ស្លាប់១ករណីទៀតដោយសារជំងឺកូវីដ-១៩ នៅខេត្តបាត់ដំបង សរុបកើនដល់៣ករណី

ខេត្តបាត់ដំបង៖ ខេត្តបាត់ដំបងមានបុរសវ័យចំណាស់ម្នាក់បានស្លាប់ដោយសាជំងឺកូវីដ-១៩ នាំឱ្យចំនួនសរុបអ្នកស្លាប់កើនឡើងដល់ ៣ករណីដោយសារជំងឺកូវីដ-១៩។

ប្រភពព័ត៌មានពីមន្ត្រីសុខាភិបាលបានបញ្ជាក់ឲ្យដឹងថា នៅថ្ងៃទី១៤ ខែមិថុនា ឆ្នាំ២០២១នេះមានអ្នកជំងឺកូវីដ-១៩ម្នាក់ទៀតបានស្លាប់កាលពីអំឡុងវេលាម៉ោង៣:៣០នាទីរសៀល។ អ្នកជំងឺដែលបានស្លាប់ដោយសារកើតជំងឺកូវីដ-១៩បូករួមទាំងមានជំងឺប្រចាំកាយមួយចំនួនផងដែរទើបធ្ងន់ធ្ងរមិនអាចជួយសង្គ្រោះបាន។

ជនរងគ្រោះស្លាប់មានឈ្មោះ អុិត ហ៊ុម ភេទប្រុស អាយុ៧៧ឆ្នាំ រស់នៅក្នុងភូមិបោះពោធិ៍ ឃុំអូរដំបង១ ស្រុកសង្កែ ខេត្តបាត់ដំបង។ នៅថ្ងៃដដែលនោះ ក្នុងភូមិសាស្ត្រខេត្តបាត់ដំបងក្រុមគ្រូពេទ្យសមរភូមិជួរមុខបានរកឃើញប្រជាពលរដ្ឋឆ្លងជំងឺកូវីដ-១៩ចំនួន១១នាក់ ជាករណីក្នុងព្រឹត្តិការណ៍២០កុម្ភៈ មានចំនួន៦នាក់ និងករណីពលករខ្មែរនាំចូលចំនួន៥នាក់។

គិតត្រឹមថ្ងៃទី១៤ ខែមិថុនាឆ្នាំ ២០២១ រដ្ឋបាលខេត្តបាត់ដំបងបានរកឃើញប្រជាពលរដ្ឋវិជ្ជមានជំងឺកូវីដ-១៩សរុបចំនួន៥៤២នាក់ បានព្យាបាលជាសះស្បើយចំនួន២៣២នាក់ កំពុងសម្រាកព្យាបាលចំនួន៣០៨នាក់ និងករណីស្លាប់កើនដល់ចំនួន៣នាក់៕

អត្ថបទ៖ សៅ សារិទ្ធ