប់ពីក្រសួងរតនាគារ បានប្រកាសថា រោងពុម្ពកាក់ជាតិ បានចាប់ផ្តើមផលិតកាក់ថ្មី ដែលមានរូបភាពរបស់ប្រធានាធិបតី ដូណាល់ ត្រាំ។ នេះ​បើយោងតាម​សារព័ត៌មាន The Guardian ចុះផ្សាយ​ថ្ងៃទី​១៦ ខែ​កក្កដា ឆ្នាំ​២០២៦។

កាក់១ដុល្លារថ្មី ត្រូវបានបង្កើតឡើង ក្នុងគោលបំណងអបអរសាទរខួប ២៥០ឆ្នាំនៃការ​កកើត​សហរដ្ឋអាមេរិក ហើយគ្រោងនឹងដាក់ឱ្យសាធារណជនប្រើប្រាស់ នៅរដូវស្លឹកឈើជ្រុះខាងមុខ។

រូបភាពនៅលើកាក់នេះ បង្ហាញពីលោក ដូណាល់ ត្រាំ ក្នុងឈុតអាវធំពាក់ក្រវាត់ក ជាមួយទឹកមុខម៉ឺងម៉ាត់។ នៅផ្នែកខាងលើនៃកាក់មានពាក្យថា «LIBERTY (សេរីភាព)» ហើយនៅខាងក្រោមមានកាលបរិច្ឆេទនៃខួប ២៥០ឆ្នាំគឺ ១៧៧៦-២០២៦។ ចំណែកឯឃ្លា «IN GOD WE TRUST» គឺត្រូវបានដាក់នៅចំកណ្តាលផ្នែក​ខាង​ស្ដាំ។ ដោយឡែក នៅផ្នែកខាងក្រោយនៃកាក់ គឺជារូបសត្វឥន្ទ្រីដ៏ធំ ដែលជានិមិត្តរូបនៃត្រាជាតិរបស់អាមេរិក។ ទោះបីជាកាក់នេះមានពណ៌មាសយ៉ាងស្រស់ស្អាតក៏ដោយ ក៏មន្ត្រីរតនាគារបានបញ្ជាក់ថា វាត្រូវបានផលិតឡើងពីលោហៈធម្មតា ដែលមិនមែនជាមាសសុទ្ធនោះទេ។

ការសម្រេចចិត្តដាក់រូបលោក ដូណាល់ ត្រាំ លើកាក់នេះ បានក្លាយជាប្រធានបទដ៏ក្តៅគគុកមួយ។ មូលហេតុចម្បង គឺដោយសារច្បាប់សហព័ន្ធអាមេរិកជាទូទៅ ហាមឃាត់មិនឱ្យមានរូបភាពបុគ្គលដែលកំពុងរស់នៅលើរូបិយប័ណ្ណផ្លូវការឡើយ។ យ៉ាងណាមិញ ក្រុមមន្ត្រីរដ្ឋាភិបាល បានបកស្រាយច្បាប់នេះថា ការដាក់រូបភាពប្រធានាធិបតីដែលកំពុងកាន់អំណាចនៅលើកាក់អនុស្សាវរីយ៍ គឺមិនមែនជាការបំពានច្បាប់នោះទេ ព្រោះវាជាការផ្តល់កិត្តិយសដល់ «ស្ថាប័នប្រធានាធិបតី» ក្នុងឱកាសខួបដ៏ពិសេសរបស់ជាតិ។ ពួកគេចាត់ទុកថា ការផលិតកាក់នេះស្ថិតក្រោមក្របខណ្ឌនៃច្បាប់ពិសេស​ឆ្នាំ ២០២០ ដែលមានអំណាចលើសពីបទប្បញ្ញត្តិធម្មតា។

លោក ដូណាល់ ត្រាំ ផ្ទាល់បានសម្តែងមតិជុំវិញរឿងនេះថា វាជារឿងប្លែកបន្តិច ប៉ុន្តែលោកមានកិត្តិយសណាស់ ដែលទទួលបានកាក់បែបនេះ។ នេះមិនមែនជាលើកទីមួយទេ ដែលលោក ត្រាំ ព្យាយាមដាក់សញ្ញាសម្គាល់របស់លោកនៅលើស្ថាប័ន ឬឯកសារសំខាន់ៗរបស់ជាតិ។ កាលពីពេលថ្មីៗ រដ្ឋាភិបាលក៏បានប្រកាសផែនការដាក់ហត្ថលេខារបស់លោក នៅលើក្រដាសប្រាក់អាមេរិកផងដែរ ដែលជាព្រឹត្តិការណ៍មិនធ្លាប់មានពីមុនមក សម្រាប់ប្រធានាធិបតីដែលកំពុងកាន់អំណាច។

ក្នុងពេលដែលអ្នកគាំទ្រមើលឃើញថា ការដាក់រូបភាពលោក ត្រាំ គឺជាការលើកតម្កើងតម្លៃស្នេហាជាតិ និងកេរ្តិ៍តំណែលនៃសេរីភាព ក្រុមអ្នករិះគន់វិញបានសម្តែងក្តីព្រួយបារម្ភថា វាអាចជាការប្រើប្រាស់គម្លាតច្បាប់ និងប៉ះពាល់ដល់ប្រពៃណីនៃការមិនដាក់រូបមេដឹកនាំ ដែលកំពុងកាន់អំណាចលើរូបិយប័ណ្ណ ដើម្បីជៀសវាងការលើកតម្កើងបុគ្គលនិយមជ្រុស​ហួសហេតុ៕

ប្រែសម្រួល៖ ឈាង