ចាប ចៀន រំភើបពេលកូនស្រីច្បងទទួលលទ្ធផលល្អក្រោយបញ្ចប់មហាវិទ្យាល័យ

តារាកំប្លែងជើងចាស់វោហាស័ព្ទមិនចេះរឹងស្ងួតនាយ ចាប ចៀន ក្រោយកូនស្រីច្បងទទួលបានលទ្ធផលល្អក្នុងការបញ្ចប់មហាវិទ្យាល័យ ក្នុងនាមទឹកចិត្តលោកជាឪពុកបានសម្តែងក្តីរំភើបខ្លាំងរកអ្វីប្រៀបផ្ទឹមពុំបានឡើយ។

រឿងដែលអ្នកគាំទ្រកត់សម្គាល់ និងសរសើរលោក ចាប ចៀន ទៀតនោះព្រោះលោកជាឪពុកដែលចិញ្ចឹមកូនបានល្អស្តាប់​តាមដំបូន្មានរហូតឆ្នាំនេះកូនស្រីច្បងរៀនចប់មហាវិទ្យាល័យហើយបានទទួលលទ្ធផលល្អជាសិស្សឆ្នើមប្រចាំថ្នាក់រហូតបំណាច់ឆ្នាំ ខណ:កូនប្រុសទី២ក៏ទើបតែប្រលងជាប់បាក់ឌុបបញ្ចប់ថ្នាក់ទី១២ត្រៀមចូលមហាវិទ្យាល័យ។

នាយ ចាប ចៀន ថ្លែងប្រាប់ទាំងរំភើថា «សម្រាប់ជីវិតខ្ញុំនេះគឺជាថ្ងៃដែលខ្ញុំសប្បាយរីករាយបំផុតរកអ្វីប្រៀបផ្ទឹមពុំបានព្រោះបានឃើញកូនស្រីច្បងរៀនចប់មហាវិទ្យាល័យ ហើយបានទទួលលទ្ធផលល្អជាសិស្សឆ្នើមប្រចាំថ្នាក់រហូតបំណាច់ឆ្នាំ។ បន្ទាប់មកកូនប្រុសទី២ទើបតែប្រលងជាប់បាក់ឌុបបញ្ចប់ថ្នាក់ទី១២ត្រៀមចូលមហាវិទ្យាល័យ»។

លោកបន្តទៀតថា «ខ្ញុំសង្ឃឹមថា កូនប្រុសខ្ញុំនឹងទទួលបាននិទ្ទេសល្អដូចបងស្រីគេជាក់ជាពុំខាន។ ចំណែកឯកូនស្រីពៅទើបតែរៀនថ្នាក់ទី៦នៅឡើយទេ ប៉ុន្តែខ្ញុំជឿជាក់ថា កូនស្រីពៅខ្ញុំនឹងយកបងៗរបស់គេធ្វើជាគំរូ»។ កូនល្អស្តាប់ហេតុ​ផល​ម៉ែ សិស្សពូកែស្តាប់ហេតុផលគ្រូ គ្រូពូកែស្តាប់ហេតុផលសិស្ស ឪពុកម្តាយល្អស្តាប់ហេតុផលកូន។

បន្ថែមពីនេះនាយ ចាប ចៀន លើកឡើងថា នៅលើលោកនេះ គ្មានអ្វីប្រាស់ចាកហេតុនិងផលឡើយ។ ស្របជាមួយពុទ្ធឱវាទមួយឃ្លា បុគ្គលដែលសាបព្រួសពូជណា រមែងតែងតែទទួលផលពូជហ្នឹង។ តាមរយ:នេះក៏មានអ្នកគាំទ្រលោកជាច្រើនបានចូលរួមអបអរហើយសរសើរថា នាយ ចាប ចៀន ចិញ្ចឹមកូនបានល្អនិងជាគំរូ៕

អត្ថបទ៖ ចាន់រ៉ា