នាង គន្ធា កំពុងច្រៀងលើឆាក ស្រាប់តែមានគេគប់កំប៉ុងស្រា ធ្វើឱ្យអ្នករាំម្នាក់រងរបួសជើង

តារាចម្រៀងវ័យក្មេង នាង គន្ធា បានជួបហេតុការណ៍ដ៏ហួសចិត្តមួយ ខណៈកំពុងសម្តែងលើឆាកក្នុងខេត្តមណ្ឌលគិរី ដោយមានជនមិនស្គាល់មុខគប់កំប៉ុងស្រាបៀរឡើងលើឆាក បណ្តាលឱ្យអ្នករាំម្នាក់រងរបួសត្រង់ជើង។

តារាចម្រៀងរូពនេះ បានបញ្ជាក់ថា នេះជាលើកទី១ ក្នុងរយៈពេលប្រមាណ១០ឆ្នាំនៃអាជីពសិល្បៈ ដែលខ្លួនជួបរឿងបែបនេះ ពេលចេញទៅច្រៀងតាមបណ្តាខេត្ត។ នាងសម្តែងការភ័យខ្លាច និងហួសចិត្តយ៉ាងខ្លាំង ព្រោះមិនដឹងថាជនបង្កមានកំហឹងជាមួយអ្នកណា ឬមានបំណងអ្វីនោះទេ។

តាមការរៀបរាប់ កំប៉ុងស្រាបៀរដែលគប់មកនោះ បានទាក់ខ្សែសង្វៀនប្រដាល់នៅក្បែរឆាក មុនច្រឡោតទៅត្រូវជើងសមាជិកក្រុមរាំ។ នាងថា បើមិនមានការទាក់បែបនោះទេ អាចនឹងត្រូវនាងផ្ទាល់ ឬបង្កគ្រោះថ្នាក់ធ្ងន់ធ្ងរជាងនេះ។

ក្រោយកើតហេតុ ជនបង្កបានរត់គេចខ្លួនបាត់ ខណៈសមត្ថកិច្ចបានព្យាយាមតាមរក ប៉ុន្តែមិនទាន់មានដំណឹងពីការចាប់ខ្លួននៅឡើយ។ ហេតុការណ៍នេះបានធ្វើឲ្យមហាជន និងអ្នកគាំទ្រជាច្រើន សម្តែងការព្រួយបារម្ភចំពោះសុវត្ថិភាពរបស់សិល្បករ នៅពេលចេញសម្តែងតាមកម្មវិធីនានា៕ ដោយ ៖ ចាន់រ៉ា