កម្ពុជា រកឃើញអូមីក្រុង ទាំងអស់ ២៣ នាក់ ក្នុងនោះ ១៤ នាក់ជាករណីឆ្លងក្នុងសហគមន៍

ក្រសួងសុខាភិបាល នៅថ្ងៃទី ១៦ ខែមករា ឆ្នាំ ២០២២ នេះ បានចេញសេចក្តីប្រកាសព័ត៌មាន រកឃើញអ្នកឆ្លងកូវីដ-១៩ ថ្មីចំនួន ២៣ នាក់ ជាប្រភេទអូមីក្រុង ក្នុងនោះករណីនាំចូលចំនួន ៩ នាក់ និងឆ្លងក្នុងសហគមន៍ ១៤ នាក់ ខណៈអ្នកជំងឺចំនួន ១៣ នាក់ជាសះស្បើយ។

នៅថ្ងៃនេះមិនមានអ្នកស្លាប់ដោយសារជំងឺកូវីដ-១៩ ទេ ដោយគិតមកដល់ពេលនេះ មានរយៈពេល ១២ ថ្ងៃជាប់គ្នាហើយ ចាប់ពីតាំងពីថ្ងៃទី៥ ខែមករាមក ដែលកម្ពុជាមិនមានអ្នកស្លាប់ដោយជំងឺកូវីដ-១៩

គួរបញ្ជាក់ថា គិតត្រឹមនេះ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន ១២០ ៧៩៦ នាក់ អ្នកជាសះស្បើយសរុបចំនួន ១១៧ ១០២ នាក់ និងស្លាប់សរុបចំនួន ៣ ០១៥នាក់។

រដ្ឋាភិបាលបានជ្រើសរើសយកការចាក់វ៉ាក់សាំងកូវីដ-១៩ និងការអនុវត្តវិធានការសុខាភិបាល ៣កុំ ៣ការពារ ជាមធ្យោបាយចម្បងក្នុងការទប់ស្កាត់ និងប្រយុទ្ធប្រឆាំងជំងឺកូវីដ-១៩៕

អត្ថបទ៖ ច័ន្ទ ​វីរៈ