ស្រាយចម្ងល់! អ្នកជំនាញកោសល្យវិច័យ ប្រាប់រយៈពេល ងាប់វីរុស កូវីដ នៅក្នុងខ្លួនអ្នកជំងឺដែលស្លាប់ ក្រោយវាយលុកសួតធ្ងន់ធ្ងរ

គ្រប់គ្នាប្រាកដជាឆ្ងល់ហើយថា តើវីរុសកូវីដ ១៩ ងាប់ទៅតាមអ្នកជំងឺ ដែលត្រូវមេរោគមួយនេះ វាយលុកសួតធ្ងន់ធ្ងររហូតដល់ស្លាប់ ដែរទេ ។ ចម្លើយនោះគឺថា វីរុសកូវីដ ១៩ អាចបន្តសំងំនៅផ្នែកខ្លះនៃរាងកាយ បើទោះបីអ្នកជំងឺបានស្លាប់ហើយក៏ដោយ ។

យោងតាមការធ្វើកោសល្យវិច័យ លើសាកសពរបស់អ្នកជំងឺកូវីដ ១៩ អាយុ ៦២ ឆ្នាំម្នាក់នៅទីក្រុង Bengaluru ប្រទេសឥណ្ឌា ដែលបានស្លាប់ បន្ទាប់ពីទទួលការព្យាបាលរយៈពេល ១៤ ថ្ងៃ បានបង្ហាញថា វីរុសនេះនៅតែមានជីវិត នៅក្នុងមាត់ បំពង់ ក និងច្រមុះរយៈពេល ១៨ ម៉ោង នៅក្នុងខ្លួនសាកសព ។

ការធ្វើកោសល្យវិច័យ ដែលបានអះអាងជាលើកដំបូង នៅក្នុងប្រទេសឥណ្ឌា និងត្រូវបានធ្វើនៅដើមសប្តាហ៍មុន ដោយអ្នកជំនាញខាងកោសល្យវិច័យលោក Dinesh Rao ជាប្រធាននាយកដ្ឋានវេជ្ជសាស្ត្រ នៅមហាវិទ្យាល័យវេជ្ជសាស្ត្រ និងវិទ្យាស្ថានស្រាវជ្រាវនៅទីក្រុង Oxford បាននិយាយថា “ខ្ញុំបានធ្វើកោសល្យវិច័យ ដើម្បីស្វែងយល់ពីដំណើរការជំងឺ និងលទ្ធផលរបស់វា” ។

លោក Rao បាននិយាយថា “ក្រោយការធ្វើតម្បារពីមាត់ បំពង់ក និងច្រមុះ ដើម្បីយកសំណាក អ្នកជំងឺដែលបានស្លាប់ លទ្ធផលនៅតែវិជ្ជមាន ខណៈគ្មានដានមេរោគនៅលើស្បែកមុខ ក ឬសរីរាង្គខាងក្នុងដូចជា ផ្លូវដង្ហើម និងសួត ឡើយ ។ នោះគឺដោយសារតែផ្ទៃសួត ត្រូវបានបំផ្លាញយ៉ាងធ្ងន់ធ្ងរដោយសារបាក់តេរីនៃវីរុស” ។

លោកបានសង្កត់ធ្ងន់ថា ការរកឃើញបែបនេះហើយ ទើបតម្រូវឲ្យសាកសពអ្នកជំងឺកូវីដ ១៩ ទាំងអស់ ត្រូវបូជា ដោយមិនប្រគល់ឲ្យក្រុមគ្រួសាររបស់ពួកគេភ្លាមៗនោះទេ ចៀសវាងការឆ្លងបន្តទៅដល់អ្នកពាក់ព័ន្ធដែលមិនបានការពារខ្លួន ៕

ប្រែសម្រួលដោយ ៖ ជីវ័ន្ត

ប្រភព ៖ The Hindu

ចុចអាន ៖ វ៉ាក់សាំង កូវីដ ដែល អាមេរិក កំពុងប្រើបច្ចុប្បន្នក៏មានប្រសិទ្ធភាពប្រឆាំងនឹងវីរុសបំប្លែងខ្លួនឥណ្ឌា

ចុចអាន ៖ របប​អាហារ​សម្រាប់​អ្នក​ជា​សះស្បើយ​ពី​កូវីដគួរ​ទទួលទាន​ ដើម្បី​ជួយ​ពង្រឹង​សុខភាព​មកដូច​ដើម​វិញ​​​