ជីវិតកម្សាន្ដ

នាង គន្ធា ប្រកាសការវិលត្រឡប់របស់បងប្រុស ក្រោយរង់ចាំជិត ២ ឆ្នាំ

បានផុស

៥ ខែ មុន

នៅ

ថ្ងៃចន្ទ ៨ ឧសភា ២០២៣

ដោយ

ជារឿងដ៏ភ្ញាក់ផ្អើល និងចាប់អារម្មណ៍សម្រាប់មហាជនអ្នកគាំទ្រនិយមតាមដានវិស័យសិល្បៈក្នុងស្រុក ខណៈសុខៗ ស្រាប់តែតារាចម្រៀងកញ្ញា នាង គន្ធា បានប្រកាសពីការវិលត្រឡប់របស់បងប្រុសលោក នាង ប្រាក់សុគន្ធ ដែលចែកឋានទៅមានរយៈពេល ២ ឆ្នាំកន្លងទៅហើយនោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកាសយ៉ាងភ្ញាក់ផ្អើលរបស់តារាចម្រៀងវ័យក្មេង នាង គន្ធា ពេលនេះ បានធ្វើឲ្យអ្នកគាំទ្រជាច្រើនមានចម្ងល់ថា ហេតុអ្វីបានបងប្រុសរបស់នាង គឺ លោក នាង ប្រាក់សុគន្ធ ដែលបានចែកឋានទៅមានរយៈពេល ២ ឆ្នាំទៅហើយ ត្រូវវិលត្រឡប់បែបនេះ?។ យ៉ាងណាមិញជាចម្លើយជាក់លាក់មិនទាន់ត្រូវបានតារាចម្រៀងរូបស្រស់ គន្ធា បកស្រាយនៅឡើយទេ។

នៅលើគណនីហ្វេសប៊ុករបស់តារាចម្រៀង នាង គន្ធា បានសរសេរខ្លឹមសារបង្ហោះភ្ជាប់រូបភាពក្មេងដ៏គួរឲ្យស្រលាញ់ទើបតែសម្រាលដូច្នេះថា «Welcome My baby girl ការរង់ចាំអស់រយៈពេលជិត ២ ឆ្នាំ អរគុណការវិលត្រឡប់បងប្រុស។ អូនមានសុខភាពល្អទាំងម៉ាក់ កូន អូនឈ្មោះ ថន ជេអ៊ីន»។ តាមរយៈនេះមានការយល់ឃើញថា សម្ដីរបស់កញ្ញា នាង គន្ធា គឺចង់សំដៅថា បងប្រុសរបស់នាងបានវិលមកចាប់កំណើតជាថ្មី។

គួររម្លឹកថា គិតមកទល់ពេលនេះតារាចម្រៀងវ័យក្មេងលោក នាង ប្រាក់សុគន្ធ បានចែកឋានទៅមានរយៈពេលជិត ២ ឆ្នាំមកហើយ ខណៈជារឿយៗ គេតែងឃើញតារាចម្រៀងស្រីដែលជាប្អូនស្រីបង្កើត គឺ កញ្ញា នាង គន្ធា បានបង្ហាញនូវការនឹកស្រណោះដល់បងប្រុសផងនោះ។ លោក នាង ប្រាក់សុគន្ធ បានជួបគ្រោះថ្នាក់ចរាចរណ៍កាលពីរំលងអធ្រាត្រឈានចូលថ្ងៃទី ២៥ ខែធ្នូ ឆ្នាំ ២០២១ ក្រោយចេញពីច្រៀងនៅហាងសាច់អាំងក្បែរច្រមុះជ្រូកស្ទឹងមានជ័យ បណ្ដាលឲ្យស្លាប់ក្រោយបញ្ជូនដល់មន្ទីរពេទ្យ៕

អត្ថបទ ៖ ចាន់រ៉ា