រដ្ឋមន្ត្រីឧស្សាហកម្ម ជំរុញឱ្យគណៈកម្មាធិការប្រយុទ្ធប្រឆាំងផលិតផលក្លែងក្លាយផ្តោតលើការការពារអ្នកប្រើប្រាស់ និងគាំទ្រសហគ្រាសក្នុងស្រុក

លោក ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បាន​ជុំ​រុញ​ឱ្យ​គណៈកម្មាធិការ​ប្រយុទ្ធប្រឆាំងផលិតផលក្លែងក្លាយផ្តោតលើការការពារអ្នកប្រើប្រាស់ ការគាំ​ទ្រសហគ្រាស​ក្នុងស្រុក និងការរួមចំណែកដល់ការចុះបញ្ជីប្រកាសនីយបត្រតក្កកម្ម ដើម្បីជំរុញនវានុវត្តន៍។

ក្នុង​ឱកាស​ចូល​ជួប​ពិភាក្សាការងារ​ជា​មួយ​រដ្ឋមន្ត្រី​ក្រសួង​ឧស្សាហកម្ម នៅ​ថ្ងៃ​ទី​១៩ ខែ​សីហា នេះ លោក នៅ លក្ខណា រដ្ឋលេខាធិការក្រសួងមហាផ្ទៃ និងជាប្រធានគណៈកម្មាធិការ​ប្រយុទ្ធប្រឆាំង​ផលិតផល​ក្លែងក្លាយ​ បាន​លើក​ឡើង​អំពីការងាររបស់គណៈកម្មាធិការ និងការផ្លាស់ប្តូរអភិក្រមពីការផ្តោតលើការបង្រ្កាប ទៅការផ្សព្វផ្សាយអប់រំ និងការគាំទ្រអ្នកផលិត។

លោក បានស្នើសុំកិច្ចសហការ រួមទាំងការចែករំលែកទិន្នន័យស្តីពីការផលិតក្នុងស្រុក ពីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍។

ជា​ការ​ឆ្លើយ​តប ហែម វណ្ណឌី បានស្វាគមន៍ចំពោះអភិក្រមថ្មីនេះ និងលើកទឹកចិត្តឱ្យ​គណៈកម្មាធិការផ្តោត​លើ​ការ​ការពារអ្នកប្រើប្រាស់ ការគាំទ្រសហគ្រាសក្នុងស្រុក និងការរួមចំណែក​ដល់ការចុះបញ្ជី​ប្រកាស​នីយបត្រតក្កកម្ម ដើម្បីជំរុញនវានុវត្តន៍។

លោក​រដ្ឋមន្ត្រី បាន​ស្នើ​ឱ្យ​ក្រសួង​ស្ថាប័ន​ពាក់ព័ន្ធ​អនុវត្តអភិក្រមការងារជា “អង្គតែមួយរបស់រាជ​រដ្ឋាភិបាល” ដោយផ្តោតលើ​ផលប្រយោជន៍​ជាតិ និង​កំណើននៃ​វិស័យ​ឯកជនជារួម។

ជា​មួយ​គ្នា​នេះ លោក​រដ្ឋមន្ត្រី ក៏បាន​លើក​ឡើង​ផង​ដែរ​អំពីកំណែទម្រង់មន្ទីរពិសោធន៍ជាតិវិទ្យាសាស្ត្រ បច្ចេកវិទ្យា និងនវានុវត្តន៍ ដែលមានសមត្ថភាពខ្ពស់ក្នុងការគាំទ្រតម្រូវការសម្រាប់ការធ្វើតេស្តវិភាគរបស់គណៈកម្មាធិការ, មជ្ឈមណ្ឌលបច្ចេកវិទ្យាកែច្នៃអាហារដែលទើបនឹងសម្ពោធ, និងការខិតខំអភិវឌ្ឍស្តង់ដាជាបន្តបន្ទាប់ ដើម្បីលើកកម្ពស់គុណភាព និងសុវត្ថិភាពផលិតផលនៅកម្ពុជា៕