សមាគមសិល្បករខ្មែរ អំពាវនាវដល់សប្បុរសជន និងអ្នកសិល្បៈ ផ្តល់ឱកាសរស់មួយឱ្យ យូឌីស្កូ ខណៈត្រូវការថវិកាដើម្បីវះកាត់ប្តូរក្រលៀន

ប្រធានសមាគមសិល្បករខ្មែរ ចេញមុខជួយដល់លោក យូឌីស្កូ ជាថ្មី ដោយទទូចសុំដល់សប្បុរសជនទាំងឡាយ ជួយសង្គ្រោះជីវិតសិល្បកររូបនេះ តាមរយៈការបរិច្ចាគ ខណៈប្រមាណជាង ១សប្តាហ៍មកនេះ លោកកំពុងព្យាបាលដោយលាងឈាមនៅប្រទេសឥណ្ឌាជាលើកទី២ គ្មានលទ្ធភាពវះកាត់ប្តូរក្រលៀន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កន្លងទៅថ្មីៗនេះ លោកជំទាវអ្នកឧក ញ៉ា ម៉ៅ ចំណាន ប្រធានសមាគមសិល្បករខ្មែរ បានបរិច្ចាគថវិកាផ្ទាល់ខ្លួនចំនួន ៥ លានរៀលនិងថវិកាសមាគម ៨០ម៉ឺនរៀល ជួយសម្រួលការលំបាករបស់លោក យូឌីស្កូ ដែលកំពុងសម្រាកព្យាបាលជំងឺនៅប្រទេសឥណ្ឌា។ តែយ៉ាងណា ដើម្បីរក្សាអាយុជីវិតរបស់លោកបាន គឺមានតែការវះកាត់ប្តូរក្រលៀនប៉ុណ្ណោះ។

តាមរយៈសារពីទំព័រហ្វេសប៊ុកសមាគមសិល្បករខ្មែរ នៅថ្ងៃទី០៥ ខែកុម្ភៈ ឆ្នាំ២០២៦ បានអំពាវនាវថា នៅក្នុងគ្រាដ៏លំបាកនេះ សមាគមសិល្បករខ្មែរសូមអំពាវនាវដល់សប្បុរសជនជាទីគោរព ជាពិសេសសិល្បករ និងអ្នកស្រលាញ់វិស័យសិល្បៈ សូមមេត្តាចូលរួមបរិច្ចាគថវិកាតាមសទ្ធា និងទឹកចិត្តមេត្តាករុណា ដើម្បីជួយសម្រាលការលំបាកក្នុងដំណាក់កាលព្យាបាលជំងឺរបស់លោក យូឌីស្កូ ដែលកំពុងសម្រាកព្យាបាលនៅប្រទេសឥណ្ឌា។

សមាគមសិល្បករខ្មែរ ចាត់ទុកថា ការចូលរួមរបស់លោកអ្នកមិនត្រឹមតែជាជំនួយផ្នែកហិរញ្ញវត្ថុប៉ុណ្ណោះទេ ប៉ុន្តែជាកម្លាំងចិត្តដ៏ធំធេង ជួយបង្កើនសេចក្តីសង្ឃឹម និងភាពក្លាហានឱ្យសិល្បកររូបនេះ អាចឆ្លងកាត់វគ្គពិបាកនេះទៅបានដោយសុវត្ថិភាព។

គួរបញ្ជាក់ថា លោកយូឌីស្កូ បានធ្លាក់ខ្លួនឈឺជាទម្ងន់ជាថ្មីម្តងទៀតពាក់ព័ន្ធជំងឺខូចគ្រលៀន ហើយកំពុងត្រូវការថវិកាលាងឈាមជាប្រចាំនៅមន្ទីរពេទ្យប្រទេសឥណ្ឌា៕