ក្រោយឧបទ្ទវហេតុធ្លាក់ LED ក្រុមចម្រៀង Mirror ត្រូវផ្អាកបង្ហាញខ្លួនជាសាធារណៈ រហូតចុងខែកញ្ញា

ក្រុមចម្រៀងបុរសហុងកុង Mirror ត្រូវផ្អាកការបង្ហាញខ្លួនជាសាធារណៈ រហូតដល់ចុងខែកញ្ញា ឆ្នាំ២០២២ បន្ទាប់ពីឧបទ្ទវហេតុធ្លាក់អេក្រង់ LED នៅក្នុងការប្រគុំតន្ត្រី ដែលបានធ្វើឱ្យអ្នករាំម្នាក់រងគ្រោះយ៉ាងដំណំ សឹងបាត់បង់ជីវិត។

បើតាមការឱ្យដឹងពី Music Nation និង MakerVille ដែលរៀបចំកម្មវិធីប្រគុំតន្ត្រី កាលពីពេលថ្មីៗនេះ និយាយថា សមាជិកទាំង ១២នាក់របស់ក្រុម Mirror នឹងត្រូវផ្អាកបង្ហាញខ្លួនជាបណ្ដោះអាសន្ន បន្ទាប់ពីឧបទ្ទវហេតុ ហើយសម្រាប់ការប្រគុំតន្ត្រីនៅសប្ដាហ៍ក្រោយត្រូវបានលុបចោល ចំណែកថ្លៃសំបុត្រពួកគេនឹងរៀបចំសងប្រាក់ទៅទស្សនិកជនវិញ។ ចំពោះការផ្អាកបង្ហាញខ្លួននេះដែរ អ្នករៀបចំកម្មវិធីបានបន្ថែមថា សមាជិកក្រុមម្នាក់ៗត្រូវការពេលសម្រាកបន្តិច ដើម្បីព្យាបាលភាពតក់ស្លុត ក្រោយជួបហេតុការណ៍គ្រោះថ្នាក់។

គួររំលឹកថា កាលពីថ្ងៃទី២៨ ខែកក្កដា កន្លងទៅ អេក្រង់ LED ទំហំ ៤ គុណនឹង៤ ម៉ែត្របានធ្លាក់ទៅលើឆាក ក្នុងយប់ទី ៤ នៃការប្រគុំតន្ត្រី នៅឯមហោស្រព Hong Kong Coliseum បណ្ដាលឱ្យអ្នករាំម្នាក់រងរបួសធ្ងន់ និងអ្នករាំម្នាក់ទៀតរងរបួសស្រាល ប៉ុន្តែគេរងជំងឺជំងឺបាក់ទឹកចិត្ត៕

ប្រែសម្រួល៖ សន្យា

ប្រភព៖ SCMP

ចុចអាន៖ Britney Spears បញ្ចេញរូបស្រាតច្រើនសន្លឹក កំពុងបង្កភាពចម្រូងចម្រាសលើបណ្ដាញសង្គម

ចុចអាន៖ ជនរងគ្រោះក្នុងឧបទ្ទវហេតុធ្លាក់ LED ភ្ញាក់ដឹងខ្លួន ខណៈការស៊ើបអង្កេតនៅតែបន្ត