តាមពិតចំណូល-ចំណាយធំៗរបស់ Taylor Swift គឺបែបនេះសោះ

តារាចម្រៀង Taylor Swift ត្រូវបានគេចាត់ទុកជាសេដ្ឋីនីក្នុងវិស័យសិល្បៈ ខណៈទ្រព្យសម្បត្តិរបស់នាងក្នុងឆ្នាំ២០២២ មានដល់ទៅ ៤០០លានដុល្លារអាមេរិក ក្នុងវ័យ ៣៣ឆ្នាំ។

តើប្រិយមិត្តដឹងទេ Taylor មានទ្រព្យសម្បត្តិដ៏មហាសាលនេះមកពីណា? ហើយនាង​ចាយ​វាយវាលើអ្វីខ្លះ?

ចំណូលពីវិស័យសិល្បៈ

Taylor Swift បានចាប់ផ្តើមអាជីពចម្រៀងតាំងពីអាយុ ១៥ឆ្នាំ កំលុងពេលនាងចូលរួមការប្រគុំតន្ត្រីបែបជនបទមួយ។ នាពេលបច្ចុប្បន្ន នាងគឺជាតារាចម្រៀងស្រីដែលមានប្រជាប្រិយភាពបំផុតទូទាំងពិភពលោក ដែលមានការចូលមើលរាប់លានដង សឹងគ្រប់ប្រព័ន្ធផ្សព្វផ្សាយ។ ចំណូលដ៏សន្ធឹកសន្ធាប់របស់នាង​បានមកពីការប្រគុំតន្រ្តីទេសចរណ៍ ការលក់អាល់ប៊ុម និងការផ្សាយពាណិជ្ជកម្មឱ្យម៉ាកល្បីៗមួយចំនួន។ ចំណូលទាំងនេះបានជួយឱ្យម្ចាស់បទ Lover ក្លាយជាតារាឈានមុខគេក្នុងឧស្សាហកម្មកម្សាន្ត មកជាច្រើនឆ្នាំ។

ក្រៅពីទ្រព្យសម្បត្តិដ៏មហាសាល ដែលរកបានដោយដៃឯង Taylor Swift គឺជាកូនចៅអ្នកមានទ្រព្យស្រាប់ ជាពិសេសនាងជាប់សាច់សារលោហិតជាមួយខ្សែរាជវង្សអង់គ្លេសទៀតផង។

ចំណូលពីអចលនទ្រព្យ

Taylor Swift មិន​មាន​ចំណូលចិត្ត​ប្រមូលទិញ​រថយន្ត​ប្រណីតៗ និង​ដេញតាមសង្គមស៊ីវិល័យ​ដូច​តារា​ល្បី​ដទៃ​ទៀត​ទេ។ ផ្ទុយ​ទៅ​វិញ តារា​ចម្រៀង​​រូប​នេះ​​ផ្ដោត​លើ​ការ​វិនិយោគ​អចលនទ្រព្យ​ដើម្បី​រក​ប្រាក់​ចំណេញ។ បច្ចុប្បន្ននាងមានអចលនទ្រព្យចំនួន ៨កន្លែង នៅក្នុងដៃ ដែលវាមានតម្លៃសរុបរហូតដល់ ៨៤លានដុល្លារអាមេរិក។

ចំណាយលើអ្នកដទៃ

Taylor Swift មានទម្លាប់ចំណាយចម្លែកពីគេបន្តិច ដោយនាង​រីករាយ​នឹង​ការ​ប្រើ​លុយសម្រាប់ជួយ​អ្នក​ដទៃ។ នាងធ្លាប់ប៉ាវសមាជិក ១២៥នាក់ ទៅធ្វើដំណើរនៅប្រទេសអូស្ត្រាលី កាលពីប៉ុន្មានឆ្នាំមុន។

Taylor ក៏​ជា​មហាសេដ្ឋី​ស្រី​ម្នាក់​ដែល​មានទឹក​ចិត្ត​ល្អ ​ដោយ​នាង​តែងតែ​បរិច្ចាគ​ប្រាក់​ដល់​អង្គការ​សប្បុរសធម៌នានា។ នៅថ្ងៃខួបកំណើត ២៤ឆ្នាំ Taylor បានបរិច្ចាគ ១សែនដុល្លារ សម្រាប់វង់តន្រ្តីស៊ីមហ្វូនីនៅស្រុកកំណើតរបស់នាង។ អ្វី​ដែល​គួរ​ឲ្យ​កត់​សម្គាល់​ទៀតនោះនាង​ធ្លាប់ឧបត្ថម្ភ​ថវិកាជួយវិស័យ​អប់រំ​ជា​ច្រើន និង​ផ្ដល់អាហារូបករណ៍ដល់សិស្សទៀតផង។

ចំណាយលើយន្តហោះឯកជន និងធានារ៉ាប់រង

ម្ចាស់បទ Me គឺជាមនុស្សមានចំណូលចិត្តក្នុងការប្រមូលទិញយន្តហោះឯកជន។ នាងមានយន្តហោះឯកជនដល់ទៅ ២គ្រឿង ដែលមានតម្លៃប្រហែល ៥៨លានដុល្លារអាមេរិក។ យន្តហោះនេះមានកៅអីសរុបចំនួន ១២ ដែលវាគ្រប់ល្មមសម្រាប់បុគ្គលិករបស់ Taylor ពេលធ្វើដំណើរទៅប្រគុំតន្ត្រីក្នុងស្រុក។

ក្រៅ​ពី​ប្រើ​លុយ​ជួយ​អ្នក​ដទៃ Taylor បាន​ចំណាយ​ប្រាក់​ជាង ៣៨លាន​ដុល្លារ ដើម្បី​ទិញ​ធានា​រ៉ាប់​រង​ការពារ​ជើង។ តារាស្រីវ័យ ៣៣ឆ្នាំរូបនេះ និយាយថា នាងមានការព្រួយបារម្ភលើការប្រើក្បាច់រាំច្រើនពេកនៅលើឆាកនឹងធ្វើឱ្យជើងរបស់នាងមិនអាចទ្រាំទ្របាន ដូច្នេះនាងត្រូវត្រៀមខ្លួនជានិច្ច។

ទោះបីជាមានទ្រព្យសម្បត្តិច្រើនយ៉ាងណាក៏ដោយ Taylor Swift គឺជាមនុស្សសាមញ្ញណាស់ ព្រោះនាងគ្មានឡានទំនើបៗដើម្បីសម្ញែង ឬប្រើសម្លៀកបំពាក់ម៉ាកល្បីៗនោះទេ។ នាងតែងតែជ្រើសរើសការចំណាយដែលមានសុវត្ថិភាពក្នុងរយៈពេលយូរ ដោយបានពិចារណាយ៉ាងវែងឆ្ងាយ ហើយគិតគូដល់មនុស្សជុំវិញខ្លួនជានិច្ច។ ម្ចាស់បទ You Belong With Me ជាតារាស្រីមានវិធីចំណាយលុយយ៉ាងសមហេតុផល និងមានតម្លៃសម្រាប់គ្រប់គ្នាអាចរៀនសូត្របាន៕

ប្រែសម្រួល៖ សន្យា

ចុចអាន៖ ៩ អាថ៌កំបាំងធ្វើឲ្យ Taylor Swift ជោគជ័យខ្លាំងដល់​បច្ចុប្បន្ន

ចុចអាន៖ នេះជាស្ថានភាពបច្ចុប្បន្នរបស់តួទាំង ៦ ក្នុងរឿង Harry Potter ក្រោយបញ្ចាំងចប់ ២១ឆ្នាំ