នេះជាអ្វីដែលគួរព្រួយបារម្ភ! នៅសុខៗ អូស្រ្តាលី ផ្ទុះករណីឆ្លងក្នុងសហគមន៍ ទាំងមិនដឹងប្រភពកូវីដនៅឯណា

នៅថ្ងៃព្រហស្បតិ៍ទី៦ខែឧសភានេះ អាជ្ញាធរអូស្រ្តាលីកំពុងព្យាយាម តាមដានរកប្រភពនៃការឆ្លងជំងឺកូវីដ-១៩ដ៏អាថ៌កំបាំង ក្នុងទីក្រុងស៊ីដនី ដែលវាជាករណីឆ្លងសហគមន៍លើកដំបូងរបស់ទីក្រុងនេះ ក្នុងរយៈពេលជាងមួយខែ។

ស្របពេលជាមួយគ្នានោះ អាជ្ញាធរក៏បានព្រមានផងដែរថា ប្រជាពលរដ្ឋកំពុងប្រឈមនឹងករណីឆ្លងកាន់តែច្រើន។ 

មន្ត្រីសុខាភិបាលមានការងឿងឆ្ងល់ចំពោះករណីលើបុរសអាយុជាង៥០ឆ្នាំម្នាក់ ដែលបានធ្វើតេស្តវិជ្ជមានកាលពីថ្ងៃពុធ ទោះបីគាត់មិនមានទំនាក់ទំនងអ្វីជាមួយការងារឬមនុស្សដែលមានហានិភ័យខ្ពស់ក៏ដោយ។

នាយកដ្ឋានសុខាភិបាលរបស់រដ្ឋ New South Wales បានចេញសេចក្តីជូនដំណឹងមួយ ដោយដាក់ឈ្មោះទីតាំងជាងដប់កន្លែងដែលបុរសរូបនេះបានទៅ ក្នុងរយៈពេលប៉ុន្មានថ្ងៃថ្មីៗនេះ រួមមានទាំងភោជនីយដ្ឋាន ហាងកាហ្វេនិងផ្សារទំនើបផងដែរ។

គាត់ត្រូវបានគេប៉ាន់ស្មានថា មានផ្ទុកមេរោគចាប់តាំងពីថ្ងៃទី៣០ខែមេសាមក។ គាត់គឺជាករណីដំបូងបង្អស់ ដែលត្រូវបានរាយការណ៍ក្នុងរដ្ឋ New South Wales ចាប់តាំងពីថ្ងៃទី៣១ខែមីនាមក។

អាជ្ញាធរកំពុងស៊ើបអង្កេតថាតើករណីនេះ ត្រូវបានផ្សារភ្ជាប់ជាមួយនឹងនរណាម្នាក់នៅក្នុងប្រព័ន្ធធ្វើចត្តាឡីស័កឬករណីនៅក្នុងរដ្ឋផ្សេងទៀតដែរឬក៏អត់ ហើយក៏កំពុងពិនិត្យមើលថាតើករណីនេះ គឺជាវីរុសបំប្លែងខ្លួនអ្វីផងដែរ៕

ប្រែសម្រួលដោយ៖ Vann Vann

ប្រភព៖ CNA

ចុចអាន៖ កូវីដមិនទាន់ថមថយ បែរជាផ្ទុះអំពើហិង្សាក្នុងការបោះឆ្នោត សម្លាប់មនុស្ស១៧នាក់ទៀត នៅឥណ្ឌា