គ្រូពេទ្យចុះយកសំណាក​មនុស្ស​៤៨នាក់ រកឃើញវិជ្ជមាន​កូវីដ​១៩ ចំនួន ៧​ នាក់​នៅភូមិត្រពាំងពោធិ៍

អាជ្ញាធរសង្កាត់ចោមចៅទី៣ ដឹកនាំដោយលោក សុទ្ធ សុជាតិ ចៅសង្កាត់រង បានសហការជាមួយក្រុមគ្រូពេទ្យស្ម័គ្រចិត្តរបស់សម្តេចតេជោ ប្រឆាំងជំងឺកូវីដ១៩ ចុះយកសំណាកបងប្អូនកម្មករ កម្មការនី ដែលស្នាក់នៅបន្ទប់ជួល ក្នុងភូមិត្រពាំងពោធិ៍ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ចំនួន៤៨នាក់ ជាលទ្ធផលរកឃេីញអ្នកវិជ្ជមានជំងឺកូវីដ១៩ ចំនួន៧នាក់ និងរង់ចាំតេស្តរកជំងឺបំប្លែងថ្មីប្រភេទ Dalta បន្តទៀត។

លោក សុទ្ធ សុជាតិ ចៅសង្កាត់រងបានឱ្យដឹងថា មុននឹងក្រុមគ្រូពេទ្យឈានដល់ការចុះយកសំណាកបងប្អូនដែលស្នាក់នៅបន្ទប់ជួលខាងលេី មានបុរសម្នាក់ដែលស្នាក់នៅបន្ទប់ជួលលេខ១០៣ វិជ្ជមានជំងឺប្រភេទថ្មីDalta ក្រោយពីក្រុមគ្រូពេទ្យយកទៅព្យាបាលរួច ទេីបបន្តចុះមកយកសំណាកប្រពន្ធកូន និងបងប្អូនដែលស្នាក់នៅបន្ទប់ជួលក្បែរៗនោះចំនួន៤៨នាក់ទៀត។

លោកបន្តថា ក្រោយពីតេស្តរួចជាលទ្ធផលរកឃេីញអ្នកវិជ្ជមានជំងឺកូវីដ១៩ចំនួន៧នាក់ ស្រី៤នាក់ ហេីយបានយកទៅព្យាបាលបន្ត និងរង់ចាំតេស្តរកជំងឺបំប្លែងថ្មី Dalta បន្តទៀត។

អង្គភាពអនុគណៈកម្មការស្រាវជ្រាវជំងឺកូវីដ១៩ ដើម្បីសុវត្ថិភាព សូមយកចិត្តទុកដាក់ តាមដានសុខភាពរបស់ខ្លួនរយៈពេល ២១ ថ្ងៃ ចាប់ពីថ្ងៃដែលអ្នកបានប៉ះពាល់ ឬបានទៅទីកន្លែងនេះ៕

អត្ថបទៈ សុខា